लसुनप्रेमी मार्केल

कान्तिपुर संवाददाता

काठमाडौँ — प्रिन्स हयारीसँग विवाह गरेयता अभिनेत्री मेघान मार्केल समाचारको शीर्षक बनिरहेकी छन् । यस पटक उनको विवशतालाई लिएर खबर छापिएको छ । कुरा के भएछ भने, उनी तरकारीमा लसुन हालेको मन पराउने, लसुनका परिकार स्वाद मानीमानी खादिँरहिछन् । तर, उनकी बूढीसासु–आमा अर्थात् महारानी एलिजाबेथ लसुन भनेपछि दुरदुर भाग्ने ! 

बकिङघम दरबारमा मात्र नभएर एलिजाबेथ पुग्ने जुनसुकै समारोहमा लसुनरहित परिकार बनाउनुपर्ने रहेछ । उनले दरबारका खानामा लसुन पूर्ण रूपमा बन्देज गरेको थाहा पाएपछि मार्केल खिन्न भएकी छन् । उनी आफ्नो प्रिय स्वाद भुल्न विवश भएकी छन् । ‘हामीले कहिले पनि लसुनप्याज हालेका परिकार पस्किन पाउँदैनौं,’ शाही सेफ डयारेन म्याकग्रेडीले भनेका छन्, ‘महारानीलाई मेनुमा लसुन राखेको मन पर्दैन ।’

मार्केललाई लसुन छोड्न कति गाह्रो होला भन्ने कुरा विवाहअघिका उनका अन्तरवार्ता हेर्दा/पढ्दा थाहा पाइन्छ । तिनमा उनले आफ्ना प्रिय खानेकुराको सूचीमा लसुनैलसुनका परिकार उल्लेख गरेकी थिइन् । फिलिपिनो चिकेन एडोबो आफूलाई खुब मीठो लाग्ने उनले बताएकी थिइन् । यो परिकार लसुनका पोटी राखेर बनाइन्छ ।

दरबारमा लसुन परहेज गरिएकाले हयारी र मार्केल छुट्टै घरमा बसेको हुन सक्ने आशंका समेत गरिएको छ । चिकेन रेसिपीमा मुख मिठयाउने मार्केलको चञ्चलेपनामा भुलिएका हयारीले उनका लागि लसुनसहितका परिकारको बन्दोबस्त गरेकै हुनुपर्ने बेलायती समाचार माध्यमको अड्कल छ ।

Yamaha

Esewa Pasal

प्रकाशित : श्रावण ७, २०७५ ०८:३६
प्रतिक्रिया
पठाउनुहोस्
ADVERTISEMENT

चित्रकारका आँखामा माइकल ज्याक्सन

कान्तिपुर संवाददाता

काठमाडौँ — निधनपछि पनि सर्वाधिक खोजी हुने र सर्वाधिक सुनिने गायकान पर्छन् माइकल ज्याक्सन । यी अमेरिकी गायकको प्रभाव खास भूगोल र संस्कृतिभन्दा निकै फराकिलो छ । ‘किङ अफ पप’ का रूपमा विश्वभर चिनिएका माइकललाई यो शताब्दीकै प्रभावशाली व्यक्तित्वका रूपमा लिइन्छ ।

समाज, राजनीति र पहिचानबारे विश्वभर जति बहस भइरहेका छन्, माइकलका गीतसित पनि यी पक्षहरू जोडिन्छन् ।

म्युजिक, भिडियो, डान्स, कोरियोग्राफी र फेसनमा उनको प्रभावबारे थुप्रै चर्चा भए पनि समकालीन चित्रकलामा उनलाई कसरी प्रस्तुत गरिँदै आएको छ ? यो कौतूहल मेटाउन बेलायतको नेसनल पोट्ेरट ग्यालरीमा माइकलकेन्द्रित चित्रकला प्रदर्शनी हुँदै छ ।

माइकलको ६० औं जन्मदिवसका अवसरमा ग्यालरीले ‘माइकल ज्याक्सन : अन द वाल’ शीर्षक प्रदर्शनी गर्न लागेको हो, जहाँ विश्वप्रसिद्ध समकालीन चित्रकार एन्डी वारहोलदेखि ग्रेसन पेरीसम्मका दिग्गज स्रष्टाले बनाएका माइकल स्वरूप समावेश गरिनेछन् । ग्यालरीले ‘एक्जिबिसन अफ द इयर’ मा माइकलमा माथि बनाइएका सयभन्दा बढी चित्र टाँग्न लागेको छ ।

यो शताब्दीकै प्रभावशाली व्यक्तित्व भएकाले माइकलको सम्मानका लागि चित्रकला प्रदर्शनी गर्न लागेको ग्यालरीका निर्देशक निकोलस कुलिननले बताएका छन् । ‘उनका काम र जीवनी अहिले पनि उत्तिकै सान्दर्भिक छन्,’ कुलिननले बेलायतको द भोग पत्रिकासँग भनेका छन्, ‘राजनीति र पहिचानसँग पनि उनी नजिकबाट जोडिन्छन् ।’ ४० जना नयाँ–पुराना चित्रकारलाई माइकलको चित्र कोर्न लगाएर प्रदर्शनी गर्न लागेको उनले बताए । अमेरिकी चित्रकार एन्डी वारहोलले सन् १९८२ मा माइकललाई पहिलो पटक भिजुअल आर्टमा उतारेका थिए ।

माइकल ज्याक्सन इस्टेटसँगको सहकार्यमा आउँदो अगस्टमा हुन लागेको प्रदर्शनीका लागि अनलाइन टिकटको व्यवस्था छ । झन्डै एक महिनासम्म हुने प्रदर्शनीभर ग्यालरीमा छलफल, चित्रकला तालिम, कार्याशाला पनि समेटिनेछन् ।

अमेरिकी सुपरस्टारलाई बेलायतको नेसनल ग्यालरीमा यति ठूलो स्थान दिइनुलाई लिएर कलाकर्मीहरूले खुसी व्यक्त गरेका छन् । ‘एक्जिबिसन अफ द इयर’ मा माइकलको व्यक्तिगत, सामाजिक, राजनीतिक र सांगीतिक जीवन झल्किने कलाकृति राखिनेछन् ।

प्रदर्शनीमा समावेश हुन लागेका चित्रमध्ये अमेरिकी आर्टिस्ट केहिन्दे विलीको ‘इक्वेस्ट्रिएन पोट्रेट अफ किङ फिलिप सेकेन्ड’, क्यान्डिस ब्रिट्जको ‘किङ’, डारा बिर्नबाउमको ‘द वे यु मेक मी फिल’ जस्ता चित्र/तस्बिरबारे अहिलेदेखि नै चर्चा सुरु भइसकेको छ । विलीले माइकललाई स्पेनी राजा फिलिप द्वितीयको शैलीमा घोडामा बसिरहेको देखाएका छन् ।

‘उनी यस्ता मान्छे हुन् जो इन्डियानाको दुईकोठे घरमा आठ दाजुभाइसँग हुर्किएर विश्वलाई आफूसँगै नचाउन सफल भए,’ ग्यालरी निर्देशक कुलिननले भनेका छन्, ‘माइकल
अद्भुत थिए ।’

प्रकाशित : श्रावण ७, २०७५ ०८:३५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT