चित्त बुझे विवाह चाँडै

सन् २०११ मा ‘लेडिज भर्सेस रिक्की बहल’ बाट सनसनीपूर्ण डेब्यु गरेर एकपछि अर्को हिट फिल्म दिएकी यिनै अभिनेत्री तीन वर्षदेखि शान्त देखिएकी छन् । तर अब भने फेरि लाइमलाइटमा आउने संकेत देखाएकी छन् । अनुराग सिंहको निर्देशन रहने ‘केशरी’ मा अभिनेता अक्षय कुमारसँग देखिन लागेकी परिणीतिले पुनः बलिउडमा हालीमुहाली गर्ने सम्भावना देखाएकी छन् ।

उमेरले ३० पुगे पनि उनी अहिल्यै विवाह गरेर घरजम गर्ने पक्षमा छैनन् । बरु अझै करिअरका लागि बलिउड नछोड्ने धुनमा छिन् । हालैको एक अन्तरक्रियामा पनि परिणीतिलाई मनीष शर्मा र चरित देसाईसँगको सम्बन्धबारे चलेका हल्लाबारे खुलस्त पार्न आग्रह गरिएको थियो । तर अभिनेत्रीले भने आफू प्रेमसम्बन्धका बारेमा बोल्न नचाहेको बताइन् । ‘म यति बेला मेरो प्रेम जीवनबारे बोल्न तयार छैन । अहिले त्यसबारे भन्ने उचित समय पनि हैन । जब हुन्छ, तब आफसे आफ म नै यो कुरा भन्नेछु । कतिपयलाई लाग्दो हो, यसले कुराहरू लुकाउन खोजिरहेकी छे । तर त्यस्तो हैन,’ उनले भनिन् ।

अभिनेत्री चोपडाले त भन्दै नभनेका सम्बन्धबारे पनि मिडियाले उछाल्ने गरेको आरोप लगाउँदै भनिन्, ‘यो सम्बन्धमा छे कि सिंगल नै छे भन्ने सबै चासो केवल मिडियालाई मात्रै हुन्छ । जब कि त्यसबारे सम्बन्धितले केही भनेको पनि हुँदैन, मिडियामा अनेक खबर आउँछन् । त्यसले पनि यस्ता कुरामा चुप बसेकै बेस लाग्छ मलाई ।’ त्यसो भए उनले तत्काल विवाहका बारेमा सोचेकै छैनन् त ? ‘छु नि, किन छैन ? तर मेरा लागि प्रेम ठूलो कुरा हो । जब कसैसँग प्रेमकै कारण मनस्थिति बन्छ तब मात्रै विवाह गर्नेछु । न कि उमेर पुग्यो भनेर वा यो बेलामा गर्नु उपयुक्त छ भन्ने ठानेर विवाहका लागि होमिन्नँ । यदि म मानसिक रूपले तयार भएँ भने भोलि नै पनि हुन सक्छ । यदि छैन भने पाँच वर्षसम्म पनि हुँदैन ।’