यस्तो छ सलमान खानको लभ स्टोरी

कान्तिपुर संवाददाता

काठमाडौँ — सलमान खान बलिउडका ‘मस्ट इलिजिबल ब्याचलर’ हुन् । उनले बलिउडमा तीन दशक बिताइसकेका छन् ।

बलिउडमा उनको धेरै गसिप हुन्छ। सलमानको करिअरमा लभ, अफेयर, धोका र स्क्याण्डल सँगसँगै आउने कुरा हुन्। सलमानको जीवन एउटा खुल्ला किताब जस्तै छर्लङ्ग छ।

५२ वर्षीय यी स्टारले आधा दर्जनभन्दा बढि महिलाहरुसँग लभ र रोमान्स गरे। तर, उनकाे लभ लाइफ किहल्यै सक्सेस भएन। फिल्म दुनियाँमा उनी सुपरहिट भएपनि प्रेमको मामला उनी सधैँ ‘फ्लप’ भए। सलमानको जीवनमा मिस इण्डिया देखि विश्व सुन्दरीसमेत आए।

सन् १९८० की मिस इण्डिया संगिता भिज्लानीसँग सलमान खानको प्रेम सम्बन्ध थियो। सन् १९९० को दशकमा उनीहरुबीचको प्रेम सम्बन्ध टुट्याे।

सोमी अली:
१९ वर्षको उमेरमा बलिउडमा डेब्यू गरेकी सोमी अली र सलमान खानको पहिलो भेट सन् १९९३ मा भएको थियो। द हिन्दुस्तान टाइम्सका अनुसार सलमानको अत्याधिक मदिरा सेवन र अरुलाई अपमान गर्ने बानीबाट दिक्क लागेर अलीले सन् १९९९ मा सलमानलाई छाडेकी थिइन्।

ऐश्वर्या राय:
बलिउडमा सलमान खान र सन् १९९४ की विश्व सुन्दरी ऐश्वर्या रायको ब्रेक अप कहिल्यै सेलाएन, सधैँ चर्चामै रहन्छ।
सञ्जयलीला भनसालीको ‘हम दिल दे चुके सनम’ फिल्मको सुटिङको क्रममा सलमान र ऐश्वर्याबीच प्रेमको अंकुरण भएको थियो। ऐश्वर्याको परिवारले सलमानसँगको सम्बन्धलाई रुचाएको थिएन। सलमानले ऐश्वर्यासँग बिहे गर्न मरिहत्ते गर्थे। त्यसबेला ऐश्वर्याले विवाह गर्ने मनिस्थितिमा थिइनन्। उनी आफ्नो करिअरमा केन्द्रित थिइन्। आफुलाई शारिरीक यातना दिएको भन्दै ऐश्वर्याले सलमानमाथि आरोप लगाउँदै सन् २००२ मा दुवैको सम्बन्धमा ब्रेक लागेको थियो।
ब्रेकअप पछि सलमानले ऐश्वर्याको करिअरलाई खत्तम पार्न खोजेका थिए। ऐश्वर्याको सुटिङ स्थलसम्म पुगेर सलमानले हंगामा मच्चाउने गर्थे। सुटिङकै विषयलाई लिएर सलमानले शाहरुख खानसँग झगडा गरेको समाचारहरु आएका थिए।ऐश्वर्याले सन् २००७ मा अभिषेक बच्चनसँग विवाह गरिन्।

स्नेहा उलाल:
ऐश्वर्या रायसँगको ब्रेकअप पछि सलमानको नाम १८ वर्षीया नायिका स्नेहा उलालसँग जोडियो। स्नेहा र सलमान दुवैले ‘लक्की’मा अभिनय समेत गरे। उनीहरुको सम्बन्ध धेरै समयसम्म टिकेन। स्नेहा तलेगु फिल्म उद्योगमा सक्रिय छिन्।

कट्रिना कैफ:
भनिन्छ, कट्रिना कैफलाई बलिउडमा स्थापित गराउन सलमानको ठूलो भूमिका छ। डेब्यू फिल्म ‘बुम’बाट जम्न नसकेपछि कट्रिनाले सलमानसँग सहयोग मागिन्। सन् २००५ मा उनीहरु ‘मेनेँ प्यार क्यूँ किया’मा सँगै देखिए।
त्यसपछि कट्रिनाले बलिउडमा पछि फर्कनु परेको छैन। उनीहरुको प्रेम सम्बन्ध सन् २०१० मा टुंगिएको द हिन्दुस्तान टाइम्सले उल्लेख गरेको छ। दुवैले एकअर्काको सम्बन्धबारे मिडियामा लुकाएपनि पापराचीहरुले उनीहरुलाई धेरै पटक सँगसँगै भेटाएका थिए।

क्लउडीया सेइस्ला:
सलमान र कट्रिनाको सम्बन्ध टुट्नुको कारण जर्मन मोडल क्लउडीया सेइस्ला रहेको बताइन्छ। सलमानले आफ्नो घरमा सेइस्लालाई परिचय गराउन लागेका थिए। यही विषयलाई लिएर सलमान र कट्रिनाको ब्रेकअप भएको भारतीय मिडियाहरुको दाबी छ। क्लउडीया फिल्महरुमा सानो भूमिका निर्वाह गर्छिन्।

जरिन खान:
सन् २०१० मा सलमान र जरिन दुवैले ‘वीर’मा अभिनय गरेका थिए। दुवै राती अवेरसम्म पार्टीहरुमा देखिन्थे। जरिन, कट्रिना जस्तो देखिन्छिन्। मडियामा जरिनले सलमानसँगको रोमान्सलाई इन्कार गरेकी थिइन्।

महेक चाहेल:
सन् २००७ मा सलमानको ब्लकबस्टर फिल्म ‘वान्टेड’ मा चाहेलले अभिनय गरेकी थिइन्। सलामानले सञ्चालन गर्ने रियालिटी शोमा समेत उनले भाग लिइन। शोमा सलमानले महेकलाई बढि प्राथमिकता दिएको भन्दै भारतीय भिडियाहरुले प्रचारबाजी गरेका थिए। पछि उनीहरु दुवै साथी मात्र रहेको बताइयो।

लुलिया भन्टुर:
सलमानसँग पछिल्लो समय जोडिएकी महिला रेमानीयन नायिका लुलिया भन्टुर हुन्। लुलियालाई सलमानले भारतमा दुई वटा ‘लङ टुर’ गराइसकेका छन्। दुवैलाई मुम्बईमा सँगै देखिने गरेको हिन्दुस्तान टाइम्सको दाबी छ।
इली अभ्रम:
मिक्की भाइरसबाट बलिउड डेब्यू गरेकी इली अभ्रम सलमानले विवाह गर्न सक्ने महिला भनेर टाइम्स अफ इण्डियाले लेखेको छ। इली सलमानको निकटस्थहरु मध्ये एक रहेको उक्त पत्रिकाले जनाएको छ।

प्रकाशित : वैशाख २५, २०७५ १७:५९
ADVERTISEMENT
प्रतिक्रिया
पठाउनुहोस्
ADVERTISEMENT

आचार्य श्रीनिवासलाई हातहतियार तथा खरखजाना मुद्दा

पक्राउ गरेको आरोप एउटा मुद्दा अर्कै
देवनारायण साह

मोरङ — आफैंलाई गोली हान्न लगाएको आरोपमा पक्राउ परेका आचार्य श्रीनिवासलाई प्रहरीले मुद्दा चलाएको छ । 

धार्मिक तथा साम्प्रदायिक हिंसा फैलाउन खोजेको आरोपमा प्रहरीले सोमबार पक्राउ गरेका आचार्यलाई मंगलबार जिल्ला प्रहरी कार्यालय मोरङले हातहतियार तथा खरखजाना मुद्दा दर्ता गरेको छ। उक्त मुद्दामा उनलाई अनुसन्धानका लागि जिल्ला प्रशासन कार्यालय मोरङले १० दिनको म्याद दिएको छ।

आचार्यलाई जिल्ला प्रहरी मोरङको हिरासतमा राखेर हातहतियार तथा खरखजाना मुद्दामा अनुसन्धान सुरु गरेको प्रहरी उपरीक्षक अरुणकुमार बिसीले बताए। तर, आचार्यमाथि गोली प्रहार भएको पेस्तोल प्रहरीले बरामद गर्न गर्न सकेको छैन।

जिल्ला प्रशासन कार्यालयले हेर्ने उक्त मुद्दामा आरोप प्रमाणित भए १ वर्ष कैद वा १ लाख जरिवाना वा दुवै सजाय हुन सक्ने कानुनी व्यवस्था छ। त्रिभुवन अन्तर्राष्ट्रिय विमानस्थलबाट भारतको दिल्ली भाग्न लागेका आचार्यलाई विशेष प्रहरी अनुसन्धान टोलीले सोमबार बिहान काठमाडौंस्थित अन्तर्राष्ट्रिय विमानस्थल क्षेत्रबाट पक्राउ गरेर विराटनगर ल्याएका थिए।

अधिवक्ता योगेन्द्र चौहानले आचार्यलाई लगाएको मुद्दामा हतियारसमेत प्रहरीले बरामद गर्न नसकेको अवस्थामा थुनछेक बहसमा छुट्नसक्ने संभावना बढी भएको बताए। ‘आचार्यले धार्मिक तथा साम्प्रदायिक हिंसा फैलाउने ष्डयन्त्र गरेको छ,’ उनले भने, ‘विराटनगरवासी आचार्यको लहेलहैमा लागेको भए काटाकाट र मारामारको स्थिति सिर्जना हुने थियो। यहाँका बासिन्दा सचेत भएकोले मुलुकमा धार्मिक तथा साम्प्रदायिक हिंसा फैलिनबाट जोगिएको हो।’

भारतमा धर्मगुरु आशाराम र बाबा रामरहिमलाई सानो घटनाबाट छानबिन गर्दै अनेक सत्यतथ्य बाहिर ल्याएर आजीवन काराबासको सजाय भएको छ तर यहाँ सामान्य हातहतियारको मुद्दा लगाएर प्रहरीले झारो टार्ने काम मात्रै गरेको उनको भनाइ छ। गोली प्रहारको घटनामा आचार्य घाइते भएपछि सरकारले उपचार खर्च ब्यहोर्ने भनेको थियो।

विराटनगरस्थित न्यूरो अस्पतालमा उपचार गराइरहेको आचार्यको स्वास्थ्य अवस्थाको बारेमा जानकारी लिन संघीय सरकारको तर्फबाट संघीय मामिला तथा सामान्य प्रशासनमन्त्री लालबाबु पण्डित आएका थिए।

प्रदेश १ का मुख्यमन्त्रीलगायतका मन्त्रीले आचार्यको स्वास्थ्य अवस्था नियमित जानकारी लिएका थिए र उपचार खर्च व्यहोर्ने प्रतिबद्धता जनाएका थिए। प्रमुख जिल्ला अधिकारी रामप्रसाद आचार्यले सरकारले उपचार खर्च ब्यहोर्ने भनेको थियो तर दिई नसकेको अवस्थामा घटनाले अर्कै मोड लिएको बताए। अब संघीय र केन्द्र सरकारले के निर्णय गर्छ त्यहीअनुसार हुने उनले बताए।

गोली प्रहारको घटनापछि प्रदेश १ को संसदमा प्रतिपक्षी दलले सरकारको कडा आलोचना गर्दै आचार्य श्रीनिवासको सुरक्षाको ग्यारेण्टी गर्न माग गरेका थिए। उनको सुरक्षालाई लिएर प्रदेश र संघीय दुबै सरकारले सतर्कता अपनाएका थिए।

हिन्दु राज्यको मागसहितको आन्दोलन सार्थक नभएपछि हिन्दुधर्माबलम्बी र धर्मगुरुहरुलाई निर्णायक आन्दोलन गर्न उक्साउन आचार्यले आफैले स्वयंमाथि गोली प्रहार गर्न लगाएको प्रहरी उपरीक्षक बिसीले बताएका थिए।

आचार्यलाई गोली हान्ने उनकै अंगरक्षक चितवनको भरतपुर महानगरपालिका बेलचोकका २९ वर्षीय माधव चौधरी, गोली र पेस्तोल व्यवस्था गर्ने नवलपरासीको गैंडाकोट नगरपालिका-५ का ३२ वर्षीय खान र सन्तोष भन्ने लक्ष्मीराज अधिकारीलाई प्रहरीले पक्राउ गरी कर्तव्य ज्यान मुद्दा दर्ता गरेर छानबिन गरिरहेको छ।

बाराको सिमरा-३ घर भई सुनसरीको चकरघट्टी लक्ष्मी बैंङकटेशको आश्रममा बस्ने आचार्य विराटनगर १४ जतुवास्थित रामजानकी मन्दिरमा पुराण वाचनका लागि आएका थिए। गत चैत २५ गते आचार्यमाथि गोली प्रहार भएको थियो। गोली लागी घाइते भएका उनी न्यूरो अस्पताल विराटनगरमा २१ दिन उपचार गराएर काठमाडौं गएका थिए।

प्रकाशित : वैशाख २५, २०७५ १७:५१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT