शुभबहादुरको स्याक्सोफोनले मन्त्रमुग्ध

प्रस्तुतिको नाम दिइएको थियो– स्याक्समान्डौं । प्रस्तुतिको पहिलो चरणमा संगीतकार सुनामले नेपाली र अंग्रेजी गरेर आठ गीतको धुन स्याक्सोफोनमार्फत प्रस्तुत गरे ।

उनले ‘मलाई नसोध कहाँ दुख्छ घाउ...’, ‘राजमति कुमति...’, ‘आँखा छोपी नरोऊँ भनी...’, ‘हुँ यात्री एउटा...’, ‘उकाली ओरालीहरूमा...’ लगायतका गीतलाई स्याक्सोफोनको धुनमा उर्तादा दर्शकदीर्घाबाट अग्रज गायक प्रेमध्वज प्रधान, गीतकार यादव खरेलदेखि काठमाडौं महानगरपालिकाका मेयर विद्यासुन्दर शाक्यसम्मले ताली बजाए । नाचघरकै कलाकारले उनलाई वाद्यवादनमा साथ दिएका थिए ।

सुनामले ‘टाइटानिक’ फिल्मको ‘माई हार्ट विल गो अन...’, ‘गोइ्ङ होम...’ जस्ता गीतलाई पनि स्याक्सोफोनमार्फत प्रस्तुत गरे । यसपछि उनले ‘पिङ प्यान्थर...’, ‘समर टाइम...’ जस्ता धुन पस्के । नेपाली धुन ‘गोरेटो यो गाउँको...’ ‘रेलिमाई रेलिमाई...’ प्रस्तुत गर्दा पनि सुनामले ताली पाए ।

स्याक्सोफोनमा पाँच दशकको अनभुव बटुलेका सुनामले सात सयभन्दा बढी गीतमा संगीत गरिसकेका छन् । अधिकांश नेपाली गीतमा स्याक्सोफोन वादन उनैले गर्दै आएका छन् ।

कार्यक्रममा शुभबहादुरकै संगीतमा नाति रोमिल सुनामले ‘लभ विल...’ र ‘स्ट्यान्ड बाई मी...’ गाए भने गायिका सृष्टि केसीले पनि स्याक्सोफोनकै धुनमा अंग्रेजी गीत ‘बोनिता...’ गाइन् । त्यस्तै अमुल कार्की ढलीको समूहले ‘सङबर्ड...’, ‘स्टिल अन माई माइन्ड...’ र ‘डिस प्यासिटियो ...’ जस्ता गीतका धुन स्याक्सोफोनमार्फत प्रस्तुत गर्‍यो । सांस्कृतिक संस्थान (नाचघर) का महाप्रबन्धक राजेश थापाले वाद्यवादन कलाको प्रवर्द्धन गर्न कार्यक्रम गरिएको बताए ।