२५ वर्षमा ग्य्रान्ड कन्सर्ट

पछिल्लो समय हाम्रा गीत काउन्ट डाउनमा आएका छैनन्, हामीले अवार्ड पाएका छैनौं तर हाम्रा फ्यानलाई निराश पनि बनाएका छैनौं । - मंगोलियन हार्ट
सजना बराल

काठमाडौँ — यो साल विभिन्न रक, पप ब्यान्डले आफ्नो स्थापना कालको पच्चीसौं वर्ष पूरा गरे । यही अवसरमा ‘नेपथ्य’, ‘मुक्ति एन्द रिभाइभल’, ‘कबवेब’ लगायतले थुप्रै ठाउँमा कार्यक्रम गरिरहेका छन् । यो क्रम आगामी वर्ष पनि जारी रहने संकेत देखिएको छ ।

२०७५ को प्रारम्भमै लोक–पप ब्यान्ड ‘मंगोलियन हार्ट’ ले आफ्नो रजत जयन्ती मनाउँदै छ ।


वैशाख ८ गते चुच्चेपाटीस्थित ह्यात ग्राउन्डमा ‘ग्य्रान्ड लाइभ इन कन्सर्ट’ गर्न लागेको ब्यान्डका गिटारिस्ट बबी लामाले जनाए । पच्चीस वर्ष पुगेको सन्दर्भमा कन्सर्टको टिकट दर पनि २५ रुपैयाँ मात्र राखेको उनले बताए । ‘यो हाम्रो सेलिबरेसन हो,’ उनले भने, ‘यसबाट पैसा कमाउने उद्देश्य छैन । जति रकम उठ्छ, सबै टुसाल युवा क्लबलाई दिन्छौं ।’ कन्सर्टको तयारी पूरा भइसकेको उनले बताए ।

Yamaha


ब्यान्डका भोकलिस्ट राजु लामा अमेरिकामा छन् । ब्यान्डको विज्ञप्तिमा उनले आफूहरूलाई यतिन्जेल माया र साथ दिने शुभचिन्तकसँग खुसियाली साट्न चाहेको उल्लेख गरेका छन् । ‘हाम्रा श्रोता र शुभचिन्तकसँग खुसी बाँड्न चाहन्छौं,’ उनले भनेका छन्, ‘स्थापना कालदेखि नै हामीलाई सबैले माया गर्दै आउनुभएको छ । उहाँहरूलाई धन्यवाद दिन खोजेका हौं ।’ राजु यही साता स्वदेश फर्किंदै छन् ।


सन् १९९२ मा स्थापना भएयता ब्यान्डले ६ वटा एल्बम निकालेको छ । कन्सर्टमा सातौं एल्बम लन्च गर्ने बबीले बताए । संस्थापक सदस्य उनी गएको एक दशकदेखि ब्यान्डको व्यवस्थापन पनि सम्हालिरहेका छन् । उनलाई सन् २००४ आफूहरूको गोल्डेन डेज लाग्छ । ‘त्यो साल हाम्रो चौथो एल्बम निस्किएको थियो,’ उनी भन्छन्, ‘सीडीमा निकालेको एल्बम भयानक बिक्री भयो । म्युजिक नेपालले दुई वर्ष लगातार बेस्ट सेलिङ एल्बम अफ द इयर अवार्ड हामीलाई दियो ।’


त्यसको दुई वर्षपछि चाहिँ मंगोलियन हार्टले दुर्दशा खेप्यो । ६ मध्ये चार सदस्यले ब्यान्ड छोडेका थिए । राजु र बबी मात्र बाँकी रहे । बबीलाई ब्यान्ड जोगाउनुपर्छ भन्ने लाग्यो, उनी सदस्य खोज्न थाले । अन्तत: नयाँ टोली निर्माण भयो । त्यसमा किरण नगरकोटी, सन्तोष थापा र पवन कपाली थपिए । पाँच सदस्यीय ब्यान्डका रूपमा उनीहरू अघि बढे, अझै यही लाइन–अप सक्रिय छ । किरण लिड गिटार, सन्तोष ड्रम्स र पवन बेसमा छन् ।


सन्तोषलाई ब्यान्डभित्रको हालको एकता नै यसको मजबुत पक्ष हो भन्ने लाग्छ । फ्रन्टम्यानका रूपमा राजुले गरेको व्यवहार उनी राम्रो मान्छन् । ‘ऊ एकदम केयरिङ छ,’ ड्रमर सन्तोषले भने, ‘हाम्रो पर्सनल र अफिसियल दुवै कुरामा ध्यान दिने बानी राम्रो छ ।’ बबी पनि आफूहरूको नेतृत्वकर्ता (लिडर) बलियो रहेको बताउँछन् । देशबाहिर रहे पनि उनले वर्षको चार/पाँच पटक स्वदेशमै ठूला कन्सर्ट गरिरहेको सन्तोषको भनाइ छ ।


‘पछिल्लो समय हाम्रा गीत काउन्ट डाउनमा आएका छैनन्, हामीले अवार्ड पाएका छैनौं तर हाम्रा फ्यानलाई निराश पनि बनाएका छैनौं,’ सन्तोष भन्छन्, ‘कन्सर्ट वा अन्य समारोहमा भेट हुने जो–कोहीले हाम्रा गीत र प्रस्तुतिहरू राम्रो लागेको प्रतिक्रिया दिने गर्नुभएको छ ।’ लोक–पप विधामा अडिग रहेर यहाँसम्म आइपुग्नुलाई ब्यान्ड मेम्बरले खुसीको कुरा मानेका छन् । ‘यो विधा स्थापित गराउन हाम्रो पनि कुनै न कुनै भूमिका रह्यो होला,’ बबी भन्छन्, ‘मेलोडीमा प्रयोग गरिरहँदा हामीले लोक स्वाद कहिल्यै छोडेनौं ।’


ब्यान्डका करिब एक सय गीत बाहिर निस्किएका छन् । राजुले व्यक्तिगत रूपमा योभन्दा बढी गाएका छन् । मंगोलियन हार्टका विभिन्न भोल्युममा समावेश भएका ‘उँभो–उँभो खासा...’, ‘तिमीलाई देखेर...’, ‘सायद तिम्रो बाटोमा...’, ‘मेरो नेपाल...’, ‘नतानूँ त तानूँ लाग्ने...’, ‘गाजलु टीका...’, ‘पर्खाइमा भिज्यो सिरानी...’, ‘हल्ला चलेछ...’, ‘लाखौं कोसिस गर्दा पनि...’ जस्ता दर्जनौं गीत चर्चित छन् । ब्यान्डले कान्तिपुर एफएम अवार्ड, इमेज अवार्ड आदि पाइसकेको छ ।

प्रकाशित : चैत्र २८, २०७४ ०९:३३
ADVERTISEMENT
प्रतिक्रिया
पठाउनुहोस्
ADVERTISEMENT

मुख्य न्यायाधिवक्ताको अधिकार थप्न माग

कान्तिपुर संवाददाता

धनुषा — सरकारले ल्याएको मुख्य न्यायाधिवक्ताको काम–कर्तव्य र अधिकार समेटिएको विधेयकमाथि प्रदेशसभामा छलफल भएको छ । विधेयक आइतबार प्रदेशसभामा पेस गरिएको थियो ।मुख्यमन्त्री मोहमम्द लालबाबु राउतले मंगलबारको बैठकमा विधेयकमाथि छलफलका लागि प्रस्ताव पेस गरेपछि सांसदले समर्थन जनाए ।

राष्ट्रिय जनता पार्टी (राजपा) नेपालका सांसद मनिषकुमार सुमनले विधेयकमा मुख्य न्यायाधिवक्ताको कार्यालय, कर्मचारी र अधिकारमा सुधार गर्नुपर्ने सुझाव दिए । मुख्य न्यायाधिवक्ता कार्यालयमा करारका कर्मचारी नियुक्त गर्न पाउनुपर्ने प्रावधानको उनले बिरोध जनाए ।

‘करार नभई स्थायी कर्मचारी नियुक्त गर्नुपर्छ, मुख्य न्यायाधिवक्तालाई अनुगमनसहित कार्यान्वयन गराउने अधिकारसमेत दिनुपर्छ,’ सुमनले भने, ‘मुख्य न्यायाधिवक्ताले प्रहरीको प्रमाणलाई मात्र अधार मान्नु उपयुक्त हुँदैन ।

आफैं पनि प्रमाण संकलन गर्ने अधिकार पाउनुपर्छ ।’ सरकारवादीसहित सबैखाले झूटा मुद्दा फिर्ता लिन सक्ने अधिकारसमेत मुख्य न्यायाधिवक्तालाई दिनुपर्ने माग गर्दै उनले मुख्य न्यायाधिवक्ताले गल्ती गरे दण्डसजायको व्यवस्था पनि हुनुपर्नेमा जोड दिए ।

सांसद बाबुलाल साह कानुले सरकार र प्रदेश सञ्चालनका लागि मुख्य न्यायाधिवक्ता विधेयक आवश्यक रहेको बताए । नेपाली कांग्रेसका सांसद गोबिन्दबहादुर न्यौपानेले विधेयकमा मुख्य न्यायाधिवक्ता र अन्य कर्मचारीको योग्यता खुलाउन सुझाव दिए । माओवादी केन्द्रका सांसद रामचन्द्र मण्डलले मुख्य न्यायाधिवक्तालाई उच्च अदालतको मातहत राख्नुपर्ने तर्क गरे ।

काग्रेसका सांसद शेष रसीद अलिले विधेयकलाई समर्थन गर्दै संघियता टिकाउन प्रदेश सरकारको गति बढाउनुपर्ने बताए । कांग्रेसकै अर्की सांसद गिताकुमारी यादले जघन्य अपराध अनुसन्धानमा मुख्य न्यायाधिवक्तालाई अधिकार दिनुपर्ने बताइन् । सांसदले उठाएका प्रश्नको जवाफ दिँदै मुख्यमन्त्री राउतले विधेयक महान्यायाधिवक्ताको कार्यालयले पठाएका कारण आफुअनुकूल ल्याउने स्वतन्त्रता नरहेको बताए ।

समामुख सरोजकुमार यादवले प्रदेशसभामा सर्वसम्मत स्वीकृत विधेयक संशोधनका लागि ७२ घण्टा समय दिएका छन् । प्रदेशसभाको बुधबार ११ बजे बस्ने बैठकमा नीति तथा कार्याक्रम पेस गरिँदै छ । प्रदेश प्रमुख रत्नेश्वरलाल कायस्थले प्रदेशको नीति तथा कार्यक्रम वाचन गर्नेछन् । यता, सरकारले आर्थिक कार्यविधि विधेयक प्रमाणीकरणका लागि मंगलबार प्रदेश प्रमुख कायस्थसमक्ष बुझाएको छ ।

‘शान्ति–सुरक्षाप्रति गम्भीर’
बैठकको विशेष समयमा बोल्दै आन्तरिक कानुन तथा मामिला मन्त्री ज्ञानेन्द्र यादवले प्रदेशको सुरक्षा अवस्थाबारे जानकारी गराए । ‘प्रमुख जिल्ला अधिकारी र प्रहरी प्रमुख संघीय सरकारको मातहत रहेकाले शान्तिसुरक्षा तथा अन्य गतिविधिबारे प्रदेश सरकारलाई जानकारी गराउन मानेका छैनन्, उनले भने, ‘शान्ति सुरक्षाका लागि सरकार गम्भिर छ ।’

सरकार गठनपछि ८ जिल्लामा ४ विस्फोट, २ गोली प्रहार, ३२ सवारी दुर्घटना, ५५ महिला हिंसा र ३७ बलात्कारका घटना भएको र अधिकांश घटनामा अनुसन्धान गरिएको उनले जानकारी गराए । आइतबारको बैठकमा सांसदहरूले प्रदेशको शान्ति–सुरक्षा बिग्रेको भन्दै सरकारको आलोचना गरेका थिए । मन्त्री र कर्मचारीलाई सशस्त्र समूहबाट आएको धम्कीबारे सरकार गम्भीर रहेको मन्त्री यादवले जानकारी गराए ।

प्रकाशित : चैत्र २८, २०७४ ०९:३३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT