उठ्दै छ थारू फिल्म

‘मातृभाषी फिल्म बनाउने हो भने व्यापार मात्रै पनि हेरेर हुन्न । समुदायको लागि योगदान पनि त हो नि !’
ठाकुरसिंह थारू

नेपालगन्ज — थारू भाषाको फिल्म ‘भुरभुरा रहर’ दसैंमा प्रदर्शन हुने तरखरमा छ । मूलधारको नेपाली फिल्ममा जत्तिकै लगानी रहेको भनिएको फिल्मको सुटिङमा अत्याधुनिक क्यामेरा र ड्रोनसमेत प्रयोग गरियो । मुख्य कलाकारहरू इन्द्र चौधरी र नायिका भीष्माकुमारी चौधरीले राम्रै पारिश्रमिक लिए ।

यी उदाहरणले पछिल्लो समय थारू फिल्म उद्योग उठ्दै गरेको संकेत गर्छन् । ‘भुरभुरा रहर’ का निर्माता हुन् रामलाल चौधरी । थारू फिल्ममा २० लाखभन्दा माथिको लगानी जोखिमयुक्त मानिन्छ । तर उनी भने लगानी उठ्नेमा ढुक्क छन् ।

‘पूर्वदेखि पश्चिमसम्मको तराई बेल्टमा थारू समुदायका लाखौँ दर्शक छन् । त्यसैले मेरो फिल्मले लगानी उठ्नेमा म ढुक्क छु,’ उनले सुनाए, ‘मलुकभरि एकसाथ प्रदर्शनको तयारीमा छौँ ।’

Yamaha

उक्त फिल्म निर्देशन गरेका हुन् सञ्चारकर्मीसमेत रहेका मदन चौधरीले । कथावस्तुमा मिहिनेतसँगै प्रविधिको भरपुर प्रयोग गरिएका कारण फिल्मले राम्रै बजार लिने दाबी छ उनको । ‘थारू मातृभाषामै फिल्म हेर्नेको लहर पनि पछिल्लो समय बढेको छ,’ उनले भने, ‘त्यही भएर अब लगानी र गुणस्तर दुवै दिनुपर्छ ।’

हुन त वर्षदिनअघि प्रदर्शनमा आएको ‘तुहारविना का जिना’ फिल्मले पनि राम्रो बजार लियो । जम्माजम्मी १० लाख रुपैयाँमा बनेको फिल्मले लगानी उठाएर राम्रो मुनाफा गरेको दाबी छ । अभिनेत्री अनुराधा चौधरी आफूले यो फिल्मबाट राम्रै पारिश्रमिक लिएको बताउँछिन् ।

अभिनेता सुरजको पनि दाबी त्यस्तै छ, ‘मेरो अभिनय यात्रामा सबैभन्दा बढी पारिश्रमिक लिएको यही फिल्म हो । थारू फिल्ममा पारिश्रमिक पाउनु नै पनि ठूलो कुरा हो ।’

दर्जनभन्दा बढी थारू फिल्ममा अभिनय गरिसकेकी अनुराधा भने पारिश्रमिक मात्रै पनि ठूलो कुरा नभएको बताउँछिन् । ‘मातृभाषी फिल्म बनाउने हो भने व्यापार मात्रै पनि हेरेर हुन्न,’ उनले भनिन्, ‘समुदायको लागि योगदान पनि त हो नि ।’

त्यसो त करिअरका सुरुआती दिनमा युवाहरू सोखकै लागि मात्रै पनि फिल्ममा आउने गरेका छन् । पछिल्लो समयमा भने निर्माताहरूले कलाकारलाई पारिश्रमिक दिन थालेका छन् । ‘तुहारविना का जिना’ भन्दा अघि अनुराधाले ‘अभागिन बनल सुहागन’ मा पनि राम्रै पारिश्रमिक लिएकी थिइन् । ‘बौछार’, ‘जाली संसार’, ‘लुटल जिन्दगी’, ‘करम’, ‘बहार’ लगायतका फिल्म पनि उनले सित्तैँमा खेलिनन् । डोटेली भाषाको ‘सोरै’ मा विरज भट्टसँग स्क्रिन सेयर गरेकी उनले पछिल्लो समय फिल्मसँगै म्युजिक भिडियोतिरको यात्रा पनि लोभलाग्दो बन्दै गरेको बताइन् । उनी थारू म्युजिक भिडियोका व्यस्त मोडलमध्ये पनि पर्छिन् ।

म्युजिक भिडियोका हकमा नयाँपुस्ते मोडल सुनीता दहित पहिलो नम्बरमा छिन् । हालसम्म नेपाली र थारू गरी दुई दर्जनभन्दा बढी म्युजिक भिडियोमा मोडलिङ गरिसकेकी २१ वर्षे सुनीता एउटा भिडियोका लागि ४० हजार रुपैयाँसम्म पारिश्रमिक लिन्छिन् । ‘सोखसँगै कमाइ पनि राम्रो हुँदै गएको छ,’ उनले भनिन्, ‘व्यावसायिक करिअरकै लागि पनि यो क्षेत्र भरपर्दो बन्दै छ ।’

सुनीतालाई नै पछयाउँदै छन् बर्दियाकी मोडल ऋतु नानु र बाँकेकी रविना चौधरी । यी दुई पनि दर्जनभन्दा बढी थारू गीतमा देखिइसकेका छन् । ऋतुले अभिनय गरेकामध्ये ‘हाई मोर डार्लिङ...’, ‘चौअन्नी मुस्कान...’, ‘मचैलो धमाल...,’ ‘कोकोकोला फिगर...’, ‘आँखिक इसारा...’, ‘लभ यु..’, ‘फूलकुमारी...’ लगायतका भिडियो चलेकामा पर्छन् । ‘अहिले पनि म्युजिक भिडियोका लागि अफर आइरहेको छ,’ ऋतुले भनिन्, ‘पढाइसँगै मोडलिङलाई पनि निरन्तरता दिँदै आइरहेकी छु ।’

उता, गीतहरू पनि धमाधम रेकर्ड भइरहेका छन् । बाँकेका गायक खेम भौगोरियाले एक सय गीत गाइसकेका छन् । कतिपयको म्युजिक भिडियो सार्वजनिक भइसकेको छ । पछिल्लो समय थारू युवामाझ नाम कमाएका विश्वसागर परियारका ४० भन्दा बढी म्युजिक भिडियो आइसकेका छन् । ती अधिकांश भिडियो युवा लक्षित छन् ।

‘हरेक गीतमा दर्शकलाई नचाउने मेरो उद्देश्य हो । त्यसमा सफल पनि भएको छु,’ उनले भने, ‘एउटा गीतका लागि २५ हजार रुपैयाँसम्म पारिश्रमिक लिने गरेको छु ।’

मोडलका रूपमा भने पछिल्लो समय नरेश जगन्नाथ, दीपक, राम, राजकुमार र मनोज चौधरी लगायतका युवाहरू म्युजिक भिडियोतिर तानिएका छन् ।

प्रकाशित : भाद्र १४, २०७५ ०७:५६
प्रतिक्रिया
पठाउनुहोस्
ADVERTISEMENT

ठेकेदारलाई कारबाही भएन

ठाकुरसिंह थारू

नेपालगन्ज — गृहमन्त्रीको निर्देशनमा स्थानीय प्रशासनले काम नगर्ने केही ठेकेदारको सूची तयार गरी पठायो । एक/दुई जनालाई कारबाही गर्ने भन्दै पक्राउ पनि गर्‍यो । तर गृहमन्त्रीले भनेजस्तै बाँकेमा काम नगर्नेहरू कारबाहीमा परेका छैनन् ।

ठेक्का लिएको डेढ वर्षसम्म पाँच प्रतिशत काम नगर्ने ठेकेदार पनि छन् । जिल्लाको नौवास्तामा खुला कारागार निमार्ण र मुलुककै गौरव मानिएको सिक्टा सिँचाइ आयोजनाको डुडवा नहर निमार्णको ठेक्का पाएका कोस्टल/पप्पु जेभीले समयमै काम गरेन । उसले खुला कारागारका लागि ब्यारेक भने निर्माण भइसकेको जनाएको छ ।

उक्त निर्माण कम्पनीका ठेकेदार हरिनारायणप्रसाद रौनियार पर्सा क्षेत्र नम्बर ३ का निर्वाचित सांसद एवं संघीय समाजवादी फोरमका केन्द्रीय सदस्य हुन् । उनले नौबास्तामा खुला कारागार निमार्णका लागि भ्याटबाहेक ३९ करोडमा ठेक्का लिएका छन् । त्यस्तै डुडवा नहर निमार्णका लागि ९८ करोड ८१ लाखमा ठेक्मा सकार गरेका छन् ।

कारागार निर्माणका लागि ठेक्का लिएको १७ महिनामसम्म कामै गरेनन् । ठेकेदारले बैंक ग्यारेटी राखे बराबरको २० प्रतिशत अर्थात् ७ करोड बुझिसकेका छन् । निमित्त प्रमुख जिल्ला अधिकारी विश्वराज न्यौपानेले पटक–पटकको ताकेतापछि खुला कारागारको काम अगाडि बढेको बताए ।

‘हामीले सरकारी कार्यालयको प्रमुखको बैठकमा काम नगर्ने ठेकेदारका बारे जानकारी दिन भनेका छौं,’ उनले भने, ‘काम नगर्ने ठेकेदारलाई कारबाही गर्ने नियमित प्रक्रियाभित्रै राखेका छौं ।’

डिभिजन कार्यालयका इन्जिनियर होमनाथ भुसालले भनेजस्तो तोकिएकै समयमा कामको प्रगति बढाउन पत्राचार गरिरहेको बताए । ठेक्का अवधि केही महिना बाँकी रहेकाले कारबाही गर्न समस्या भइरहेको उनले बताए । सिक्टा आयोजनाको डुडुवा नहर प्रणालीको ठेक्का दिएको २८ महिनामा पाँच प्रतिशत काम मात्रै भएको छ ।

लक्ष्यअनुसारको काम नभएको भन्दै आयोजनाका कर्मचारीले चेतावनी दिँदै आएका छन् । तर ठेकेदारले भने त्यसको बेवास्ता गर्दै आएका छन् । आयोजनाले २०७४ पुस ३० गते सिँचाइ विभागलाई पत्राचार गरी काम गर्ने निर्माण कम्पनीलाई के गर्ने भनेर सुझाव मागेको थियो । तर, विभागले त्यसबारे कुनै प्रतिक्रिया नजनाउँदा ठेकेदार कम्पनीलाई बल पुगेको छ ।

निर्माण कम्पनीले काम पनि नगर्ने र काम गर्ने समायावधि भने सक्ने रणनीतिले डुडुवाको नहर निर्माणको काम पूरा हुन अझै थप दुई वर्ष लाग्ने सम्भावना बढेको छ ।

उक्त निर्माण कम्पनीले ३२.२ किलोमिटर नहर निर्माण तथा सिक्टाको मूल नहरलाई डुडुवा शाखा नहरसँग जोड्ने संरचना निर्माणलगायतका काम गर्ने गरी ९८ करोड ८१ लाखमा १९ डिसेम्बर २०१८ सम्म काम सक्ने गरी ठेक्का लिएका थिए ।

सो संरचना निर्माण भएपछि त्यस क्षेत्रको १६ हजार हेक्टरमा सिँचाइ सुविधा पुग्ने विश्वास छ । ०७३ जेठदेखि निर्माण कार्य सुरु गरी ०७५ पुुस ४ सम्म पूरा गर्ने लक्ष्य थियो ।

प्रकाशित : भाद्र ११, २०७५ ०९:४९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT