पूर्वमा “सर्जमिन”

कथा पुरानै भए पनि दर्शकले मन पराए । नाटक हेरिसकेपछि गोपाल बस्नेत भन्दै थिए, ‘कथा पुुरानै भए पनि यस्तो नियति अहिले पनि कतिपय नेपालीले बेहोरिरहेकै छन् ।’

नाटकको टुंग्याउनीमा धेरै दर्शक भावुक बनेका देखिन्थे । खासमा बिनाअपराध प्रहरीको फन्दामा पर्नुपर्ने मुख्य पात्रको विवशताले दर्शकहरूलाई भित्रैसम्म छुन्छ । परिबन्दमा परेपछि कसरी निर्दोष मान्छे अन्यायमा पर्छ भन्ने कुरा नाटकको मूल विषय हो ।

कथाले राणाकाल र पञ्चायतकालमा हुने न्यायको विसंगति देखाउन खोजे पनि त्यो अहिले उत्तिकै सान्दर्भिक लाग्छ । ‘सर्जमिन’ ले यस्तै परिबन्दको सिकार बन्न बाध्य भएको एउटा निमुखाको पीडादायी कथा बोल्छ । नाटकमा गाउँले परिवेशलाई विश्वसनीय ढंगले प्रस्तुत गरिएको छ ।

‘गरिब र सोझा जनताका पीडा उस्तै रहेको प्रमाण हो यो नाटक,’ नाटकका कलाकार सोमनाथ खनालले भने, ‘कथा पुरानो भए पनि हाम्रो समाजमा यस्तो नियति बेहोर्ने एउटा जमात अझै छ ।’

यसअघि बंगलादेशका पाँच सहरमा मञ्चित ‘सर्जमिन’ मा विकास जोशी, रोहित पौडेल, विनीता गुरुङ, विजय बराल, संयोग गुरागाईं, उमेश तामाङ, रञ्जना वली, सिजन दाहालले अभिनय गरेका छन् ।