नेपाल आइडल अस्ट्रेलियामा

राजधानी क्यानबेराबाट सुरु हुने उनीहरूको सांगीतिक यात्रा यहाँका विभिन्न सात सहरमा हुँदै छ । 

सिड्नीस्थित नेपाली टचले नेपाल आइडलका विजेताहरूलाई अस्ट्रेलिया ल्याएको हो । 

शुक्रबार क्यानबेरा आइपुगेको टोलीमा नेपाल आइडल विजेता बुद्ध लामा, फस्र्ट रनरअप निशान्त भट्टराई, सेकेन्ड रनरअप प्रताप दास र कार्यक्रम प्रस्तोता सुशील नेपाल छन् । पहिलो पटक भव्य र फरक कार्यक्रम गर्न लागिएको आयोजक संस्थाका राजकुमार गोश्वामीले जानकारी दिए ।

उनका अनुसार नेपाल आइडल टिमले सिड्नीको प्रतिष्ठितमध्येको ओलम्पिक पार्कमा रहेको स्पोर्टस् सेन्टरमा पनि कन्सर्ट गर्नेछ । अस्ट्रेलिया आइपुगेपछि गायकहरूले यहाँ रहेका नेपालीहरूले देखाएको माया र सम्मानप्रति खुसी व्यक्त गरे ।

उनीहरूले सबैलाई कार्यक्रममा सहभागी भएर आफूहरूलाई हौसला दिनसमेत आग्रह गरे । करिब एक महिना अघिदेखि नै उनीहरूको कार्यक्रम सफल बनाउन आयोजकले सामान्यभन्दा फरक प्रचार शैली अपनाएको थियो । सिड्नी र मेलबर्नका ट्रेन स्टेसनहरू र धेरै नेपालीहरूको बसोबास रहेको स्थानहरूमा ठूला प्रचारात्मक ब्यानर नै टाँगेर यसपटक प्रचार गरिएको छ । 

आयोजकमध्येका दिपेश पुनले पहिलो पटक रियालिटी सोबाट चर्चामा आएका उनीहरूको कार्यक्रम अन्य सांगीतिक कार्यक्रमभन्दा अलग र मनोरञ्जनात्मक हुने दाबी गरे । उनीहरूको कार्यक्रम अस्ट्रेलियाको सिड्नी, मेलबर्न, ब्रिसबन, एडिलेड, ब्रिसबन, पर्थ, डार्बिन र क्यानबेरामा हुँदै छ ।