नेपथ्यले उराल्यो दुबई

त्यसअघि नै अमृतले सामाजिक सञ्जालमा एउटा छोटो भिडियो हाल्दै त्यसरी नै लेखेका थिए, ‘सबैभन्दा पहिले हामी..., धन्यवाद दुबई, माया र साथका लागि’ केही समयपछि ‘अल नासेर लिजर ल्यान्ड’ को मञ्चमा बसेका कलाकार र दर्शकदीर्घा पूरै नचाउँदै गुन्जियो, ‘तिमी पनि नेपाली, म पनि नेपाली, हामी नेपाली...।’ गीतमार्फत नेपालीपनको भावना यसरी बलियोसँग जगाइदिएका अमृतले त्यसबाहेक नेपाली डाँडाकाँडाबाट संकलन गरिएका लोकधुनमा आधारित नेपथ्यका गीत क्रमैसँग गाए । नेपालयको विज्ञप्तिअनुसार ‘गुरुङको प्रस्तुतिले सम्पूर्ण अवधिभर दर्शकलाई बाँधिराख्यो ।’

विज्ञप्तिअनुसार दर्शकदीर्घामा आयुषमान डंगोल पनि देखिन्थे । उनी सारजहाँस्थित एयर अरेबियाका पाइलट हुन् । आयुषसँगै उनका ‘एयर होस्टेस’ साथी सुस्मिता ताम्राकार पनि थिइन् । ‘दुबईमा नेपाली कार्यक्रमलाई खासै महत्त्वका साथ नहेरिने गरेको अवस्थामा नेपथ्य यति राम्रोसँग प्रस्तुत हुँदा एक राष्ट्रिय गौरवबोध भएको छ,’ आयुषले भने । आयुष बितेको तीन वर्षदेखि एयर अरेबियाको विमान उडाउँदै आइरहेका छन् भने सुस्मिताको ११ वर्ष बितिसकेको छ । कार्यक्रम अवधिभर अन्य दर्शकहरूजस्तै यी दुई जना पनि साथसाथै नाचिरहेका र गाइरहेका देखिन्थे । कार्यक्रमका बेला अल नासेरको पार्किङ थलो कारले टनाटन भरिएको विज्ञप्तिमा जनाइएको छ ।

‘संयुक्त अरब इमिरेट्सभरि छरिएर रहनुभएका नेपालीबाट प्राप्त माया र सद्भावका निम्ति हामी आभार प्रकट गर्दछौं,’ आयोजक कमिटीका सुजन राजाले विज्ञप्तिमार्फत भने, ‘आबुधाबी, सारजहाँ र रस अल खइमाजस्ता छेउछाउका राज्यबाट पनि बस रिजर्भ गरेरै टनाटन दर्शक ओइरिएका थिए ।’ दुबईमा नेपथ्यको यो दोस्रो प्रस्तुति थियो । यसअघि सन् २०१५ को भुइँचालो लगत्तै पूर्वनिर्धारित कार्यक्रम भ्याउन आइपुगेको ब्यान्डले आफूलाई खुलेर प्रस्तुत गर्न सकेको थिएन ।

दुई घण्टासम्म लगातार चलेको कन्सर्ट राष्ट्रिय भावना र लोकलयमा आधारित आवाजको मिश्रण थियो । सो अवधिमा ‘रेशम’ र ‘तालको पानी’ ले जसरी दर्शकलाई उल्लासले बुरुक्क बुरुक्क उफारेको थियो त्यसैगरी ‘यो जिन्दगानी...’, ‘मै मरी जाउँला...’ र ‘कोसीको पानी...’ले भावुक बनाएको थियो । त्यसपछि स्वदेश र आफ्नो समाजलाई सम्झाउँदै ‘हामी नेपाली...’, ‘गाउँगाउँबाट उठ...’ र ‘रातो र चन्द्रसूर्य...’ ले नेपालीपनको भावनासहित कन्सर्टलाई बिट मारेको थियो । अमृतलाई ड्रमसेटमा ध्रुव लामा, किबोर्डमा सुरज थापा, बेस गितारमा सुविन शाक्य, गितारमा नीरज गुरुङ र मादलमा शान्ति रायमाझीले सघाएका थिए ।