आफूमाथिको आरोप प्रायोजित : संगीतकार सापकोटा

'१४ वर्षीया स्टार गायिका भन्छिन्, 'गीतको पारिश्रमिक एक तोलाको सिक्री दिन्छु भन्नुहुन्थ्यो, दिनुभएको छैन' शीर्षकको समाचार कान्तिपुरको अनलाइन संस्करणमा प्रकाशन भएपछि प्रतिक्रिया दिँदै संगीतकार सापकोटाले समिक्षाले लगाएको आरोपको खण्डन गरेका हुन् ।

‘नवप्रतिभालाई स्थान दिँदा यस्तो आरोप खेप्नुपर्छ भने अब मैले के गर्ने ?’ कान्तिपुरसँग कुरा गर्दै सापकोटाले भने, ‘समिक्षालाई यहाँसम्म ल्याउन मैले झण्डै डेढ लाख खर्च गरेको छु । प्रमाण माग्नुहुन्छ भने देखाइदिन सक्छु । ३८ हजार पर्ने मोबाइल उपहार दिएको त युट्युबमा पनि हेर्न सक्नुहुन्छ । मैले चोरेर ल्याएको त होइन होला नि ?’

आफूले अभिभावकको भूमिका निर्वाह गर्छु भन्दा यस्तो स्थिति आइपरेको उनले बताए । ‘एउटा बुवा जस्तो मान्छेले एउटा सन्तान जस्तो मान्छेलाई तेरो लागि यति खर्च लाग्यो भनेर माग्ने र तैले यति काम गरिस् भनी पारिश्रमिक तोक्ने कुरा त हुन्न होला नि ?’ उनले भने । आफू यस विषयमा बोल्न नचाहे पनि बोल्न बाध्य भएको सापकोटाले बताए ।