विपिन भन्छन्–पछि गाई पालेर बस्न सक्छु

कान्तिपुर संवाददाता

काठमाडौँ — गाईपालन र दुध बिक्री काँठ क्षेत्रको पुरानो पेशा नै हो । अचेल बाहिरबाट शहर भित्रिएकाहरूले पनि व्यवस्थित रुपमा फार्म बनाएरै गाइपालन थालेका छन् ।

राजधानीमा बिहीबार ‘गोपी’ का कलाकारहरू (बायाँबाट) वर्षा राउत, विपिन कार्की र सुरक्षा पन्त । तस्बिर : कान्तिपुर

काँठको यस्तै एउटा परिवारमाथि केन्द्रित रहेर बनाइएको फिल्म ‘गोपी’ मा ग्रीनकार्ड सपना त्यागेर गाईपालक बन्ने एक युवकको चरित्रमा छन् अभिनेता विपिन कार्की । फिल्मबारे जानकारी दिन राजधानीमा बिहीबार आयोजित पत्रकार सम्मेलनमा विपिनले आफू खेतीकिसानीबाटै आएको र भविष्यमा गाइपालक भएर बस्ने सक्ने समेत बताए ।

Citizen


‘फिल्ममा गाइपालकको चरित्र गर्दैगर्दा मलाई खासै अप्ठ्यारो लागेन’, उनले भने, ‘बरु मलाई जीवनको नजिक पुगेको महसुस भयो । भविष्यमा गाईपालक बनेर बस्न पनि सक्छु ।’

विपिनले कुनै समय आफूले घाँस काटेको, कुँडो पकाएको र स्कुल जाँदा दूध बोकेर डेरीसम्म पुगेको क्षण सम्झे । ‘एक हिसाबले त यो फिल्म मेरो आफ्नै कथा जस्तै लाग्छ’, उनले भने, ‘यद्यपि मुलुकमै केही गर्छु भन्ने आम युवाको कथा हो यो ।’

विपिनको तर्कलाई समर्थन गर्दै फिल्मका निर्देशक दीपेन्द्र लामाले युवाहरू विदेश पलायन भइरहेको सन्दर्भमा मुलुकमै केही गर्छु भन्ने दृष्टिकोणलाई प्रवद्र्धन गर्न फिल्म बनाइएको बताए । ‘यो फिल्मले युवाहरूलाई सकारात्मक मनोविज्ञान दिन्छ । मुलुकमै केही गरौं भन्ने उत्प्रेरणा दिलाउँछ’, उनले भने, ‘विपिनले गरेको कामप्रति सन्तुष्ट छु । एउटा शिक्षित युवाको गाईपालन र उनका बुवाको ग्रीनकार्डको सपनाबीचको द्वन्द्वलाई फिल्ममा देखाउने प्रयास गरेको छु ।’

दीपेन्द्रको यो दोस्रो फिल्म हो । यसअघि उनले अन्तरजातीय विवाहको कथामाथि ‘घामपानी’ बनाएका थिए । दोस्रो फिल्म ‘गोपी’ मा उनले राष्ट्रिय पुँजी निर्माणमा घरेलु उद्योगको महत्त्व र त्यसमा युवा सहभागिताको अपरिहार्यतालाई उठाएका छन् । फिल्ममा गाईपालन व्यावसाय, त्योसँग सम्बन्धित अनेक पात्रका उतारचढाव र मानवीय भावनासँगै गाईसँगको मानवीय संवेदना र दैनिकी प्रस्तुतगरिएको छ ।

‘गाईलाई नै पात्रको रुपमा फिल्ममा पाउनुहुन्छ’, फिल्मका पटकथाकार सामीप्यराज तिमल्सिनाले भने, ‘मूलधारको फिल्ममा यो आफैँमा अग्र्यानिक कथा हो ।’

फिल्ममा अभिनेता विपिनसँग अभिनेत्रीहरू वर्षा राउत र सुरक्षा पन्तको रोमान्स समेत छ । पत्रकार सम्मेलनमा वर्षा र सुरक्षाले आफूहरूले ‘गोपी’ मा फरक भूमिका गरेको दाबी गरे । फिल्ममा सुरक्षा विपिनकी प्रेमिकाका रूपमा छिन् । उनले ‘गोपी’ जस्तो फरक विषयवस्तुमा बनेको फिल्मका लागि आफू सधैँ तयार रहेको बताइन् ।

आउँदो माघ १८ मा रिलिज हुने भनिएको फिल्ममा भोलाराज सापकोटा, अंकित खड्का, प्रकाश घिमिरे, रमेश अधिकारी, सरोज अर्याल, कमलमणि नेपाल, हिउँबाला गौतमको पनि अभिनय हेर्न सकिन्छ ।

प्रकाशित : पुस २७, २०७५ ०८:३६
प्रतिक्रिया
पठाउनुहोस्

काबेली करिडोर निर्माणमा अवरोध

विप्लव भट्टराई

इलाम — पूर्वी पहाडी जिल्लामा उत्पादित विद्युत्‌लाई केन्द्रीय प्रसारणमा जोड्ने काबेली करिडोर निर्माण अन्तिम चरणमा पुगे पनि वनका कारण अवरोध पुगेको छ ।

इलामको गोदकस्थित काबेली करिडोरअन्तर्गत निर्माण भएको सबस्टेसन । करिडोरको काम अन्तिम चरणमा पुगे पनि पाँचथर र तेह्रथुममा वनको अवरोधका कारण समस्या भएको छ । तस्बिर : विप्लव/कान्तिपुर

अधिकांश काम सक्न लागेको आयोजनामा निर्माणमा पाँचथरको जोरसाल र तेह्रथुमको अठाराईमा समस्या भएको हो । यी क्षेत्रमा रूख कटान गरी आयोजना निर्माणलाई सहज बनाउन मन्त्रिपरिषद्ले गत मंसिर १० गते निर्णय गरेको थियो । तर सम्बन्धित जिल्लाका वन कार्यालयले कार्यान्वयन गर्न ढिलाइ गर्दा आयोजनाको काम प्रभावित भएको हो ।

आयोजनाको दोस्रो खण्डअन्तर्गत पाँचथरको जोरसालमा ६ सय २२ वटा र पाँचथरकै हिलिहाङ गाउँपालिका पिनासेमा ५३ रूख काट्नुपर्छ । यी रूख सामुदायिक र सरकारी वनमा छन् । त्यस्तै तेह्रथुमको आठराईमा करिब १ सय रूख काट्नुपर्छ । निजी वनमा सालका रूख भएकाले पनि झन्झट थपिएको हो ।

‘वनको अवरोध हटे १ महिनामा सबै काम पूरा हुन्छ,’ आयोजना प्रमुख दीपेन्द्रराज द्विवेदीले भने, ‘तर मन्त्रिपरिषद्ले निर्णय गरे पनि सम्बन्धित कार्यालयबाट कार्यान्वयन नहुँदा समस्या छ । निर्माण सुरु भएको १२ वर्षपछि १३२ केभीए विद्युत् प्रसारण लाइन सम्पन्न हुन लाग्दा आयोजनाले यो अवरोध खेप्नुपरेको हो । यसअघि पनि राइट वेको झन्झट, ठेकेदारको ढिलासुस्ती, वन कार्यालयसँगको समन्वय अभाव र प्रसारण लाइनका ठाउँठाउँमा आएका विवादका कारण आयोजना अवधि लम्बिएको हो ।

अवरोध भएको क्षेत्रमा केही टावर निर्माण भइसकेका छन् भने अधिकांशको फाउन्डेसन तयार भएको आयोजनाको भनाइ छ । आयोजनामा तार टाङ्न रूख कटान नहुँदा अवरोध पुगेको द्विवेदीको भनाइ छ । निर्माण प्रक्रिया सुरु भएको १२ वर्षमा आयोजना निर्माणको काम सम्पन्न हुन लागेको हो । निर्धारित समयमा काम सम्पन्न नभएपछि ४ पटक म्याद थपेर आयोजनाको कामलाई पूर्णता दिन लागिएको हो । चौथोपटक थपिएको म्याद पनि अर्को महिना सकिँदै छ ।

३ खण्डमा विभाजन गरी ९० किमि डबल सर्किट लाइन निर्माण अघि बढाइएको हो । आयोजनाको पहिलो खण्ड झापाको लखनपुरदेखि इलामको गोदकसम्मको काम २ वर्षअघि पूरा भएको हो ।

पहिलो खण्डमा करिडोर सञ्चालनमा आइसकेको छ । इलाममा उत्पादित विद्युत् करिडोरको गोदकस्थित सबस्टेसनबाट केन्द्रीय लाइनमा पुर्‍याइएको छ । इलामको सोयाकदेखि पाँचथरको थापाटारसम्मको दोस्रो खण्डको काम पूरा हुन बाँकी छ । मुआब्जा विवाद र रूख कटान आदेश ढिलो पाएपछि यो खण्डको कामले गति लिन नसकेको हो । अहिले विवाद समाधन भएकाले काम अघि बढेको छ । देउमाई नगरपालिका ७, सिद्धिथुम्कामा स्थानीयको अवरोधले ११ टावर बन्न ढिलाइ भएको थियो । त्यस्तै इलामकै चमैता खण्डमा पनि ५ टावर निर्माणमा अवरोध थियो ।

पाँचथरको थापाटार र अमरपुरको दुबीचौरसम्मको पोल निर्माण गर्ने काम अन्तिम चरणमा छ । तीनवटै खण्डमा प्रसारण लाइनका लागि सबस्टेसन निर्माणको काम २ वर्षअघि नै सकिएको छ । विश्व बैंकको २ अर्ब ५८ करोड लगानीमा करिडोर निर्माण थालिएको हो । करिडोर निर्माणका लागि २०६३ मा नेपाल विद्युत् प्राधिकरणसँग सम्झौता भएको थियो । सम्झौता भएदेखि नै करिडोरको काम सुस्त गतिमा अघि बढेको हो । चौथोपटक थपिएको समय सकिन लाग्दा ९५ प्रतिशत काम पूरा भएको आयोजना प्रमुख दीपेन्द्रराज द्विवेदीले जानकारी दिए ।

झापाको लखनपुरदेखि इलामको गोदकसम्म ३४ किमि काम यसअघि नै पूरा भएको हो । यो खण्डमा मात्र आयोजना निर्माण सम्पन्न गर्नुपर्ने अवधिमा पूरा भएको थियो । राजनीतिक अवस्था, ठेकेदारको लापरबाही, भौगोलिक विकटता, राइट अफ वेको विवादले आयोजनाको निर्माण अवधि लम्बिँदै गएको हो ।

विश्व बैंकको २ अर्ब ५८ करोड ४० लाख रुपैयाँ सहयोगमा आयोजना निर्माण सुरु भएको हो । आयोजना निर्माण सुरु भएको छैटौं वर्ष पार गरिसक्दा पनि निर्माण नसकिएपछि गत वर्ष विश्व बैंकले निर्माणबाट हात झिकेको थियो । प्रसारण लाइनअन्तर्गत दमकदेखि पाँचथरको अमरपुरसम्म ९० किमिमा १ सय ३२ केभी डबल सर्किट लाइन निर्माण हुनेछ ।

आयोजनाअन्तर्गत झापाको लखनपुर, इलामको गोदक, पाँचथरको फिदिम र अमरपुरमा सबस्टेसन निर्माण भएका छन् । काबेली करिडोर निर्माण थालेलगत्तै इलाम, पाँचथर र झापामा दर्जनौं निजी क्षेत्रको लगानीमा विद्युत् आयोजना निर्माण थालिएको हो ।

प्रकाशित : पुस २७, २०७५ ०८:३०
पूरा पढ्नुहोस्
प्रतिक्रिया
पठाउनुहोस्