यौन दुर्व्यवहारको आरोपमा फिल्मकर्मी

कान्तिपुर संवाददाता

अस्ट्रेलिया — केही महिनाअघि मात्रै चर्चित कोरियाली निर्देशक किम किदुक एक अभिनेत्रीसितको यौन दुव्र्यवहार काण्डमा फसे । कान्स फिल्म फेस्टिभलमा एउटा र भेनिस फिल्म फेस्टिभलमा चार वटा अवार्ड जितिसकेका किमनलाई एउटा फिल्मको यौनजन्य दृश्यका लागि एक अभिनेत्रीलाई जबरजस्ती दबाब दिएको र हात हालेको आरोप लागेको थियो ।

‘स्प्रिङ, समर, फल, विन्टर...अगेन स्प्रिङ’, ‘थ्री आइरन’, ‘अरिराङ’, ‘पिइटा’, ‘समरितान गर्ल’ जस्ता चर्चित फिल्म दिएका उनको क्रेज अहिले दक्षिण कोरियामा स्वाट्टै घटेको छ ।

अब पालो चर्चित अस्ट्रेलियाली अभिनेता क्रेग म्याकल्याचलनको आएको छ । अस्ट्रेलियाको चर्चित मानिने गोल्ड लोगी अवार्ड विजेता ५२ वर्षे अभिनेतालाई सँगै काम गरेका तीन अभिनेत्रीले यौन दुव्र्यवहारको आरोप लगाएका छन् । यो आरोपले यति बेला मिडिया तताइरहेको छ । सन् २०१४ मा निर्माण भएको चर्चित ‘रकी हरर सो’ को प्रदर्शनका क्रममा आफूहरूलाई म्याकल्याचलनले यौन उत्पीडन र अनुचित कर्म गरेको आरोप अभिनेत्रीहरूको छ । ‘रकी हरर सो’ का कलाकारहरू क्रिस्टी विलन ब्राउन, इरिका हेयनटाज र एन्जेला स्कन्डीले म्याकमाथि त्यस्तो आरोप लगाएका हुन् ।

क्रेगले कडा प्रतिवाद गर्दै आरोप झूटो भएको दाबी गरेका छन् । उनले सबै आरोप बनावटी र आर्थिक फाइदाका लागि गरिएको ठोकुवा पनि गरेका छन् । भिक्टोरिया प्रहरीले यो उजुरीमाथि अनुसन्धान गरिरहेको छ ।

विश्वमा यौन उत्पीडन लगायतको आरोपमा ठूला फिल्मकर्मीहरू पर्दै आएका छन् । केही समयअघि चर्चित अमेरिकी फिल्म निर्माता हार्भी वाइन्सटाइनले समेत यस्तै आरोपको सामना गर्नुपरेको थियो । उनी चर्चित अमेरिकी प्रोडक्सन हाउस मिराम्याक्सका संस्थापकमध्ये एक हुन् ।

प्रकाशित : पुस २६, २०७४ ०८:०३
प्रतिक्रिया
पठाउनुहोस्

डकुमेन्ट्रीमा गोरु जुधाउने मेला

कान्तिपुर संवाददाता

काठमाडौँ — नुवाकोटको तारुकामा सय वर्षदेखि माघे संक्रान्तिका दिन हुँदै आएको गोरु जुधाउने मेलाबारे डकुमेन्ट्री बनेको छ । सामुदायिक सेवा केन्द्र नुवाकोटद्वारा निर्मित ‘गोरु जुधाइ मेला’ डकुमेन्ट्रीको निर्देशन शशी लुमुम्बू र श्रीराम श्रेष्ठले गरेका हुन् ।

अशोककुमार बस्नेत डीओपी रहेको डकुमेन्ट्रीलाई गणेश हुमागाईं र कञ्चन पोखरेल खिचेका हुन् । लुमुम्बूको लेखन रहेको ३० मिनेटको यो डकुमेन्ट्रीमा गोरु जुधाइ जात्राको सुरुवात, ऐतिहासिक पक्ष, गोरु जुधाउने विधि र प्रक्रिया समेटिएका छन् । ‘एउटा रोचक परम्परालाई दृश्यांकन गरी दस्तावेजको रूपमा सुरक्षित गर्न खोजेका हौं,’ लुमुम्बुले भने ।

स्पेनको बुलफाइटको झझल्को दिने गोरु जुधाइ जात्रा तथा मेला तारुकाको मात्रै नभएर नेपालकै ऐतिहासिक र मौलिक परम्परा रहेको अर्का निर्देशक श्रेष्ठले दाबी गरे । मेलाको संरक्षण र जगेर्नामा टेवा पुर्‍याई पर्यटन प्रवद्र्धनका लागि पनि सहयोग पुर्‍याउने उद्देश्यले डकुमेन्ट्री बनाएको उनले बताए ।

प्रकाशित : पुस २६, २०७४ ०८:०३
पूरा पढ्नुहोस्
प्रतिक्रिया
पठाउनुहोस्