२९.१२°C काठमाडौं
काठमाडौँ — यस वर्षको मिस वर्ल्डको उपाधि पहिलो पटक मेक्सिकोको पोल्टामा पुगेको छ । चीनको सान्यामा शनिबार साँझ आयोजित ६८ औं मिस वर्ल्डको ग्रान्ड फिनालेमा २६ वर्षीया मेक्सिकन सुन्दरी भनेस्सा पोन्सले एकसय १७ प्रतिस्पर्धीलाई पछि पार्दै ताज पहिरिएकी हुन् ।
उनलाई भारतकी पूर्व मिस वर्ल्ड मानुषी चिल्लरले ताज लगाइदिएकी थिइन् । त्यसैगरी थाइल्यान्डकी निकोलिनी मिम्सनुकान रनरअप भएकी थिइन् । प्रतियोगिताको उत्कृष्ट पाँचमा बेलारुस, जमैका र युगान्डाका सुन्दरी पनि छानिएका थिए ।
नेपालकी शृंखला खतिवडा भने उत्कृष्ट १२ बाट माथि जान सकिनन् । मुख्य टाइटलका लागि भएको प्रतिस्पर्धामा नेपालको यो नै अहिलेसम्मको महत्त्वपूर्ण उपलब्धि हो ।
२३ वर्षीया मिस नेपाल खतिवडाले मिस वर्ल्डका दुई सबटाइटल मल्टिमिडिया र ब्युटी विथ अ पर्पस अवार्ड भने जित्न सफल भइन् । हेटौंडाकी शृंखलाले आर्किटेक्चरमा स्नातक गरेकी छन् ।
प्रकाशित : मंसिर २३, २०७५ ०८:३९
