प्रियंका–आयुष्मान इन्गेज्ड

उनले ‘पप दी स्याम्पेन पिपल’ लेख्दै आफूले थर बदल्न गइरहेको खुसी व्यक्त गरेकी छन् । प्रियंकाले शनिबार दिउँसै आफ्नो स्टाटस बदल्दै आयुष्मानसँग इंगेज्ड भनी फेसबुकमा उल्लेख गरेकी थिइन् । यति बेला उनले दुवैका नामको समास मिलाएर ‘आयंका’ ह्यासट्यागमा आयुष्मानसँगका प्रेमिल फोटाहरू साझा गरेकी छन् । प्रोफाइल पिक्चर पनि बदल्दै ‘टु आवर न्यु बिगिनिङ’ पनि लेखेकी छन् । दुवैले विवाहको मिति भने उल्लेख गरेका छैनन् ।

पहिलो विवाह असफल भएपछि प्रियंका अमेरिकाबाट फर्केर फिल्मी क्षेत्रमा सक्रिय भएकी हुन् । आयुष्मानसँग उनको सम्बन्ध भने ‘कथा काठमाडौं’ मा स्क्रिन सेयर गरेपछि घनिष्ठ भएको हो । यो जोडीको प्रेम सोही फिल्मको सुटिङदेखि घनीभूत भएको बताइन्छ । आयुष्मानले ‘चपली हाइट २’ फिल्मबाट डेब्यु गरेका हुन् भने प्रियंका ‘मेरो बेस्टफ्रेन्ड’ मार्फत् रजतपटमा छिरेकी हुन् । यो जोडीलाई ‘छक्का पन्जा २’ मा सासू र ज्वाइँको सम्बन्धमा देखिएको थियो । रिलिज क्रममा रहेको ‘चंगा चेट’ मा पनि आयुष्मान र प्रियंकाले अभिनय गरेका छन् ।

उमेरमा प्रियंकाभन्दा केही वर्ष कान्छा आयुष्मान रातो बंगला स्कुलमा पाँच कक्षा पढ्दा प्रियंका पनि सोही स्कुलमा दस कक्षामा पढ्ने गर्थिन् ।

दुई वर्षअघि नै आयुष्मान र प्रियंकाले ‘माया त माया हो...’ र मेघान ट्रेनरको गीत ‘लाइक आई एम लुज यु...’ को कभर सङमा युगल गायनका साथै मोडलिङ गरेका थिए । त्यसयता थुप्रै म्युजिक भिडियोमा एकसाथ देखिएका छन् । गत वर्ष मात्रै एनएफडीसी फिल्म अवार्डमा नवअभिनेतातर्फको अवार्ड हात पारेपछि आयुष्मानलाई दर्शकदीर्घामा रहेकी प्रियंकाले सार्वजनिक रूपमा चुम्दै बधाई दिएपछि दुईबीचको प्रेम सम्बन्ध सबैसामु खुलस्त भएको थियो ।