‘कान्छीबाट उत्साहित’

दर्शकलाई सम्बोधन गर्न आफूहरू शनिबार राजधानीको गोपीकृष्ण र अष्टनारायण हलमा पुगेको उनले जनाइन् । निर्देशक आकाश अधिकारीसहित कलाकारहरू दयाहाङ राई, प्रज्ज्वल सुजल गिरी पनि दर्शकमाझ पुगेका थिए । दया र श्वेतासँग तस्बिर खिच्न दर्शकहरूले तँछाडमछाड गरिरहेका तस्बिर श्वेताले आफ्नो फेसबुकमा सेयरसमेत गरेकी छन् ।

दिवंगत अभिनेता श्रीकृष्ण श्रेष्ठसँग फिल्मकै क्रममा प्रेमविवाह गरेकी श्वेताको यो पाँचौं फिल्म हो । यसअघि उनले पति श्रीकृष्णसँग ‘कहाँ भेटिएला’ र ‘कोहिनूर’ गरेकी थिइन् । यसबाहेक ‘श्रीमान् श्रीमती’ र ‘हाँसिदेऊ एकफेर’ गरिन् । पति श्रीकृष्णलाई नै समर्पण गरिएको ‘कान्छी’ मा दया र श्वेताको प्रेमकथा समेटिएको छ । दुर्गम हिमाली गाउँमा अस्पताल खोल्न रंगकर्म गरिरहेको एक समूहको संघर्षकै बीच यी दुईले आफ्नो प्रेमलाई अघि बढाएका छन् ।

‘दर्शकको आशीर्वादले कोहिनूरको भन्दा पनि डबल खुसी मिलिरहेको छ,’ श्वेताले भनिन् । दयाले चाहिँ फिल्म हलमा बच्चासँगै अभिभावकको पनि अभिभावक गरी तीन पुस्ताको दर्शक देख्न पाउँदा खुसी मिलेको बताए । शनिबारदेखि राजधानी र मोफसलमा सो बढेर एक सयभन्दा बढी हलमा फिल्म लागेको निर्देशक अधिकारीले दाबी गरे । ‘सबैतिरबाट दर्शकको उत्साहजनक साथ पाइरहेको छ,’ उनले भने । शैलेश खडकासमेत निर्माता रहेको फिल्ममा आशान्त शर्मा, भूमिका श्रेष्ठ, अनु शाहलगायतको अभिनय छ ।