‘पार्किन्सन्सलाई जित्न हाँसेर काम गर्नुस्’

कान्तिपुर संवाददाता

काठमाडौँ — हाल छायांकन भइरहेको फिल्म ‘शत्रु गते’ मा हास्यकलाकार हरिवंश आचार्यले मदनकृष्णलाई अनौठो भूमिका दिएका छन् । मदनकृष्णले युवतीको कम्मर समाएर नाच्नुपर्ने दृश्य छ । यस्तो अभिनय गर्न मदनकृष्णलाई असहज लाग्छ । तर, हरिवंशले यस्तै रोल दिए ।

राजधानीमा बिहीबार ‘लिभिङ विथ पार्किन्सन्स डिजिज’ डकुमेन्ट्री प्रदर्शनका क्रममा सहभागी ।

पार्किन्सन्सका बिरामी मदनकृष्णसित मुहारमा हाँसो नहुँदा पनि हाँसो निकालेर उमंगका साथ सुटिङ पूरा गरेको अनुभव छ । शरीर कमजोर हुने, अनुहार डाउन हुने, खुसी हराउने पार्किन्सन्स रोगको संकेत हो । ‘पार्किन्सनले हाँस्न दिँदैन,’ एउटा डकुमेन्ट्रीमा उनले भनेका छन्, ‘म चाहिँ हाँसेरै काम गरिरहेको छु ।’

Yamaha

राजधानीको भृकुटीमण्डपस्थित पर्यटन बोर्डको हलमा बिहीबार पार्किन्सन्स बिरामीसम्बन्धी डकुमेन्ट्री प्रदर्शन गरिएको थियो, जसमा विभिन्न बिरामीमध्ये मदनकृष्णले रोगसम्बन्धी दिएको अनुुभूति संवेदनशील थियो । वनिता खनालले बनाएको ‘लिभिङ विथ पार्किन्सन डिजिज’ डकुमेन्ट्रीलाई सचेतनाका लागि इन्फ्ल्युएन्सर्स नेपालले प्रदर्शन गरेको हो ।
डकुमेन्ट्रीमा पार्किन्सन्सका साहसी बिरामीहरूको अनुभव समेटिएको छ । मदनकृष्णले आफूलाई रोग लागेको सुरुवातदेखि अप्रेसन गरेको अवस्थासम्मका कथाव्यथा सुनाएका छन् । उनले पार्किन्सन्सका बिरामीलाई चिन्तित नभई आत्मविश्वासका साथ काममा सक्रिय हुन सुझाएका पनि छन् । अप्रेसनपछि नै उनले आत्मकथा ‘महको म’ प्रकाशन गरेको र कार्यक्रमका लागि युरोप, अमेरिका लगायत डुलेको अनुभव अर्थपूर्ण लाग्छ । पार्किन्सन्सले कमजोर अनुभूति गराए पनि आफू चाहिँ आत्मविश्वास बढाएर काममा निरन्तर लागेको उनले अनुभव थियो ।
पार्किन्सन्सका प्रेरक बिरामीमध्ये तिलकबहादुर सापकोटा पनि हुन् । छ वर्षदेखि रोगले ग्रस्त उनी होटल म्यानेजमेन्ट पढाउँछन् । उनी दैनिक एक घण्टा बिहानबेलुका व्यायाम गर्छन् । जसरी हुन्छ, आफूलाई काममा व्यस्त राख्छन् । उनको त्यही आत्मविश्वासका कारण स्कुटर चलाएर यात्रासमेत गर्न सक्ने डकुमेन्ट्रीमा खुलाइएको छ । पार्किन्सन्सका रोगीलाई सहानुभूति नभई सहायताको खाँचो रहेको उनले डकुमेन्ट्रीमा बताएका छन् ।
डकुमेन्ट्रीमा पार्किन्सन्स रोग लागेपछि कसरी बलियो बन्ने, समाजमा कसरी स्थापित हुने र डाक्टरको सल्लाहलाई कसरी शिरोपर गर्ने जस्ता महत्त्वपूर्ण सन्दर्भ समेटिएको छ । डकुमेन्ट्रीमा न्युरोलजिस्ट डा. बाबुराम पोखरेलले ६० वर्षभन्दा बढी उमेरका एक प्रतिशत मान्छेलाई पार्किन्सन्स रोग लाग्न सक्ने सम्भावना उल्लेख गरेका छन् ।

प्रकाशित : पुस १४, २०७४ ०८:३६
प्रतिक्रिया
पठाउनुहोस्
ADVERTISEMENT

शर्मिलाको ‘सालैजो’

कान्तिपुर संवाददाता

कास्की — लोक तथा दोहोरी गायिका शर्मिला गुरुङ बुधबार कास्कीको पर्यटकीय गाउँ छोम्रोङमा भेटिइन् । अन्नपूर्ण सेन्चुरी पर्यटन समितिले गरेको ल्होसार मेलामा प्रस्तुति दिन उनी छोम्रोङ आइपुगेकी हुन् । गुरुङ समुदायको मुख्य पर्व ल्होसारमा हुने सांस्कृतिक कार्यक्रममा सहभागी हुन यतिखेर लोक तथा दोहोरी कलाकारलाई भ्याइनभ्याइ छ ।

कास्कीको पर्यटकीय गाउँ छोम्रोङमा बुधबार राति प्रस्तुति दिँदै लोकदोहोरी गायिका शर्मिला गुरुङ । 

एक साताअघि पोखरा आइपुगेकी गायिका गुरुङ पुस १७ सम्म व्यस्त हुनेछिन् । ‘ल्होसारमा हुने मेला महोत्सवमा पुग्न हामीलाई भ्याइनभ्याइ छ,’ उनले भनिन्, ‘आयोजकले माया मानेर बोलाएको ठाउँमा सकेसम्म पुग्ने गरेको छु ।’ उनी छोम्रोङ पनि एक दिन पैदलयात्रा गरेर पुगेकी हुन् । छोम्रोङमा उनले आºना आधा दर्जन नयाँ एवं पुराना गीत प्रस्तुत गरिन् । ‘राम्दी पुल..’, ‘राधा..’, ‘सालैजो..’ लगायत गीतबाट उनले छोम्रोङबासीलाई भरपुर मनोरञ्जन प्रदान गरिन् । गायक सुरेन्द्र गुरुङसँको दोहोरीबाट उनले दर्शकलाई नचाइन् । गायिका दूर्गा गुरुङ, गण्डकी तारा ओम गुरुङ, गायिका लक्ष्मी बानियाँ, गायक नरबहादुर राना, निश्चल थापा, हितु गुरुङले पनि आफ्ना लोक तथा दोहोरी गीत प्रस्तुत गरे ।
कास्कीको पर्यटकीय गाउँ छोम्रोङ यतिखेर ल्होसारले उत्सवमय बनेको छ । गुरुङ समुदायको मुख्य पर्व ल्होसार मनाउन पोखरा, काठमाडौंलगायत सहरबाट यहाँका स्थानीय गाउँ फर्केका छन् । अन्नपूर्ण सेन्चुरी पर्यटन महोत्सवको दोस्रो चरणअन्तर्गत गुरुङ गाउँ छोम्रोङमा ल्होसार मेला चलिरहेको छ । पुस १० गतेबाट मेला सुरु भएको हो । यस वर्ष च्यल्हो (चरा वर्ग) को बिदाइ र खिल्हो (कुकुर वर्ग) को स्वागतमा गुरुङ समुदायले ल्होसार मनाउँछन् । पुस १५ सम्म चल्ने मेलामा विविध सांस्कृतिक कार्यक्रम छन् । यसअघि असोज २५ मा अन्नपूर्ण आधार शिविरमा कार्यक्रम गरी अन्नपूर्ण सेन्चुरी पर्यटन महोत्सव शुभारम्भ गरिएको थियो । महोत्सवको समापन भने जुन ३ अर्थात् अन्नपूर्ण आरोहण दिवस (अन्नपूर्ण डे) को अवसरमा घान्द्रुकमा हुने छ । अन्नपूर्ण सेन्चुरी पर्यटन समितिको आयोजना, अन्नपूर्ण गाउँपालिका र पर्यटन व्यवस्थापन उपसमिति छोम्रोङको व्यवस्थापनमा महोत्सव भएको हो । महोत्सवका संयोजक ललित गुरुङले सबै मौसममा अन्नपूर्ण पदयात्रा मार्ग उपयुक्त पर्यटकीय गन्तव्य भएको सन्देश दिन तीन चरणमा कार्यक्रम गरेको बताए ।

प्रकाशित : पुस १४, २०७४ ०८:३५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT