जसले पाए पुनर्जन्म

कान्तिपुर संवाददाता

काठमाडौँ — पहिले क्यान्सर लाग्नु भनेको ढिलो वा चाँडो जीवन गुमाउनु हो भन्ने बुझिन्थ्यो । क्यान्सर निको पार्ने औषधि नभएकाले पनि रोगीले मृत्युसँग आत्मसमर्पण गर्नुको विकल्प थिएन । तर अब अवस्था त्यस्तो रहेन । कैयन् क्यान्सरपीडित उपचारपछि पूर्ण निको भई पूर्ववत् जीवनमा फर्किएका उदाहरण छन् ।

बलिउडमा पनि केही सेलेब्रिटी क्यान्सरपछि तन्दुरुस्त बनेका छन् । अहिले औषधि विज्ञानले क्यान्सर पीडितको जीवनको अन्त्य नै बदल्न सफल भएका छन् ।

बलिउड अभिनेत्री सोनाली बेन्द्रेलाई गत वर्ष क्यान्सरले समात्यो । न्युयोर्कमा उपचार गर्ने क्रममा उनको शरीरमा क्यान्सर चौथो चरणमा फैलिइसकेको पत्ता लागेको थियो । उनलाई मेटास्टेटिस नामक क्यान्सर लागेको थियो । जुन क्यान्सरलाई उच्च जोखिमको मानिन्छ । यस क्यान्सरका सेल शरीरमा एकैठाउँमा रहँदैनन् । खतरनाक मानिएको उक्त क्यान्सरसँग सोनालीले अन्तत: विजय पाइन् । क्यान्सर मुक्त भएपछि सोनालीले इन्स्टाग्राममा पोस्ट राख्दै आफू काममा फर्किएको बताएकी छन् ।

यस वर्ष ‘अन्धाधून’ र ‘बधाई हो’ जस्ता सफल फिल्म दिएर वाहवाही बटुलेका अभिनेता आयुष्मान खुरानालाई पत्नी ताहिरा कश्यपको क्यान्सरले तनाव पनि दियो । उनलाई ब्रेस्ट क्यान्सर भएको हो । यति बेला क्यान्सरसँग लडिरहेकी ताहिरा हालैको ल्याक्मे फेसन विकको र्‍याम्पमा क्याटवाकसहित देखिइन् । सर्ट फिल्मकी निर्देशकसमेत रहेकी ताहिरा मुडुलो टाउकोमा नै र्‍याम्पमा उत्रेकी थिइन् ।

गत वर्ष नै अभिनेता इरफान खान पनि बिरामी परे । उपचारका लागि लन्डन गएपछि उनमा न्युरोएन्डोक्राइन ट्युमर भएको पत्ता लाग्यो । यस खालको ट्युमर शरीरका जुनसुकै भागमा पनि आउन सक्छ । तर सुरुवाती असर भने हार्मोन पैदा गर्ने रक्त कोशिकामा देखिने बताइन्छ । इरफान यसको उपचार सँगसँगै काममा पनि छन् ।

नेपालकी चेली मनीषा कोइरालाको सन् २०१२ मा गर्भाशयमा क्यान्सर भएको पुष्टि भयो । त्यसताक मनीषालाई क्यान्सर भएको खबरले उनका फ्यानलाई समेत बेचैन बनाएको थियो । तर मनीषाले आफूलाई क्यान्सर मुक्त गराउन सफल भइन् र फिल्ममा समेत कमब्याक भइन् । ‘मलाई लागेजस्तो क्यान्सर कहिलेकाहीं फेरि फर्कन पनि सक्छ । तर हामी जुनसुकै अवस्थामा पनि सकारात्मक रहनुपर्छ तब मात्रै यस्ता बिमारीलाई हराउन सक्छौं,’ मनीषाले भनेकी छन् । क्यान्सर मुक्त भएपछि मनीषाका ‘डियर माया’ र ‘सन्जु’ फिल्म आइसकेका छन् । ‘सन्जु’ मा त उनले प्याङ्क्रियाटिक क्यान्सरका कारण जिन्दगी गुमाएकी सञ्जय दत्तकी आमा नरगिसको भूमिका निर्वाह गरेकी छन् ।

बलिउडमा क्यान्सर हुने सेलेब्रिटीको लिस्टमा निर्माता/निर्देशक राकेश रोशन पनि छन् । ‘बर्फी’ फिल्मका निर्देशक अनुराग बसु पनि कुनै बेला क्यान्सर पीडित थिए । सन् २००४ मा ‘तुम सा नहीं देखा’ बनाउने क्रममा अनुरागलाई ल्युकिमिया क्यान्सर भएको थाहा भयो । त्यसपछि उक्त फिल्मलाई महेश भट्ट र मोहित सूरीले पूरा गरे भने अनुरागले निरन्तर तीन वर्ष उपचारमा बिताए ।

क्यान्सर मुक्त भएपछि उनलाई अमेरिकन क्यान्सर सोसाइटीले क्यान्सर सर्भाइवरको अवार्ड समेत दियो । त्यसैगरी क्रिकेटर युवराज सिंह, अभिनेत्री लिजा रे पनि क्यान्सरलाई जितेर पुरानै लयमा फर्केका सेलेब्रिटीमा पर्छन् ।

प्रकाशित : माघ २२, २०७५ ०८:२४
प्रतिक्रिया
पठाउनुहोस्
ADVERTISEMENT
ADVERTISEMENT

भेनेजुएला संकट : गुआइडोलाई ईयू राष्ट्रको समर्थन 

एएफपी

ब्रसेल्स/काराकस — बेलायत, फ्रान्स, जर्मनी र अन्य युरोपेली देशले भेनेजुएलाका विपक्षी दलका नेता खुवान गुआइडोलाई अन्तरिम राष्ट्रपति स्वीकार गरेका छन् । 

भेनेजुएलाको राजधानी काराकसमा विपक्षी नेता खुवान गुआइडो समर्थकहरूले राष्ट्रपति निकोलस मडुरोको विरोधमा गरेको प्रदर्शन । तस्बिर : रोयटर्स

ईयू (युरोपेली संघ) ले भेनेजुएलाका राष्ट्रपति निकोलस मडुरोलाई निर्वाचनको मिति घोषणा गर्न एक साताको समय दिएका थिए । तर उक्त अवधिभित्र मडुरोले चुनाव घोषणा नगरेपछि ईयू राष्ट्रहरूले विपक्षी नेतालाई अन्तरिम राष्ट्रपतिमा स्वीकारगरेका हुन् ।
राष्ट्रपति मडुरोको पक्षमा उभिएको रुसले ‘युरोपेली देशले अनावश्यक हस्तक्षेप गरेको’ भन्दै समर्थनको विरोध जनाएको छ । उसले उक्त कदम ‘गैरकानुनी रूपमा सत्ता हत्याउने प्रयास’ भएको दाबी गरेको छ ।

विपक्षी नेता गुआइडोले गत जनवरी २३ मा एक बृहत् र्‍यालीबीच अन्तरिम राष्ट्रपति घोषणा गरेका थिए । त्यसलगत्तै अमेरिका, क्यानडा, अस्ट्ेरलिया र केही ल्याटिन अमेरिकी देशले गुआइडोलाई समर्थन जनाएका थिए । उनले राष्ट्रपति निकोलस मडुरोलाई सत्ताबाट हटाई आफ्नो नेतृत्वमा सरकार गठन गरी चुनाव गर्ने बताउँदै आएका छन् ।

स्पेनी सरकारको आधिकारिक समर्थन जनाउने क्रममा प्रधानमन्त्री पेद्रो सान्चेजले गुआइडोलाई यथाशक्य चाँडो निर्वाचन गर्न आग्रह गरे । उनले गुआइडोलाई भने, ‘जतिसक्दो चाँडो चुनाव घोषणा गर्नुस् । चुनाव स्वतन्त्र र लोकतान्त्रिक हुनुपर्छ ।’ सान्चेजले भेनेजुएलाका लागि ईयू र राष्ट्रसंघमार्फत मानवीय सहयोगका लागि पहल गर्ने समेत आश्वासन जनाए ।

बेलायती विदेशमन्त्री जेरेमी हन्टले टवीटरमार्फत ‘पछिल्लो कदमले भेनेजुएलामा मानवीय संकट अन्त्य हुने विश्वास’ व्यक्त गरेका छन् । त्यसैगरी, फ्रान्स, अस्ट्रिया, स्वीडेन र डेनमार्कले पनि गुआइडोलाई समर्थन जनाएका छन् ।

फ्रान्सका राष्ट्रपति एम्यानुएल म्याक्रोंले ‘भेनेजुएली जनतालाई स्वतन्त्रतापूर्वक र लोकतान्त्रिक रूपमा आफ्नो विचार अभिव्यक्त गर्ने अधिकार भएको’ बताए ।

एक स्पेनी टेलिभिजनलाई दिएको अन्तर्वार्तामा राष्ट्रपति मडुरोले आफू कुनै पनि राष्ट्रको दबाबले नझुक्ने बताएका थिए । ‘युरोपेली सुंघले किन पहिले नै चुनाव भएको देशलाई पुन: गराउन भन्छ ? किनकि त्यहाँ आफ्नो समर्थक पराजित भएको छ,’ मडुरोले काराकसमा अन्तर्वार्ताका क्रममा भने ।

मडुरोले अमेरिका र उसका मित्रशक्तिका क्रियाकलापले देशमा गृहयुद्ध सुरु हुनसक्ने बताए । उनले आफ्नो देशमाथि अनावश्यक हस्तक्षेप गरिरहेको भन्दै अमेरिका र उसका मित्रशक्ति देशको कडा आलोचना गरे । ‘हामी आफ्नो देशमा बस्छौं र कसैले हस्तक्षेप नगरोस् भन्ने चाहन्छौं । तर हामी प्रतिरक्षा गर्न सक्षम र तयार छौं,’ मडुरोले भने । अन्तर्वार्ताका क्रममा उनले अमेरिकी राष्ट्रपति डोनाल्ड ट्रम्पले भेनेजुएलामा हस्तक्षेप गरे उनले रक्ताम्य हात लिएर ह्वाइटहाउस छोड्नुपर्ने चेतावनी समेत दिए ।

सन् २०१३ यता सत्तामा रहेका मडुरोको शासनकालमा भेनेजुएलाले मुद्रास्फिति, खाद्यपदार्थ तथा औषधिको अभावका साथै गम्भीर आर्थिक संकटको सामना गरिरहेको छ । राष्ट्रसंघका अनुसार विगत ३ वर्षमा करिब २३ लाख मानिसले भेनेजुएला छाडिसकेका छन् ।
यसैबीच, क्यानडाका प्रधानमन्त्री जस्टिन ट्रुडोले विपक्षी नेता गुआइडोको ‘साहस र नेतृत्वको’ प्रशंसा गरेका छन् ।

गुआइडोले एक अन्तर्राष्ट्रिय गठबन्धनमार्फत देशमा मानवीय सहायता भित्र्याउने बताएका छन् । उनले मडुरोलाई सत्ता छोड्न दबाब जारी राख्ने बताएका छन् । गुआइडोले अमेरिकाबाट मानवीय सहयोग प्राप्त हुने मिति घोषणा गर्ने अपेक्षागरिएको छ ।

गुआइडोले कम्तीमा ३ लाख मानिसहरू ‘मुत्युको मुखमा रहेको’ दाबी गर्दै मानवीय सहयोगको याचना गरेका हुन् । उनले मडुरोको विपक्षमा आगामी मंगलबार हुने बृहत् प्रदर्शनमा सहभागी हुन समर्थकलाई आहवान गरेका छन् ।

गतवर्ष भएको विवादास्पद चुनावमार्फत राष्ट्रपतिमा निर्वाचित मडुरोले गत जनवरी १० मा दोस्रो कार्यकालका लागि शपथ लिएपछि भेनेजुएलामा विरोध प्रदर्शन जारी छन् । मडुरोमाथि गत वर्ष भएको राष्ट्रपतीय चुनावमा धाँधली गरेर जितेको आरोप छ ।

अमेरिका राष्ट्रपति डोनाल्ड ट्रम्पले वासिङटनमा बोल्दै ‘भेनेजुएलाको संकट अन्त्य गर्न सैनिक हस्तक्षेपको विकल्प खुला रहेको’ प्रतिक्रिया दिएका छन् । यद्यपि, गुआइडोलाई अन्तरिम राष्ट्रपतिमा समर्थन जनाउने सबैजसो देशको आँखा भेनेजुएलाको सेनातर्फ सोझिएका छन् ।

राष्ट्रपति मडुरोलाई सेनाको समर्थन रहेको छ । गत बुधबार भेनेजुएलाको सर्वोच्च अदालतले विपक्षी नेता गुआइडोलाई देश छाड्न र आफ्नो बैंक खाता सञ्चालन गर्न प्रतिबन्ध लगाएपछि अमेरिकाले उनको बचाउ गर्दै मडुरोलाई चेतावनी दिएको थियो । अमेरिकी राष्ट्रिय सुरक्षा सल्लाहकार जोन बोल्टनले गुआइडोमाथि कुनै पनि हानि गरे अमेरिका चुप नलाग्ने बताएका थिए ।

प्रकाशित : माघ २२, २०७५ ०८:२३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT