प्रकृति र वन्यजन्तुका पक्षमा

कान्तिपुर संवाददाता

काठमाडौँ — कला र प्रकृति त्यसै पनि अन्तरसम्बन्धित हुन्छन् । गएको पुस तेस्रो साता केही युवा चित्रकार पर्साको राष्ट्रिय निकुञ्जभित्र थिए, प्राकृतिक सौन्दर्य खोज्दै ।

‘आर्ट फर नेचर’ थिमसहित १२ चित्रकारले आआफ्ना क्यानभास सजाए । तिनै चित्र यतिबेला राजधानीको बबरमहलस्थित नेपाल आर्ट काउन्सिलमा हेर्न सकिन्छ ।

२५ कलाकृति सजिएको प्रदर्शनीको आइतबार नेपाल ललितकला प्रज्ञा प्रतिष्ठानका कुलपति कान्छाकुमार कर्माचार्यले उद्घाटन गरे ।
कलाकारहरूले प्राय: दिनानुदिन हुँदै गइरहेको प्राकृतिक विनाश र त्यसले वन्यजन्तुमा पारेको प्रभावलाई विषय बनाएका छन् ।

कार्यक्रममा विश्व वन्यजन्तु कोषका लागि नेपाल प्रतिनिधि घनश्याम गुरुङ र रिलिफ फन्ड फर वाइल्डलाइफ भिक्टिमका अध्यक्ष प्रभु बुढाथोकीले प्रकृति र वन्जयजन्तुको संरक्षणमा कलाकारले देखाएको चासोको प्रशंसा गरे । कुलपति कर्माचार्यले चित्रकार सविता डंगोललाई ‘बेस्ट आर्टिस्ट अवार्ड’ प्रदान गरे ।

प्रदर्शनीमा रागिनी उपाध्याय, सुदर्शनविक्रम राणा, सुनिता राणा, राजन पन्त, जस्मिन राजभण्डारी, सुरेम देशार, इशान परियार, सविता डंगोल, संगीता घिमिरे, प्रधी राणा, ग्रेवी भिन्सेन्ट, पल्भी बर्ग र भिल्मा लोट्टा पेन्टिलक्यानेनका चित्रकला छन् । दि आर्ट क्लब नेपालको संयोजनमा ‘रिलिफ फन्ड फर वाइल्डलाइफ भिक्टिम’ले गरेको प्रदर्शनी तीन दिनसम्म चल्नेछ ।

प्रकाशित : माघ २१, २०७५ ०८:११
प्रतिक्रिया
पठाउनुहोस्
ADVERTISEMENT

ज्याद्रै बस्यो दिल...

कान्तिपुर संवाददाता

काठमाडौँ — ‘बुलबुल’ फिल्मको दोस्रो गीत आएको छ । ‘ज्याद्रै बस्यो दिल...’ गीत काठमाडौंको भृकुटीमण्डपमा जारी क्यान इन्फोटेक मेलामा सयौँ दर्शकश्रोतामाझ शनिबार सार्वजनिक भएको हो ।

‘बुलबुल’ का कलाकार मुकुन भुसाल र स्वस्तिमा खड्का । तस्बिर : कान्तिपुर

यसअघि ‘बुलबुल’ कै ‘माया ओई ओई...’ गीत पनि फ्लास मब शैलीमा दर्शकश्रोताकै बीच नाचेर सार्वजनिक गरिएको थियो ।
‘ज्याद्रै बस्यो दिल...’ को दृश्यमा अभिनेत्री स्वस्तिमा खड्का केन्द्रमा देखिन्छिन् ।

कहिले सडकमा हिँड्दै गरेकी त कहिले पानीमा रुझ्दै । फिल्मका निर्देशक विनोद पौडेलले ‘बुलबुल’ ले समाजको एउटा वर्गको जीवनलाई दुरुस्तै उतारेको दाबी गरे । ‘फिल्ममा प्राय: पात्रलाई आदर्शको भारी बोकाइएको हुन्छ,’ उनले भने, ‘यो फिल्ममा आदर्शभन्दा यथार्थ बढी छ ।’ उनले दुई तीन महिना विषयगत अनुसन्धानपछि मात्रै फिल्मको कथा तयार पारेको पनि बताए ।

निर्माता अविरल थापाले नेपाली फिल्ममा मौलिकता भएन भन्ने गुनासो भइरहेका बेला ‘बुलबुल’ ले भिन्न स्वाद दिने ठोकुवा गरे ।
‘ज्याद्रै बस्यो दिल...’ का शब्द मनिकला पौडेलले संकलन गरेकी हुन् ।

उदगम परियारको संगीत र रजिना रिमालको स्वर यसमा सुन्न सकिन्छ । फिल्ममा स्वस्तिमासँगै मुकुन भुसाल, जोयस पाण्डे, लक्ष्मी बर्देवा, दीपक क्षेत्री, एलिना कार्की, सृष्टि भट्टराईलगायतको अभिनय छ । फिल्म आउँदो फागुन ३ देखि मुुलुकभर प्रदर्शन हुँदै छ ।

प्रकाशित : माघ २१, २०७५ ०८:०९
पूरा पढ्नुहोस्
प्रतिक्रिया
पठाउनुहोस्