“प्रसाद” को प्रिमियर

कान्तिपुर संवाददाता

काठमाडौँ — नि:सन्तान दम्पतीको कथाव्यथा समेटिएको फिल्म ‘प्रसाद’ को बुधबार राजधानीमा प्रिमियर सो गरियो । प्रिमियरका क्रममा निर्देशक राउतले फिल्ममा ‘विवाहपछिको प्रेमसम्बन्ध र त्यसपछि सन्तान नहुँदा सम्बन्धमा आइपर्ने उतारचढाव फिल्ममा समेटिएको’ बताए ।

राजधानीको सिटी सेन्टरस्थित बिग मुभीमा बुधबार ‘प्रसाद’ रेड कार्पेट प्रिमियरमा निर्देशक दिनेश राउत, अभिनेता निश्चल बस्नेत, अभिनेत्री नम्रता श्रेष्ठ, लेखक सुशील पौडेललगायत । तस्बिर : कविन अधिकारी/कान्तिपुर

विगतमा आफूले प्रेमकथामा आधारित फिल्म बनाएको बताउँदै यसपटक गम्भीर विषयवस्तु पस्किएको पनिउनले जनाए ।

Yamaha

फिल्ममा अभिनेत्री नम्रता श्रेष्ठ ‘सन्तान सुखका लागि संघर्ष नारी’ को भूमिकामा छिन् भने विपिन कार्की कथित माथिल्लो जातकी युवती भगाउने दलित युवा बाबुरामको भूमिकामा छन् । ‘एकदम फरक भूमिका गरेकी छु,’ अभिनेत्री नम्रताले भनिन्, ‘पक्कै पनि दर्शकले मन पराउनुहुनेछ ।’ विपिनले पनि आफूले पहिलोपटक गम्भीर पात्रको रूपमा अभिनय गरेको सुनाए ।

फिल्ममा निश्चल बस्नेतचाहिँ यी दुई (बाबुराम र नारायणी) को साथीको रूपमा छन् । उनले पनि प्रसादमा फरक कामगरेको बताए । ‘विपिन र नम्रताजस्ता खारिएका कलाकारसँग काम गर्दा गाह्रो पनि पर्‍यो,’ उनले भने ।

फिल्मलाई सञ्चारकर्मी सुशील पौडेलले लेखेका हुन् भने सुवास थापाले निर्माण गरेका हुन् । विपन्न वर्गको साना–साना समस्या उठाएर प्रसादको आलेख तयार गरेको पौडेले बताए । अभिनेता भुवन केसी, दीपकराज गिरी, अभिनेत्री ऋचा शर्मालगायतले फिल्म मन परेको प्रतिक्रिया दिए । शुक्रबारदेखि फिल्म देशव्यापी रिलिज हुँदै छ ।

प्रकाशित : मंसिर २०, २०७५ ०८:२३
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

गण्डकीमा प्रदेश लोकसेवा आयोगको तयारी

कान्तिपुर संवाददाता

पोखरा — गण्डकी प्रदेश सरकारले प्रदेश लोकसेवा आयोग गठनका लागि प्रक्रिया अघि बढाएको छ । संवैधानिक व्यवस्थाअनुसार सरकारले आयोग गठनका लागि कानुन तर्जुमा गर्न लागेको हो ।

गण्डकी प्रदेशको मुख्यमन्त्री तथा मन्त्रिपरिषद् कार्यालय । फाइल तस्बिर : लालप्रसाद/कान्तिपुर

प्रदेश सरकार मन्त्रिपरिषद्को बुधबारको बैठकले आयोग गठनसम्बन्धी कानुन तर्जुमाका लागि सैद्धान्तिक स्वीकृति दिएको छ । प्रदेश सरकार र मातहतका कार्यालयका लागि कर्मचारी भर्ना, छनोट, पदपूर्ति र बढुवासमेतका लागि लोकसेवा आयोग गठन गर्नुपर्ने आवश्यकता भएकाले सैद्धान्तिक स्वीकृति दिएको सरकारका प्रवक्ता भौतिक पूर्वाधार विकासमन्त्री रामशरण बस्नेतले बताए ।

‘संविधानको धारा २४४ मा प्रत्येक प्रदेशमा प्रदेश लोकसेवा आयोग रहनेछ भन्ने व्यवस्था छ,’ बैठकपछि संवाददाताहरूसँग उनले भने, ‘सैद्धान्तिक स्वीकृतिपछि विधेयकको मस्यौदा बन्छ । मन्त्रिपरिषद्ले टुंगो लगाएर प्रदेशसभामा लैजान्छ ।’ संघीय संसद्ले लोकसेवा आयोगसम्बन्धी कानुन बनाएर प्रदेश आयोगको आधार र मापदण्ड निर्धारण गरेपछि मात्रै विधेयक प्रदेशसभामा लैजाने उनले बताए । संघले कानुन बनाएपछि आयोगको गठन, काम, कर्तव्य र अधिकार प्रदेश कानुनअनुसार हुनेछ ।

यसैगरी मन्त्रिपरिषद् बैठकले प्रदेश तालिम प्रतिष्ठानसम्बन्धी कानुन तर्जुमाका लागि मुख्यमन्त्री तथा मन्त्रिपरिषद् कार्यालयलाई सैद्धान्तिक स्वीकृति दिएको छ । प्रदेश र स्थानीय तहको राजनीतिक तथा प्रशासनिक क्षेत्रको क्षमता अभिवृद्धिका लागि प्रतिष्ठान आवश्यक रहेकाले कानुन बनाउन लागिएको मन्त्री बस्नेतले बताए । चालु आर्थिक वर्षको नीति तथा कार्यक्रममा प्रदेश सरकारले प्रतिष्ठान गठन गर्ने उल्लेख गरेको छ ।

प्रदेशको नीति तथा योजना आयोगमा विज्ञका रूपमाकाम गर्दै आएका लमजुङका विष्णुराज बराललाई बुधबारदेखि लागू हुनेगरी सरकारले आयोगको सदस्य बनाएको छ । उनले सहायक मन्त्रीसरह सेवासुविधा पाउनेछन् । जलस्रोत विज्ञ बराललाई प्रदेश सरकारले गत साउन १६ मा विज्ञका रूपमा नियुक्त गरेको थियो ।

बैठकले उद्योग, पर्यटन, वन तथा वातावरण मन्त्रालयले तयार पारेको वातावरण तथा जलवायु परिवर्तन नीति र वन तथा जलाधार व्यवस्थापन नीति मन्त्रिपरिषद्को आर्थिक तथा सामाजिक विकास समितिमा पठाउने निर्णय गरेको छ ।

सोही मन्त्रालयले बनाएका वन तथा वातावरण संरक्षण एवं व्यवस्थापन कार्यक्रम कार्यान्वयन कार्यविधिलाई मन्त्रिपरिषद्कै प्रशासन विधेयक समितिमा पठाइएको मन्त्री बस्नेतले बताए ।

प्रकाशित : मंसिर २०, २०७५ ०८:२०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT