राम्रा भनिएका १० बलिउड फिल्म

यो वर्षको अन्त्यतिर सार्वजनिक भएको राजकुमार रावको मुख्य भूमिका रहेको चलचित्र न्यूटनले विद्रोही समूह नक्साल नियन्त्रित छत्तिकगढमा निर्वाचन गराउन गएका एक सरकारी अधिकारीको कथा बोल्छ । भर्खरै सरकारी सेवामा प्रवेश गरेको न्यूटन कुमार (राजकुमार राव) ले स्वच्छ निर्वाचन गराउन खोज्दा झेल्नुपर्ने जटिलता यो फिल्मको मुख्य कथा हो । ओस्कार अवार्डका लागि भारतबाट छनौट गरिएको फिल्म इरानी फिल्म सेक्रेट व्यालोटबाट प्रभावित छ ।

चार महिलाको कथा भन्ने फिल्म लिपिस्टिक अण्डर माई बुर्खाले चार महिलाको मनोविज्ञान बोल्छ । यसमा कोनकोना सेन, रत्ना पाठक, आहना कुम्रा र प्लबिता बोर्थाकुर मुख्य भूमिकामा छन् । फरक फरक परिवेशमा बाँचेका महिलाको मनोविज्ञानलाई फिल्ममा उतारिएको छ । अघिल्लो वर्ष नै विभिन्न फिल्म फेस्टिभलमा प्रदर्शित फिल्म यो वर्ष सबैको लागि रिलिज गरिएको हो ।

अघिल्ला वर्ष केही फिल्म फेस्टिभलमा देखाएर यो वर्ष रिलिज गरिएको अ डेथ ईन गञ्जले पारिवारिक बिदामा गएको एउटा परिवारको सुखद् र दु:खद् कथा भन्छ । परिवारसँगै बिदा मनाउन एक पुरानो शहर पुगेका विद्यार्थी श्यामलको कथामा केन्द्रित छ फिल्म । जहाँ लजाजु श्यामलको वास्तविकताबारे परिवारले थाहा पाउँछ ।

आयुष्मान खुराना र भूमी पाड्नेकर अभिनित चलचित्र शुभ मंगल सावधान कमेडी फिल्म हो जुन सेप्टेम्बरमा रिलिज भएको थियो । बिवाहको लागि तयार भएका एक जोडीको कथा भन्ने फिल्मले यौनसम्बन्धी समस्या भागेको पुरुषको फरक खाले बिषय बोकेको छ । फिल्मले समीक्षकबाट राम्रो प्रतिक्रिया पाउनुका साथै बक्स अफिसमा पनि राम्रो आन्दानी गरेको थियो ।

रोमान्टिक कमेडी बरेलीकी बर्फीले दुई युवक र एक युवतीको त्रिकोणीय प्रेमबारे बोल्छ । आफूलाई वास्तविक अवस्थामै स्वीकार्ने अड्डी कसेकी बिट्टी (क्रिति सनोन) लाई मन पर्ने एक लेखकको खोजीमा हुने आरोहअवरोह र त्यसपछिको द्वन्द्वमा फिल्म घुमेको छ । फिल्ममा विशेषत: राजकुमार राओको अभिनय प्रशंसनीय छ ।

राजकुमार राओ अभिनित ट्र्याप्ड अघिल्लो वर्ष नै विभिन्न फेस्टिभलमा प्रदर्शन भएर समीक्षकबाट राम्रो प्रतिक्रिया पाएको थियो । यो फिल्मले आफ्नो प्रेमीसँग भाग्न तयारी गरेको बखत एउटा कोठामा बन्धक बनेका युवकको कथा भन्छ । फिल्मले बन्धक बनेका युवक (राजकुमार राओ) को संघर्ष र त्यसबाट मुक्त भएपछि उसले महशुस गरेको वास्तविकलाई समेटेको छ । यो वर्ष यही वर्ष सबैका लागि रिलिज भएको हो ।

आधुनिक शिक्षामा देखिएको विकृतिमा आधारित रहेर तयार पारिएको हिन्दी मिडियम अहिलेका मध्यमवर्गीय अभिभावकको साझा मनोविज्ञान हो । इरफान खान र सबा कमारको जीवन्त अभिनयले फिल्मलाई उत्कृष्ट बनाएको छ नै यसको बिषयवस्तुले पनि यसको ओजन बढाएको छ । यो हरेक अभिभावकले हेर्नेपर्ने फिल्ममा पर्छ । समीक्षकको राम्रो प्रतिक्रियासहित यसले बक्स अफिसमा पनि राम्रो आम्दानी गर्‍यो ।

कम बजेटमा बनाइएको आमिर खान अभिनित सेक्रेट सुपरस्टारकी स्टार जायरा वासिम हुन् । आमिर र किरण राओ निर्मित फिल्मले एक मुस्लिम युवतीको कथा भन्छ जो आफ्नो प्रतिभा प्रस्फुटनको लागि लुकेर गीत गाउँछिन् । पारिवारिक समस्याबाट गुज्रिएकी उनले कसरी आफ्नो लक्ष्य भेट्टाउँछिन् ? यही बिषय र प्रस्तुतिले फिल्म समीक्षकको प्रिय बनेको छ । सामान्य बिषयमा संवेशनशील फिल्म छ, यो ।

अनारकली अफ आरा एक डान्सरले आफ्नो अस्तित्व रक्षाका लागि गरेको संघर्षको कथा हो । सत्य कथामा आधारित भनिएको फिल्ममा एक डान्सर (स्वारा भास्कर) आराको एक विश्वविद्यालयको रजत महोत्सवमा नाच्ने कथाबाट सुरु हुन्छ । उक्त विश्वविद्यालयका उपकुलपतिसँगको उक्त डान्सरको द्वन्द्वबाट कथा अघि बढ्छ । एक डान्सरले आफूभन्दा शक्तिशालीसँग कसरी टक्कर लिन सक्छिन् ? यही बिषयमा फिल्म केन्द्रित छ । यसको केही सामग्रीमा विवाद भएपनि समीक्षकबाट यसले राम्रो प्रतिक्रिया पाएको छ ।

अक्षयकुमार र भूमि पाडनेकर अभिनित ट्वाइलेट : एक प्रेम कथाले भारतमा विकराल समस्याको रुपमा रहेको शौचालयको बिषयबारे बोल्छ । अक्षयकुमार र भूमि पाडनेकरले एक नवविवाहित दम्पतिको रुपमा शौचालय अभावमा के दु:ख झेल्छन् ? यही बिषयमा फिल्म बनेको छ । फिल्मले भारतीय समाजको एउटा अन्धविश्वासमाथि चोटिलो प्रहार गरेकाले यसलाई समीक्षकले सकारात्मक सन्देशसहितको उत्कृष्ट फिल्मको रुपमा प्रशंसा गरेका छन् ।