हलमा ‘मिस्टर भर्जिन’

कान्तिपुर संवाददाता

काठमाडौँ — यौन मनोविज्ञानमा आधारित फिल्म नेपालमा खासै बनेको पाइँदैन । अझै यस्ता विषयमा खुलेर बहस भएकै पनि पाइँदैन । शुक्रबारदेखि प्रदर्शनमा आउन लागेको ‘मिस्टर भर्जिन’ ले भने यसै विषयलाई उठान गरेको छ ।

विशारद बस्नेतको डेब्यु निर्देशन रहेको उक्त फिल्मले तीन युवकको कथा कहन्छ । उमेरसँगै शरीरमा आउने बदलावपछि एक वयस्कको यौन मनोविज्ञानमा आउने परिवर्तन र यौनप्रतिको चाह प्राप्तिमा आइपर्ने सामाजिक अवरोधको विषयलाई ‘मिस्टर भर्जिन’ मा समेटिएको निर्देशक बस्नेतले बताए । फिल्ममा गौरव पहारी, विजय बराल, कमलमणि नेपाल, मरिष्का पोखरेल, भोलाराज सापकोटा, रवीन्द्र झा, सिर्जना सुब्बालगायतको अभिनय छ ।

‘उमेर पुगेको छोरोले परिवारसँग खुलेर मेरो बिहे गरिदेऊ भन्न सक्दैन । सोही कारण उसमा यौनकुण्ठा बढ्न थाल्छ,’ कमलमणिले बिहीबार पत्रकार भेटघाटमा भने, ‘हाम्रो समाजमा अझै पनि यौनको विषयमा बोल्न अकमकाउँछौं । यस्तै कुराको बहसका लागि यो फिल्म राम्रो माध्यम बन्न सक्छ ।’

Yamaha

प्रकाशित : भाद्र १, २०७५ ०७:५४
ADVERTISEMENT
प्रतिक्रिया
पठाउनुहोस्

‘रोजी’ फेरिएर ‘रोज’

कान्तिपुर संवाददाता

काठमाडौँ — प्रदर्शनमा आउन तीन साता बाँकी रहँदा ‘रोजी’ फिल्मको नाम ‘रोज’ मा परिवर्तन भएको छ ।

फिल्म युनिट ‘सत्यघटनामा आधारित बदलाको कथा’ भनेर प्रचारप्रसारमा उत्रिरहेका बेला, केही वर्षअघिको रोजी महर्जन हत्याकाण्डसँग परिवेश मिलेको भन्दै चलचित्र विकास बोर्डमा उजुरी परेपछि नाम फेरिएको हो । काठमाडौं–१५ बस्ने गोविन्द महर्जन र उनकी पत्नी नानीमैयाले छोरी रोजीको हत्यासँग फिल्मको परिवेश मिलेको भन्दै नाम परिवर्तन गर्न र सत्य घटना भनी नराख्न पटक–पटक आग्रह गर्दै आएका थिए ।

बोर्डमा बिहीबार फिल्मका निर्माता/निर्देशक निरक पौडेल, निर्माता मणिकर्ण केसी र महर्जन परिवारबीच वार्तापछि निर्माण युनिट नाम फेर्न सहमति जनाएपछि साविक मितिमै प्रदर्शनमा आउन पाउने भएको छ । निर्देशक पौडेले भने, ‘मृतकको परिवारको समवेदनालाई ख्याल गरी नाम परिवर्तन गर्ने निर्णय गरेका हौं । कसैको संवेदनालाई बिक्री गरेर पैसा कमाउन नहुने हाम्रो मान्यता छ ।’

रोजी हत्याकाण्डभन्दा फिल्म धेरै फरक भएकाले पनि नाम परिवर्तन गर्न गाह्रो नभएको पनि उनले बताए । यसअघि पनि महर्जन परिवारले फिल्मको कथा र नामसँग आपत्ति जनाउँदै बोर्डमा उजुरी दिएपछि छायांकन बीचमै रोकिएको थियो । त्यस बेलै पनि निर्माण पक्षले नाम परिवर्तन गरी रिलिज गर्न तयार रहेको बताएपछि छायांकन सुचारु भएको थियो ।

गोपीकृष्ण मुभिजको ब्यानरमा निर्मित ‘रोज’ मा अभिनेता प्रदीप खडका, पारमिता राज्यलक्ष्मी राणा, मिरुना मगर, कर्मा लगायतको मुख्य भूमिका छ ।

प्रकाशित : भाद्र १, २०७५ ०७:५३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT