हिउँले सेताम्मे हेलम्बुको शेर्माथाङ

अनिश तिवारी

मिलारेपा डुप्गाङ (सिन्धुपाल्चोक) — गुम्बै गुम्बाको गाउँ शेर्माथाङ र केही दुरीमा रहेको गुरु रिन्पोछेको सुनौलो मूर्तिछेउ पुग्दा हिउँ फुरुरु झरिरहेको देखिन्थ्यो । मंगलबार बिहानको हलुका वर्षातसँगै हेलम्बु गाउँपालिका क्षेत्रस्थित महायोगी मिलारेपा तपस्यास्थल (डुप्गाङ)गुफा पनि हिउँले सेताम्मे भएको हो ।

‘हिउँ पर्न सुरु भयो, दु:ख बढ्यो । आउँदो सोनाम ल्होसारसम्म यस्तैगरी चिसोले कठ्यांग्रीन पर्छ,’ हेलम्बु गापा १ की ६१ वर्षकी ल्हाक्पाडोल्मा ह्योल्मोले गोवामा आगो झोस्दै भनिन् । भुकम्पलगत्तै टहरा बनाएर सरेको परिवारले तीनवर्षदेखि आहिलेसम्म यसरी नै चिसो कटाउँदै आइरहेको उनले सुनाइन् ।

मिलारेपामा ढेजाङ (छलफल) मा जम्मा भएका सबै छाज्या (नुन चिया) लिँदै चिसोको मारबारे गफिदै गरेका भेटिए । ‘केही वृद्धवृद्धा र बालबालिकालाई समस्या देखिन थालेको छ । हिउँ नभइ नहुने भएपनि दु:ख थपिने,’ उनले भनिन् ।

मिलारेपाक्षेत्रमा झण्डै एकसय घर धुरी छन् । चिसो महिना सुरु भएपछि हिउँले छत ढाकेलगत्तै जिवन कष्टकर बन्छ । ‘अघिल्लो वर्षभन्दा चाँडो हिउँ परेको छ, सबै डाँडाको शिर सेताम्मे हुन पुगेका छन्,’ गुम्बा र प्राचिन ह्योल्मो संस्कृतिले भरिएको शेर्माथाङको बस्ती देखाउँदै टासी दोङबा ह्योल्मोले भने, ‘सबैतिर हिउँ छ, घाम नलागेसम्म निक्लनै सकिँदैन् ।’

जिल्लाभर सोमबार दिउँसोबाट हिमपात भएको थियो भने, हेलम्बुमा मंगलबार बिहान हिमपात भएको हो ।

भोटेकोसी गाउपालिकाअन्र्तगत पर्ने तातोपानीको लिपिङगाउँ, लिस्तीकोट, मार्मिङको गोल्ची, फुल्पिङकट्टी हुँदै जुगलको माथिल्ला बस्ती बाह्रबिसे नगरको घोर्थली, कर्थलीमा बाक्लो हिउँ परेको छ ।

हेलम्बु गाउँपालिकाको वडा १ अध्यक्ष मिङमार लामाले हिउँ पर्नु शुभ रहेको बताउँदै यसलाई पर्यटक आर्कषण गराउने समयको रुपमा लैजाने योजना राखेका छन् । ‘हिउँ पर्ने इलाकामा न्यानो र ह्योल्मो संस्कृतिकै आवास पर्यटकीय कार्यक्रम ल्याइनुपर्छ, यसले दिर्घकालिन समृद्धी ल्याउँछ,’ उनले भने ।

जिल्लाका उच्च पहाडीभन्दा हिमाली भेगमा हिउँले छपक्कै छोपेको छ । पर्यटकीय गाउँ हेलम्बुमा बाहिरबाट हिउँ खेल्न आइरहेका छन् । गाउँपालिकाले हिउँद महिनालगत्तै किउल, तिम्बु, र्तातुङ, लाम्दो, घोप्टेघ्याङ हुँदै पाकेडाँडास्थित ‘सिमिसिदाङ’ हिमाल सम्बन्धी पर्यटकीय कार्यक्रम बनाएको छ । हिमाल हेर्न आउने पर्यटकले शेर्माथाङको बस्तीलाई हिउँले ढाकेको मनमोहक दृश्य देखेर दंग परिरहेका छन् ।



प्रकाशित : पुस २४, २०७५ १३:४९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

कपास फिट्ने मेसिन पड्किँदा १ को मृत्यु, ४ घाइते 

काशीराम डाँगी

रोल्पा — पश्चिमी रोल्पास्थित त्रिवेणी गाउँपालिकाको निगालपानीमा कपास फिट्ने मेसिन पड्केर १ को मृत्यु भएको छ । प्रहरीका अनुसार घटनामा परी ४ जना घाइते छन् । 

मंगलबार बिहान करिब १० बजेतिर उक्त मेसिन जडान गर्ने क्रममा अचानक विस्फोट भएपछि मेसिन जोड्दै गरेका बर्दिया राजापुर ५ निवासी २८ वर्षका जयकृष्ण न्यौपानेको घटनास्थलमै मृत्यु भएको हो । मृतकको पुख्र्यौली घर कालीकोट भएको प्रहरीले जनाएको छ । त्रिवेणी ४ निगालपानीस्थित तुलसीपुर–जुगार मोटरबाटो छेउमै उक्त मेसिन जडान गर्न थालिएको थियो ।

घाइते हुनेमा जलजला यातायात व्यवसायी समितिमा कार्यरत त्रिवेणी–६ का धनबहादुर पुन, बर्दिया जिल्ला राजापुर–५ का ४२ वर्षका विष्णुचन्द्र न्यौपाने, जनक न्यौपाने र सल्यान जिल्ला कपुरकोट–६ का ६२ वर्षका पहलमान पुन छन् । प्रहरीले मेसिन भर्खरै ल्याइएको र उक्त मेसिन हेर्न पुगेका स्थानीय समेत घाइते भएको जनाएको छ । घाइते विष्णुचन्द्र मेसिन मालिक हुन् भने मृतक जयकृष्ण आफन्त र घाइते जनक उनका दाइ हुन् ।

गम्भीर घाइते धनबहादुरको टाउको र छातीमा चोट लागेको प्रहरीले जनाएको छ । पुन खतरामुक्त भएको उनका ज्वाईं ऋषिकेश डाँगीले बताए । घाइतेलाई उपचारका लागि दाङस्थित अस्पतालमा पुर्‍याइएको जिल्ला प्रहरी कार्यालय रोल्पाका प्रहरी निरीक्षक लिलाराम आचार्यले बताए । घटना लगत्तै उद्धारका लागि त्रिवेणी बुढागाउस्थित प्रहरी चौकी कोइलाबाट प्रहरी सई यमनारायण श्रेष्ठ नेतृत्वको टोली घटनास्थल पुगेको थियो ।

जंगलमा शव फेला
यसैबीच रोल्पाको त्रिवेणी ५ सिद्धपुर गाउँ निबासी ४३ वर्षका मोटे भनी चिनिने ओमबहादुर नेपाली घर मुनिको जंगलमा मृत अवस्थामा फेला परेका छन् । तीन दिन अघिदेखि परिवारको सम्पर्कबाहिर रहेका ओमबहादुरको शब जंगलमा परिवारले भेटाएर प्रहरीलाई सम्पर्क गरेको जिल्ला प्रहरी कार्यालय रोल्पाका प्रहरी निरीक्षक लिलाराम आचार्यले बताए ।

नेपालीको शव घरदेखि करिव ५ सय मिटर तल खोलामा सिरुवाली–लापिखोजी जंगलमा भेटिएको खबर पाएपछि अनुसन्धानका लागि इलाका प्रहरी कार्यालय अन्तर्गतका प्रहरी टोली घटनास्थल पुगेको प्रनि आचार्यले बताए । परिवारलाई उद्धृत गर्दै प्रहरीले नेपालीले अत्यधिक मद्यपानपछि भिरबाट लडेका कारण मृत्यु भएको प्रहरीले अनुमान गरेको छ । उनको शव मंगलबार विहान परिवार र आफन्तले फेला पारेका थिए । उनको घर मुनि जंगल र भिर छ ।

प्रकाशित : पुस २४, २०७५ १३:०७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT