पारसले ल्याए ‘धरोहर’

कान्तिपुर संवाददाता

काठमाडौँ — अहिले संगीतलाई चर्को अर्थोपार्जनका रूपमा प्रयोग गर्न थालेपछि बेथिति आइरहेको आरोप उत्तिकै सुनिन्छ । यस्तोमा कालजयी गीतमा भन्दा क्षणिक चर्चाका लागि स्रष्टाहरु बिकिरहेको टिप्पणी बाक्लिन थालेको छ ।

राष्ट्रभाव र भाइचाराका गीत कम निस्किरहेका बेला गायक छविसहित पत्रकार पारस नेपालले ‘धरोहर’ एल्बम सार्वजनिक गरेका छन् । भृकुटी मण्डपस्थित नेपाल पर्यटन बोर्डमा बिहीबार वरिष्ठ गायक प्रेमध्वज प्रधान र वरिष्ठ साहित्यकार प्रा. अभि सुवेदीले लोकार्पण गरेको उक्त एल्बममा माटो र मुटुका भनिएका पाँच गीत छन् ।

Yamaha

लोकार्पण समारोहमा एल्बममा समावेश ‘कस्तो हुन्थ्यो...’ गीतको भिडियो पनि देखाइएको थियो । राष्ट्रकवि माधवप्रसाद घिमिरेको रचना तथा डब्बु क्षत्रीको निर्देशन रहेको गीतमा भ्रातृत्वको भावना व्यक्त गरिएको छ । भिडियोमा वरिष्ठ रंगकर्मी वीरेन्द्र हमाल, राहुल श्रेष्ठ र सबिना कार्कीले अभिनय गरेका छन् ।

एल्बममा ‘गर्मी भयो रे...’, ‘दायाँ बायाँ...’, ‘सबै भन्छन्...’ र ‘तिमीले टेक्ने...’ बोलका गीत समाविष्ट छन् । यी गीत क्रमश: क्षेत्रप्रताप अधिकारी, अमन मास्के, दिनेश अधिकारी र फूलमान वलले लेखेका हुन् । सबै गीतमा जुगल डंगोलको संगीत सुन्न सकिन्छ ।

कार्यक्रममा गायक प्रधानले पारसका गीतले आफूलाई पुराना दिनको शैली स्मरण गराएको बताए । ‘हाम्रो पालाको जस्तै आधुनिक गीतहरू रहेछन्,’, उनले भने, ‘गायक नेपालको स्वर मीठो छ । सस्टेन नोट र मिडमा राम्रो सुनिने रहेछ । गायनलाई नछोड्नुस् । बरु अझै खुलेर, नधकाई गाउनुहोला ।’

प्रा. सुवेदीले ‘धरोहर’ का गीत सुनेर आफूलाई प्रेरणा जागेको भन्दै गायकलाई त्यसका लागि धन्यवाद दिए । उनले भने, ‘भावनाभित्रको अभिव्यञ्जना समाउँदै भित्रै पसेर गाउन सक्ने सामथ्र्य पारसको स्वरमा पाएँ । यो शैलीलाई अझ व्यापक बनाउनुस् । स्वरमा डाइमेन्सन छ ।’ उनले गायकले कवितालाई नै गाइदिएको उल्लेख गर्दै गीतहरू सुनिरहन मन लाग्ने गरी बनेको तर्क गरे ।

कान्तिपुरकर्मी पारसले आफूलाई विश्वास गरेर गीत दिने र एल्बम निर्माणमा सहयोग गर्नेप्रति आभार व्यक्त गरे । संगीतकार डंगोलले पाँच वर्षदेखिको आफूहरूको प्रयास बल्ल सफल भएको बताए । ‘मेरा लागि यो विशेष एल्बम हो,’ उनले भने, ‘अग्रज स्रष्टाका गीतमा संगीत भर्ने अवसर मिल्यो ।’ जुगलकै संगीतमा पारसको स्वर–शब्दमा यसअघि ‘नालापानी कालापानी...’ बोलको जागरण गीत बजारमा आइसकेको छ ।

प्रकाशित : श्रावण १७, २०७५ २१:४२
प्रतिक्रिया
पठाउनुहोस्
ADVERTISEMENT

सुनुवाइ समितिलाई काम गर्न दिऊँ : ओली

रासस/याेन्हाप

ललितपुर — प्रधानमन्त्री केपी ओलीले प्रधानन्यायाधीश सुनुवाइ गरिरहेको संसदीय समितिलाई प्रतिपक्षले काम गर्न नदिएको आरोप लगाएका छन् । संवैधानिक परिषद्ले प्रस्ताव गरेको नाममा विभिन्न उजुरी वा निवेदनमा सम्बन्धित व्यक्तिले सफाइ दिने व्यवस्था भएको उनले स्मरण गराए ।

भने, ‘समितिलाई काम गर्न नदिएर बोल्ने/बोलाउने र लेख्ने/लेखाउने काम भइरहेको छ ।’

प्रतिपक्षी दलले सरकारलाई आरोप/प्रत्यारोपभन्दा नीति तथा कार्यक्रममा प्रतिस्पर्धा गर्नुपर्ने उनले बताए । तुलसीलाल स्मृति प्रतिष्ठानले बिहीबार आयोजना गरेको ‘२१ औं तुलसीलाल स्मृति दिवस, नेपालको राजनीतिमा तुलसीलालको योगदान’ कार्यक्रममा उनले जनप्रतिनिधिले संसद्मा खुला छलफल गर्न नपाएको बताएका हुन् । ‘संसदको आदेश नमान्ने भए एक जना प्रधानमन्त्री र एक जना प्रतिपक्षी दलका संसदीय दलका नेता भए पुग्छ’ उनले भने । नेपालमा लोकतन्त्रले सीमा नाघेर अनियन्त्रित क्रियाकलाप हुँदै गएको उनले बताए । भने, ‘लोकतन्त्र अनियन्त्रित हुँदै जाँदा अराजकता बढ्छ ।’ सरकारमाथि अकारण हमला भइरहेको गुनासो पनि उनले गरे ।
त्यसअघि नेकपा अध्यक्ष पुष्पकमल दाहालले प्रतिक्रियावादी शक्तिले हमला र घेराबन्दी नरोकेको बताएका थिए । दाहालले नेपाल कम्युनिस्ट पार्टीको पछाडि लागेको पुच्छर लामो समयपछि हट्नु र झन्डै दुई तिहाइ बहुमतको वामपन्थी सरकार बन्नु सबैको चासोको विषय बनेको बताए ।

प्रकाशित : श्रावण १७, २०७५ २१:३७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT