गोविन्दा नेपाल आउँदै

कान्तिपुर संवाददाता

काठमाडौँ — वरिष्ठ फिल्मकर्मी किशोर राना र बलिउड अभिनेता गोविन्दा पुरानै साथी हुन् । १५ वर्ष मुम्बईमा बिताएका किशोरले हिन्दी फिल्मसँगै भोजपुरी फिल्ममा समेत काम गरे ।

अहिले मृगौलाको उपचार गरिरहेका किशोरलाई एउटा अवार्ड दिन उनकै पुरानो मित्र गोविन्दा नेपाल आउने भएका छन् । आउँदो आइतबार राजधानीमा हुन लागेको ‘एलजी सिनेमा सर्कल अवार्ड’ को विशेष पाहुनाका रूपमा गोविन्दा आउन लागेका हुन् । उनैले किशोरलाई लाइफटाइम अचिभमेन्ट अवार्ड दिनेछन् ।


सिनेमा सर्कलका अध्यक्ष दिनेश डीसीका अनुसार, गोविन्दा शनिबार आइपुग्नेछन् । उनीसँगै छोरा यश पनि हुनेछन् । पत्नी सुनीता र छोरी टिना भने शुक्रबारै नेपाल आउँदै छन् । ‘गोविन्दाको नेपाल बसाइ तीन दिनको हुनेछ,’ डीसीले भने, ‘सपरिवार होटल याक एन्ड यतीमा बस्नेछन् ।’ अवार्ड समारोहको भोलिपल्ट बिहान पशुपतिनाथको पूजाआजाको कार्यक्रम रहेको डीसीले बताए । अवार्डको यो तेस्रो संस्करण हो ।

Yamaha


मनोनयन सार्वजनिक
एलजी सिने सर्कल अवार्डको विधागत उत्कृष्टको नाम पनि आइतबार सार्वजनिक गरिएको छ । जसमा उत्कृष्ट फिल्मतर्फ सात फिल्महरू ‘छक्का पञ्जा २’, ‘पञ्चायत’, ‘शत्रुगते’, ‘लिलिबिली’, ‘भुइँमान्छे’, ‘मंगलम’ र ‘तिमीसँग’ प्रतिस्पर्धामा रहेका छन् । उत्कृष्ट निर्देशकतर्फ पनि यिनै फिल्मबाट क्रमश: दीपाश्री निरौला, शिवम् अधिकारी, प्रदीप भट्टराई, मिलन चाम्स, नवराज बुढाथोकी, नवल नेपाल र शिशिर राणा परेका छन् ।


फिल्म निर्देशक किशोर रानालाई लाइफटाइम एचिभमेन्ट अवार्ड प्रदान गर्न लागिएको उक्त अवार्डमा अभिनेतातर्फ दयाहाङ राई, अनमोल केसी, प्रदीप खडका, पुष्प खडका, सरोज खनाल, राज कटुवाल र नाजिर हुसेनबीच प्रतिस्पर्धा चल्दा अभिनेत्री विधातर्फ साम्राज्ञी राज्यलक्ष्मी शाह, नीता ढुंगाना, बेनिशा हमाल, शिल्पा पोखरेल र प्रियंका कार्कीमध्ये एकले अवार्ड थाप्नेछन् । अवार्डमा उत्कृष्ट अनस्क्रिन जोडी, चर्चित अभिनेता, अभिनेत्रीदेखि उत्कृष्ट स्टन्ट, भीएफएक्स, ट्रेलर, पोस्टरजस्ता विधासहित २२ विधामा अवार्ड दिइने उल्लेख छ ।

प्रकाशित : भाद्र २५, २०७५ ०८:५४
प्रतिक्रिया
पठाउनुहोस्
ADVERTISEMENT
ADVERTISEMENT

सलाम बुबा !

कान्तिपुर संवाददाता

काठमाडौँ — बुबाको साथ नभइदिएको भए सायद दीपकराज गिरी कला क्षेत्रमा आउने नै थिएनन् । यद्यपि कुनै समय उनका बुबा दीपकलाई कला क्षेत्रमा प्रवेश नगरेकै राम्रो पनि भन्थे । तर, दीपकको जिद्दीसामु बुबाको पनि जोर चलेन ।

‘बुबाले कला क्षेत्रमा नलाग् भन्दाभन्दै पनि मलाई अगाडि बढ्न कहिल्यै आर्थिक अभाव हुन दिनुभएन,’ दीपकले बुबाको मुख हेर्ने दिन आइतबार बुबाको गुणगानमा भने, ‘त्यसैले उहाँलाई म मेरो ब्याकअप भन्छु ।’


सिनामंगलस्थित घरमा बुबासँगै बस्दै आएका दीपकले आइतबार बिहानै मिठाई खुवाएर बुबाको मुख हेरे । परिवारसहितको तस्बिर फेसबुकमा राख्दै उनले कुशे औंसीको खुसियाली मनाए । ‘बुबाको आशीर्वाद लिँदै हामी परिवार’ लेखेर उनले सबै बुबाप्रति नमन समेत गरेका छन् ।


दीपकका अनुसार एउटा सन्तान हुर्काउन जति आमाको भूमिका हुन्छ, उति नै बुबाको पनि गहन जिम्मेवारी हुन्छ । उनले आफ्नो बाल्यकाल सम्भँmदै भने, ‘सानैदेखि साह्रै जिद्दी थिएँ, यही जिद्दी भएरै कलाकार बने । बुबाले अहिले ठिकै गरिछस् छोरा भन्नुहुन्छ ।’


अभिनेत्री प्रियंका कार्कीले फेसबुकमा बुबासँगको तस्बिर अपलोड गर्दै लामो क्याप्सन पनि लेखेकी छन् । क्याप्सनमा बुबाले आफूमाथि गरेको माया र योगदानको चर्चा गरेकी छन्, ‘धन्यवाद बुबा, मलाई लडेर उठाउनुभएकोमा, मलाई परिष्कृत गर्नुभएकोमा र फेरि प्रयास गर्न दिनुभएकोमा । र, सधैं मलाई आफ्नो बाटो रोज्न दिनुभएकोमा ।’ प्रियंकाले स्टाटसमा बुबाले स्वतन्त्र भएर आफ्नो करिअर स्थापित गर्न दिएकोमा खुसी व्यक्त गर्दै धन्यवाद दिएकी छन् ।


अनमोल केसी र भुवन केसी दुवै जनाले आ–आफ्ना बुबाको मायामा स्टाटससहित फोटो राखेका छन् । फिल्ममा बुबाको करिअर पछ्याउँदै आएका अनमोल अहिलेका सफल अभिनेतामा गनिन्छन् । अनमोलले बुबाको साथ र माया नपाएको भन्ने कुनै छनक देखिँदैन । हरेक कार्यक्रम र फिल्ममा भुवनले अनमोलको साथ दिएका छन् । यी बाबुछोराबीच माया निकै गाढा देखिन्छ । बुबाको मुख हेर्ने दिन अनमोलले बुबा र आफ्नो तस्बिर पोस्ट गरे । ‘हेर्दा जति अग्लो देखिए पनि तिम्रो बुबा विशेष हुन्छ×’ भन्ने भावको स्टाटससहित उनले ‘आई लभ यु बाबा’ लेखेका छन् । त्यस्तै, भुवनले पनि आफ्ना बुबाको फोटो फेसबुकमा राखेर ‘हयाप्पी फादर्स डे’ लेखेका छन् ।

प्रकाशित : भाद्र २५, २०७५ ०८:५३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT