टेलरको टिकट दान

एजेन्सी

काठमाडौँ — अमेरिकी गायिका टेलर स्विफ्टले वेमाउथ, मासाचुसेट्सका प्रहरी कर्मचारीलाई आफ्नो कार्यक्रमको टिकट उपहार दिएकी छन् । सहकर्मीको मृत्युका कारण शोकमग्न संगठनलाई उनले टिकट दिएर कार्यक्रममा निम्तो गरेकी हुन् ।

कार दुर्घटनाको मुद्दालाई लिएर अनुसन्धान गरिरहेका हबलदार माइकल चेस्नको केही दिनअघि हत्या भएको थियो । यसअघि ७७ वर्षे एक वृद्धाको ज्यान लिएका व्यक्ति नै माइकलको पनि हत्या गरेको अड्कल काटिएको छ । सहकर्मीको निधनले निराश बनेका प्रहरी टोलीलाई टेलरले कार्यक्रममा आएर मन बहलाउन सुझाव दिएकी थिइन् ।

वेमाउथका मेयरको उपस्थितिमा टेलरले नागरिकको सुरक्षामा खटिने प्रहरी फौजप्रति सम्मान व्यक्त गर्दै आफ्नो कार्यक्रममा आइदिन सबैलाई अनुरोध गरेकी थिइन् । आउँदो बिहीबार हुन लागेको कन्सर्टका लागि उनले प्रहरी कर्मचारीलाई सयौं वटा टिकट बाँडेकी थिइन् । ठूलो रकममा बिक्री हुने टिकट सित्तैमा बाँडेपछि उनले प्रचारका लागि यस्तो गरेको हुनुपर्ने भन्दै आलोचना पनि भइरहेको छ ।

पप–स्टारले यसअघि पनि एरिजोनाका दुई हजार अनाथ बालबालिकालाई कन्सर्टको टिकट बाँडेकी थिइन् । यस्ता काम उनले बिनास्वार्थ गर्दै आएको बताउनेहरू पनि छन् । केही अघि उनको कन्सर्ट हेर्न आएकी एक युवती छारे रोगका कारण कार्यक्रमस्थलमै बेहोस हुँदा टेलरले उनलाई स्टेज–पछाडि भेटेर स्वास्थ्य लाभको कामना गरिन् । टेलर अरूप्रति कति संवेदनशील छन् भन्ने देखाउन यी गतिविधि साक्षी हुने विदेशी सञ्चार माध्यमको भनाइ छ ।

Yamaha

प्रकाशित : श्रावण १३, २०७५ ०८:०२
प्रतिक्रिया
पठाउनुहोस्
ADVERTISEMENT

आलियाको रणवीर सपना

कान्तिपुर संवाददाता

काठमाडौँ — बलिउड नायिका आलिया भट्ट उमेरले २५ पुगिसके पनि अझै बचपना बाँकी नै छ । तर प्रेमका सवालमा भने उनी निकै अगाडि देखिएकी छन् । आफूभन्दा १० वर्ष जेठा रणवीर कपुरलाई ताकिनन् मात्रै, रिलेसनसिप गाँस्नै सफल भइन् ।

‘ब्रम्हाश्त्र’ मा सँगै देखिनुअघि नै आलिया र रणवीरको जोडी यति बेला सार्वजनिक कार्यक्रममा कुममा कुम मिलाएर सँगै देखिन थालेको छ । कुनै बेला दीपिका पादुकोण वा कट्रिना कैफसँग घनघोर प्रेम गरेका रणवीर एकाएक आलियासँग प्रेममा रहेको समाचार आएपछि अधिकांश अचम्भित बने । धेरैका लागि यो जोडी कल्पनाभन्दा बाहिरको लाग्थ्यो । तर यही जोडीका बारेमा आलिया भने पहिलेदेखि नै कल्पना गर्थिन् ।

कुनै बेला आलियाले करण जौहरसँगको एक अन्तरवार्तामा आफ्नो रणवीर कपुरसँग क्रस परेको सुनाएकी थिइन् । जबकि त्यो बेला आलियाको पहिलो फिल्म पनि रिलिज भएको थिएन । आलिया आममा मुस्किलले परिचित थिइन् भने ‘स्टुडेन्ट अफ दी इयर’ खेल्दै थिइन् । तर त्यो बेलासम्म रणवीर बलिउडका ‘रकस्टार’ भइसकेका थिए ।

करणसँगको अन्तरवार्तामा आलिया अर्की नायिका परिणीति चोपडासँग थिइन् । उक्त अन्तरवार्तामा आलियाले आफू बच्चैदेखि रणवीरलाई मन पराउने र बिहेको चाहना राख्ने गरेको बताएकी थिइन् । त्यति मात्रै हैन, पहिलो पटक रणवीरसँग उनै करणले भेट्टाइदिँदा आलिया उत्साहित भई एकोहोरो बोलिरहेकी थिइन् रे ।

जबकि रणवीरलाई भने त्यो बेला आलिया को हुन् भन्ने पनि थाहा रहेनछ । आखिर कुनै बेला फयानका रूपमा क्रसमा परेकी आलिया नै यति बेला रणवीरको अंगालोमा मात्रै छैनन्, सबै ठिकठाक रहे, बिहे पनि हुनेछ र स्वयं आलियाले गफैगफमा पोखेको मनको कुरा पूरा हुनेछ । यसअघि कट्रिनालाई बुहारी बनाउ राजी नभएकी रणवीरकी आमा नीतू यति बेला आलियालाई भने निकै मन पराउँछिन् भने आलियाका बाबु महेश पनि रणवीरलाई उत्तिकै मन पराउँछन् । पारिवारिक जमघटमा समेत रणवीर र आलियाको जोडी देखिन थालेको छ ।

तर अहिले नै भने आलियालले अन्तरवार्ता क्रममा बोलेको कुराको भिडियो भाइरल भइरहेको छ । सायद त्यो बेला अन्तरवार्ता दिने क्रममा पनि उनले कुनैदिन आफू रणवीरसँग डेट गरिरहेकी हुन्छु भन्नेमा पनि विश्वास थिएन । त्यसैले उनले उक्त कुरालाई केवल आफ्नो क्रसको रूपमा व्यक्त गरिन् । सपना देख्न भने छोड्नु हुने रहेनछ । आलियाको सपना यति बेला साकार हुने क्रममा जो छ ।

प्रकाशित : श्रावण १३, २०७५ ०७:५९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT