महिला हिंसामाथि ‘कथा काठमाडौं’

अर्जुन राजवंशी

दमक — सपना साकार गर्ने नाममा आफैंलाई समाप्त गर्नेहरूको कथा समेटेर ‘कथा काठमाडौं’ बनाएको सञ्चारकर्मी एवं फिल्म निर्देशक संगीता श्रेष्ठले बताएकी छन् । शीर्षक ‘कथा काठमाडौं’ भए पनि फिल्ममा काठमाडौं बाहिरका युवायुवतीको कथालाई प्रस्तुत गरेको बताइन् ।

असोज १२ देखि प्रदर्शनमा आउन लागेको फिल्मको प्रचारप्रसारका लागि युनिट झापा आएको छ । दमकमा शनिबार पत्रकार सम्मेलनमा श्रेष्ठले फिल्मको दृश्यका बारेमा केहीले आलोचना गरे पनि त्यो अहिलेको काठमाडौंको वास्तविकता भएको तर्क गरिन् ।


‘यो फिल्मले वर्तमान नेपाली समाजमा बढेको महिला हिंसा रोक्न मद्दत गर्छ,’ उनले भनिन्, ‘आफ्नो सपना पूरा गर्ने नाममा के गर्नुपर्छ र के गर्नु हुँदैन भन्ने कुराको ज्ञान बाँड्छ ।’ विभिन्न सपना र आकांक्षा बोकेर काठमाडौं छिरेका सबै युवायुवतीको सपना पूरा भएका छन् कि छैनन्, त्यो क्षमता काठमाडौंसँग छ कि छैन, विभिन्न जिल्लाबाट काठमाडौं छिरेका युवायुवतीलाई काठमाडौंका मान्छेले कसरी प्रयोग गर्न खोज्छन् भन्ने प्रश्नको जवाफ ‘कथा काठमाडौं’ ले दिने निर्देशक श्रेष्ठले बताइन् ।

Yamaha


कान्तिपुर टेलिभिजनमा कार्यरत श्रेष्ठको ‘कथा काठमाडौं’ डेब्यु फिल्म हो । यसअघि उनले टेलिफिल्म ‘कथा प्रेमका’ निर्देशन गरेकी थिइन् ।


नायक प्रमोद अग्रहरीले उज्यालो खोज्ने नाममा अँध्यारोमा फसेकाहरूको कथा समेटिएकाले फिल्म सफल हुने विश्वास जनाए । उनले विगतमा यस खाले कथा फिल्महरूमा आए पनि उनीहरूलाई अब कसरी बचाउने, कसले बचाउने भन्ने विषय यो फिल्ममा मात्र खोजिएको दाबी गरे ।


आहाना फिल्म्सको ब्यानरमा निर्मित फिल्ममा प्रियंका, प्रमोद, आयुष्मान देशराज जोशी, सन्जोग कोइराला, सन्ध्या केसी, प्रेक्षा अधिकारीलगायतको अभिनय छ ।

प्रकाशित : भाद्र २५, २०७५ ०८:५४
ADVERTISEMENT
प्रतिक्रिया
पठाउनुहोस्
ADVERTISEMENT

गोविन्दा नेपाल आउँदै

कान्तिपुर संवाददाता

काठमाडौँ — वरिष्ठ फिल्मकर्मी किशोर राना र बलिउड अभिनेता गोविन्दा पुरानै साथी हुन् । १५ वर्ष मुम्बईमा बिताएका किशोरले हिन्दी फिल्मसँगै भोजपुरी फिल्ममा समेत काम गरे ।

अहिले मृगौलाको उपचार गरिरहेका किशोरलाई एउटा अवार्ड दिन उनकै पुरानो मित्र गोविन्दा नेपाल आउने भएका छन् । आउँदो आइतबार राजधानीमा हुन लागेको ‘एलजी सिनेमा सर्कल अवार्ड’ को विशेष पाहुनाका रूपमा गोविन्दा आउन लागेका हुन् । उनैले किशोरलाई लाइफटाइम अचिभमेन्ट अवार्ड दिनेछन् ।


सिनेमा सर्कलका अध्यक्ष दिनेश डीसीका अनुसार, गोविन्दा शनिबार आइपुग्नेछन् । उनीसँगै छोरा यश पनि हुनेछन् । पत्नी सुनीता र छोरी टिना भने शुक्रबारै नेपाल आउँदै छन् । ‘गोविन्दाको नेपाल बसाइ तीन दिनको हुनेछ,’ डीसीले भने, ‘सपरिवार होटल याक एन्ड यतीमा बस्नेछन् ।’ अवार्ड समारोहको भोलिपल्ट बिहान पशुपतिनाथको पूजाआजाको कार्यक्रम रहेको डीसीले बताए । अवार्डको यो तेस्रो संस्करण हो ।


मनोनयन सार्वजनिक
एलजी सिने सर्कल अवार्डको विधागत उत्कृष्टको नाम पनि आइतबार सार्वजनिक गरिएको छ । जसमा उत्कृष्ट फिल्मतर्फ सात फिल्महरू ‘छक्का पञ्जा २’, ‘पञ्चायत’, ‘शत्रुगते’, ‘लिलिबिली’, ‘भुइँमान्छे’, ‘मंगलम’ र ‘तिमीसँग’ प्रतिस्पर्धामा रहेका छन् । उत्कृष्ट निर्देशकतर्फ पनि यिनै फिल्मबाट क्रमश: दीपाश्री निरौला, शिवम् अधिकारी, प्रदीप भट्टराई, मिलन चाम्स, नवराज बुढाथोकी, नवल नेपाल र शिशिर राणा परेका छन् ।


फिल्म निर्देशक किशोर रानालाई लाइफटाइम एचिभमेन्ट अवार्ड प्रदान गर्न लागिएको उक्त अवार्डमा अभिनेतातर्फ दयाहाङ राई, अनमोल केसी, प्रदीप खडका, पुष्प खडका, सरोज खनाल, राज कटुवाल र नाजिर हुसेनबीच प्रतिस्पर्धा चल्दा अभिनेत्री विधातर्फ साम्राज्ञी राज्यलक्ष्मी शाह, नीता ढुंगाना, बेनिशा हमाल, शिल्पा पोखरेल र प्रियंका कार्कीमध्ये एकले अवार्ड थाप्नेछन् । अवार्डमा उत्कृष्ट अनस्क्रिन जोडी, चर्चित अभिनेता, अभिनेत्रीदेखि उत्कृष्ट स्टन्ट, भीएफएक्स, ट्रेलर, पोस्टरजस्ता विधासहित २२ विधामा अवार्ड दिइने उल्लेख छ ।

प्रकाशित : भाद्र २५, २०७५ ०८:५४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT