शर्मिलाको ‘सालैजो’

कान्तिपुर संवाददाता

कास्की — लोक तथा दोहोरी गायिका शर्मिला गुरुङ बुधबार कास्कीको पर्यटकीय गाउँ छोम्रोङमा भेटिइन् । अन्नपूर्ण सेन्चुरी पर्यटन समितिले गरेको ल्होसार मेलामा प्रस्तुति दिन उनी छोम्रोङ आइपुगेकी हुन् । गुरुङ समुदायको मुख्य पर्व ल्होसारमा हुने सांस्कृतिक कार्यक्रममा सहभागी हुन यतिखेर लोक तथा दोहोरी कलाकारलाई भ्याइनभ्याइ छ ।

कास्कीको पर्यटकीय गाउँ छोम्रोङमा बुधबार राति प्रस्तुति दिँदै लोकदोहोरी गायिका शर्मिला गुरुङ । 

एक साताअघि पोखरा आइपुगेकी गायिका गुरुङ पुस १७ सम्म व्यस्त हुनेछिन् । ‘ल्होसारमा हुने मेला महोत्सवमा पुग्न हामीलाई भ्याइनभ्याइ छ,’ उनले भनिन्, ‘आयोजकले माया मानेर बोलाएको ठाउँमा सकेसम्म पुग्ने गरेको छु ।’ उनी छोम्रोङ पनि एक दिन पैदलयात्रा गरेर पुगेकी हुन् । छोम्रोङमा उनले आºना आधा दर्जन नयाँ एवं पुराना गीत प्रस्तुत गरिन् । ‘राम्दी पुल..’, ‘राधा..’, ‘सालैजो..’ लगायत गीतबाट उनले छोम्रोङबासीलाई भरपुर मनोरञ्जन प्रदान गरिन् । गायक सुरेन्द्र गुरुङसँको दोहोरीबाट उनले दर्शकलाई नचाइन् । गायिका दूर्गा गुरुङ, गण्डकी तारा ओम गुरुङ, गायिका लक्ष्मी बानियाँ, गायक नरबहादुर राना, निश्चल थापा, हितु गुरुङले पनि आफ्ना लोक तथा दोहोरी गीत प्रस्तुत गरे ।

Yamaha

कास्कीको पर्यटकीय गाउँ छोम्रोङ यतिखेर ल्होसारले उत्सवमय बनेको छ । गुरुङ समुदायको मुख्य पर्व ल्होसार मनाउन पोखरा, काठमाडौंलगायत सहरबाट यहाँका स्थानीय गाउँ फर्केका छन् । अन्नपूर्ण सेन्चुरी पर्यटन महोत्सवको दोस्रो चरणअन्तर्गत गुरुङ गाउँ छोम्रोङमा ल्होसार मेला चलिरहेको छ । पुस १० गतेबाट मेला सुरु भएको हो । यस वर्ष च्यल्हो (चरा वर्ग) को बिदाइ र खिल्हो (कुकुर वर्ग) को स्वागतमा गुरुङ समुदायले ल्होसार मनाउँछन् । पुस १५ सम्म चल्ने मेलामा विविध सांस्कृतिक कार्यक्रम छन् । यसअघि असोज २५ मा अन्नपूर्ण आधार शिविरमा कार्यक्रम गरी अन्नपूर्ण सेन्चुरी पर्यटन महोत्सव शुभारम्भ गरिएको थियो । महोत्सवको समापन भने जुन ३ अर्थात् अन्नपूर्ण आरोहण दिवस (अन्नपूर्ण डे) को अवसरमा घान्द्रुकमा हुने छ । अन्नपूर्ण सेन्चुरी पर्यटन समितिको आयोजना, अन्नपूर्ण गाउँपालिका र पर्यटन व्यवस्थापन उपसमिति छोम्रोङको व्यवस्थापनमा महोत्सव भएको हो । महोत्सवका संयोजक ललित गुरुङले सबै मौसममा अन्नपूर्ण पदयात्रा मार्ग उपयुक्त पर्यटकीय गन्तव्य भएको सन्देश दिन तीन चरणमा कार्यक्रम गरेको बताए ।

Esewa Pasal

प्रकाशित : पुस १४, २०७४ ०८:३५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

गति लिँदै औषधि लिमिटेड

फातिमा बानु

काठमाडौँ — गत वैशाखदेखि जीवनजल उत्पादन गरेर पुनर्जन्म लिएको नेपाल औषधि लिमिटेडले अब सिटामोल बजारमा ल्याएर गति लिने भएको छ ।

लामो समयदेखि आर्थिक स्रोत–साधनको अभाव र व्यवस्थापकीय कमजोरीको कारण ६ वर्षसम्म बन्द कम्पनी गत वैशाखदेखि मात्रै पुन: सञ्चालनमा आएको हो ।
कम्पनीले आउँदो माघदेखि सिटामोल उत्पादन गर्ने तयारी पूरा गरेको छ । माघबाटै सिटामोल बजारमा लैजाने तयारी भएको लिमिटेडका महाप्रबन्धक डा. रोभसकुसुम सुवेदीले बताए । ‘सम्पूर्ण तयारी पूरा भएको छ, भारतबाट दुईवटा उपकरण मगाएका छौं, उपकरण आउनेबित्तिकै औषधि उत्पादन भइहाल्छ,’ सुवेदीले भने ।
उत्पादित सिटामोललाई देशभर सस्तो मूल्यमा बेचिने कम्पनी सञ्चालक समिति सचिव टीकाराम अर्यालले बताए । ‘औषधिको मूल्य एक रुपैयाँ तोकिनेछ, औषधि सातै प्रदेशमा पुर्‍याइनेछ,’ उनले भने । पहिलो चरणमा १ लाख २० हजार टयाबलेट सिटामोल उत्पादन गरिने अर्याल बताउँछन् । ‘यसका लागि कच्चा पदार्थ, बजेट र जनशक्ति सबै तयार छ,’ उनले भने । सिटामोलका साथै कम्पनीले बजारमा धेरै खपत हुने १५ थरीका एन्टिबायोटिक औषधि उत्पादन गर्ने तयारी गरिरहेको प्रशासन प्रमुख ज्ञानीबहादुर रायमाझीले बताए ।
औषधिका लागि कम्पनीले टयाबलेट उत्पादन इकाईको पुरानो भवनसमेत पुनर्निर्माण गरिरहेको छ । पुरानो कारखाना भवन पनि रङरोगन गरिएको छ, झयालढोका मर्मतसम्भार गरी व्यवस्थित पारिएको छ । ‘पहिले काठका झयाल ढोका थिए, अब विश्व स्वास्थ्य संगठनको मापदण्डअनुरूप अल्मुनियमको संरचना बन्दै छ,’ अर्यालले भने ।
कम्पनीले २८ प्रकारका अत्याधुनिक उपकरणसमेत भित्र्याएर जडान गरिसकेको छ । पुरानो प्रयोगशालाको स्वरूप परिवर्तन गरिएको छ, प्रयोगशाला कुशल सञ्चालनका लागि दक्ष जनशक्तिसमेत नियुक्त गरिएको सुवेदी बताउँछन् । अब विश्व स्वास्थ्य संगठनको मापदण्डअनुरूपको संरचना र औषधिका लागि कम्पनीलाई अर्थ मन्त्रालयले १४ करोड बजेट निकासा गरेको छ । ‘पहिलो चरणमा ६ करोड ४८ लाख दिएको छ, यही बजेटबाट काम भइरहेको छ,’ रायमाझीले भने ।
विगतमा औषधिमा आत्मनिर्भर हुने उद्देश्यले कम्पनीबाट १ सय २० प्रकारका औषधि उत्पादन गरिन्थ्यो । विश्व स्वास्थ्य संगठनको औषधि उत्पादन मापदण्ड पूरा गर्न नसकेकाले २०६० सालमा औषधि उत्पादन बन्द गरिएको थियो । अब कम्पनी यसै वर्षभित्र संगठनबाट गुणस्तर प्रमाणपत्र प्राप्त गर्न लागेको सुवेदीले बताए । ‘यसका लागि गुणस्तर नियन्त्रण शाखा नै खोलेका छौं, अनुसन्धान कार्यलाई पनि तीव्र पारिनेछ,’ उनले भने ।
कम्पनीले निजीस्तरका औषधि उत्पादक उद्योगसँग प्रतिस्पर्धा गर्न सक्ने महत्त्वाकांक्षी योजना अघि सारेको छ । कम्पनीका अध्यक्ष लक्ष्मीराज पाठकले भन्छन्, ‘सरकारले नि:शुल्क रूपमा दिने ७० प्रकारका औषधिका लागि निजी उद्योगमा भर पर्नुपर्ने अवस्था छ, अब यस्ता समस्या समाधान हुनेछन् ।’
कम्पनीले गत वैशाखदेखि सुरु गरेको जीवनजलको उत्पादनलाई निरन्तरता दिइरहेको रायमाझीले जानकारी दिए । कम्पनीमा हाल एकपटकमा ४० प्याकेट जीवनजल उत्पादन गर्न सक्ने दुइटा उपकरण छन् । मागअनुसारको जीवनजल उत्पादनका लागि डेढ करोड लगानीमा कम्पनीले नयाँ उपकरणसमेत जडान गरिसकेको छ । ‘यसबाट एकपटकमा ६० प्याकेट जीवनजल उत्पादन गर्न सकिन्छ,’ रायमाझीले भने ।

प्रकाशित : पुस १४, २०७४ ०८:३०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT