नेपालीलाई लाग्यो मिस इंग्ल्यान्ड

कान्तिपुर संवाददाता

लन्डन — करिब २२ हजार आवेदकमध्येबाट छानिएर ’मिस इंग्ल्यान्ड प्रतियोगिता–२०१९’ को अन्तिम चरणमा पुगेकी नेपाली चेली प्रतिष्ठा ‘तृष’ राउतलाई जिताउन नेपाली समुदाय जुटेको छ । बेलायतको एउटा प्रतिष्ठित सौन्दर्य प्रतियोगितामा पहिलो पटक नेपाली प्रतिस्पर्धी त्यो चरणसम्म पुग्नुलाई बेलायतस्थित नेपाली डायस्पोराले गर्वका रूपमा लिएको छ । 

अल्डरसट निवासी २६ वर्षीया प्रतिष्ठा भूपू गोर्खा प्रकाश राउतकी छोरी हुन् । गोर्खा पृष्ठभूमिबाट भएकाले पनि उनको जित सुनिश्चित गर्न नेपाली र गोर्खा समुदाय लागेका छन् । ‘उनको जित केवल राउत परिवारको मात्र होइन, यो नेपालकै गर्वको विषय हुने छ,’ शनिबार प्रतिष्ठाकै सहयोगार्थ आयोजित च्यारिटीका एक संयोजक सामाजिक अभियन्ता रामशरण सिंखडाले भने, ‘उनको च्यारिटीलाई सहयोग गरेर वा मत दिएर जिताउन हामी सामूहिक पहलमा लागेका छौं ।’

लन्डन हयारोमा आयोजित च्यारिटी डिनरमा करिब १० हजार पाउन्ड सहयोगको प्रतिबद्धता आएको संयोजक सिंखडाले जानकारी दिए । क्षेत्री समाज यूके, इन्टेक १९८२ लगायत संस्थाबाट संस्थागत र अन्य व्यक्तिगत सहयोग अप्रत्याशित रूपमा पाएपछि आशावादी थिइन् प्रतिष्ठा । पेसाले आर्किटेक्ट प्रतिष्ठाले मानसिक स्वास्थ्य सचेतना र त्यस समस्याबाट पीडित व्यक्तिको सहयोगका लागि च्यारिटी जुटाइरहेकी छन् ।

प्रभावकारी च्यारिटी कामले प्रतियोगीलाई ‘ब्युटी विथ पर्पोज’ टाइटिल जिताउने छ । ‘मानसिक स्वास्थ्यलाई मानिसले सहज रूपमा लिइरहेका छन् । तर, यसको पीडा त्यसलाई मात्र थाहा हुन्छ जसले प्रत्यक्ष भोगेको छ,’ आँसु झार्दै भावुक बनेकी प्रतिष्ठाले भनिन्, ‘म यस प्रतियोगिताभर मात्र होइन, भविष्यमा पनि मानसिक स्वास्थ्यबाट पीडित व्यक्तिको सहयोग र जनचेतना जगाउन लागि पर्ने छु ।’

५४ प्रतिस्पर्धीबीच १० राउन्डमा मिस इंग्ल्यान्ड २०१९ फाइनल यही ३१ जुलाई र १ अगस्टमा न्यु क्यासल अपन टाइनमा हुने तयारी छ । ३१ जुलाईमा स्पोर्टस डे र सौन्दर्यसम्बन्धी परीक्षा अनि भोलिपल्ट ‘ग्र्यान्ड फिनाले’ हुने आयोजकले जनाएका छन् ।

सबै प्रतियोगी फाइनल क्याटाकमा देखिने छन् भने क्रमशः टप २० र टप ५ छानिने छ । १ अगस्ट बिहीबार १२ बजेसम्म भोटिङ समय–सीमा छ । प्रतिष्ठाले ‘मिस इंग्ल्यान्ड ४२ टु ६३३३३ मा टेक्सट’ गरेर वा अनलाइन भोटमार्फत सहयोग गर्न पनि अपिल गरेकी छन् ।

प्रकाशित : श्रावण ५, २०७६ ०८:०८
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

मूर्तिमा मोह

सुम्निमा चाम्लिङ

इटहरी — खोटाङ रतन्छाकी रेनुका तिम्सिनाको बाल्यकालदेखि किशोरावस्थासम्म घाँस–दाउरामै बित्यो । बाह्र वर्षको कलिलो उमेरमै विवाह भयो । सानैदेखि चित्र कोर्ने रहर मनमै सीमित रहृयो । ७० वर्षीया उनी यति बेला, इटहरीमा जारी मूर्तिकला कार्यशालामा रमाउँदै छिन् । चित्र सिक्ने अधुरा सपना मूर्तिकलामा पोख्ने कोसिस गर्दै छिन् । 

रोचक के भने मूर्तिको विषय चाहिँले उनले जाँतोलाई बनाइन् । ‘जीवनको लामो समय ढिकीजाँतोमै बित्यो,’ अनुहार हँसिलो बनाउँदै उनले भनिन्, ‘नयाँ पुस्ताले जाँतो बिर्संदै गएको छ । त्यसैले यसैको मूर्ति बनाएकी हुँ ।’ हुन त मूर्तिकार विक्रमश्री उनकै जेठा छोरा हुन् । अन्य दुई जना छोरासमेत मूर्तिकार तथा चित्रकार छन् । यद्यपि छोराहरूको काम बुझ्ने मौका उनलाई कहिल्यै जुरेन । कार्यशालामा उनले दिवंगत छोरीको स्मृतिमा पनि मूर्ति बनाएकी छन् । ७० वर्षको उमेरमा आफ्नै हातले छोरीको आकृति बनाएपछि उनले चार सन्तान पूर्ण भएको महसुस गरेकी छन् ।

बुद्ध भन्नेबित्तिकै पुरुषको आकृति मानसपटलमा आउने गर्छ । इटहरीकी यशोदा लम्सालले भने देवीको आकृति झल्कने गरी वृद्ध बनाएकी छन् । बुद्धका दुई आँखा बन्द छन्, तेस्रो आँखा भने खुल्ला छ । तेस्रो आँखाको माध्यमबाट संसार हेरिरहेको भावलाई मूर्तिमा ढाल्न चाहेको लम्सालले बताइन् ।

उनको मूर्तिमा बुद्धले शिरमा मुकुट र शरीरमा गरगहना लगाएका छन् । झट्ट हेर्दा राजासी ठाँटमा बसेको देखिन्छ । उनका विचारमा बुद्ध कसैले पनि देखेका छैनन् । कल्पना गरेको आधारमा चित्र कोरिएको हो भन्ने उनको बुझाइ छ । ‘बुद्धको वास्तविक आकृति छैन,’ उनले भनिन्, ‘मेरो मस्तिष्कले जस्तो सोच्यो, त्यस्तै बनाएँ ।’

तेह्रथुम आठराईकी १५ वर्षीया अनिसा इस्बो कार्यशालामा सहभागीमध्ये सबैभन्दा कान्छी हुन् । कक्षा १० मा अध्ययन गर्दै आएकी उनी मूर्तिकला सिक्नका तेह्रथुमबाट इटहरी आएकी हुन् । असारे बिदामा कार्यशाला सुरु भएकाले उनले स्कुल छुटाउन परेन । उनले फुर्सद हुनेबित्तिकै घर लिप्ने माटो लिएर गणेश तथा बुद्धका मूर्ति बनाउने गरेको बताइन् । एसईई पूरा गरेपछि ललितकला पढ्ने उनको योजना छ । कार्यशालामा उनले पनि बुद्धको मूर्ति बनाइन् ।

दोस्रो चरणमा भने उनले एक आदिवासी युवतीको मूर्ति बनाएकी छन् । उनले बनाएको मूर्ति कसैको हुबहु आकृति भने होइन । कल्पना गरिएको आकृति हो । कार्यशालामा सहभागी भएर धेरै कुरा सिक्न पाएको बताइन् । ‘घरमा हुँदा हातले सिधै मूर्ति बनाउँथें,’ उनले भनिन्, ‘यहाँ आएपछि टुल्स चलाउन जाने । मूर्ति बनाउनुअघिका प्राविधिक ज्ञान पाएँ ।’

यस्तै, कानेपोखरी ५ मोरङकी हेमा सुनुवार राई कार्यशालामा सगरमाथा चढ्ने पहिलो नेपाली महिला पासाङल्हामु शेर्पाको मूर्ति बनाउँदै गरेकी भेटिइन् । उनमा सानैदेखि पासाङप्रति सम्मान थियो । यही सम्मान आफ्नो मूर्तिकलामा पोख्न पाउदा निकै खुसी छिन् ।

प्रदेश नं. १ सरकारको सामाजिक विकास मन्त्रालयले गरेको डेढ महिने आवासीय कार्यशालाको इटहरी मेट्रिक्स र शन्ति निकेतनले संयोजन गरेको छ । कार्यशालामा प्रदेश १ का ३२ जना सहभागी छन् । जसमध्ये चार जना महिला छन् ।

प्रकाशित : श्रावण ५, २०७६ ०८:०७
पूरा पढ्नुहोस्
प्रतिक्रिया
पठाउनुहोस्
ADVERTISEMENT