‘नाइँ नभन्नू ल ५’ को ट्रेलर

‘नाइँ नभन्नू ल ५’ लाई प्राविधिक रूपले अब्बल बनाइएको निर्देशक विकास आचार्यले बताए । त्यसबाहेक समवेदनात्मक प्रेमकथा र उत्कृष्ट संगीतले यसपटक पनि निरन्तरता पाएको आचार्यले बताए ।

दोस्रो सिरिजदेखि नै निरन्तर अभिनयमा देखिएकी प्रियंका कार्कीले यसपटक पनि छोटो मीठो भूमिकामा देखिने बताइन् । उनले ‘नाइँ नभन्नू ल’ को सिरिज यात्रामा नछुट्ने हिसाबले भए पनि खेलेको बताइन् । ट्रेलर सार्वजनिक कार्यक्रममा कार्कीले भनिन्, ‘हरेक सिरिजसँगै हामी पनि ठूलो हुँदै आएका छौं । कथा र प्रस्तुतिमा पनि व्यापक भिन्नता छ ।’

‘नाइँ नभन्नू ल ५’ बाट अभिषेक नेपालले डेब्यु गर्दै छन् भने दिलीप रायमाझी, निरुता सिंह, केकी अधिकारी, स्वस्तिमा खडका, जयनन्द लामा, बुद्धि तामाङलगायत कलाकार यस पटकदेखि सिरिजमा थपिएका छन् । पूर्वी जिल्ला इलाम र झापाको पृष्ठभूमिमा कथा बुनिएको फिल्मलाई पुरुषोत्तम प्रधानले छायांकन गरेका हुन् भने निर्देशक आचार्यले सामीप्यराज तिमल्सेनासँग मिलेर पटकथा तयार पारेका हुन् ।