काठमाडौँ — पछिल्लो समय गुणस्तरीय शिक्षाका लागि अभिभावक विशेष सचेत देखिन्छन् । उनीहरू आफ्ना बालबालिकालाई बदलिँदो परिस्थिति अनुसार कसरी स्थापित गराउन सकिन्छ भन्ने विषयमा चनाखा पनि छन् ।
गुणस्तरीय शिक्षाका लागि निजी विद्यालयले खेल्दै आएको भूमिकाबारे नेपालगन्ज सेरोफेरोका विद्यालयका प्रिन्सिपल एवं संस्थापकसँग गरिएको कुराकानी :
शरद रावल
(प्रिन्सिपल, स्प्रिङ डेल एकेडेमी, नेपालगन्ज)
हामी बालबालिकालाई चेतनशील बनाउन जोड दिन्छौं । त्यसैले विद्यालयहरू समय सापेक्ष परिवर्तन भइरहनुपर्छ । हामीले पाँच वर्षयता शिक्षाशैली रूपान्तरण गरेका छौं । बालबालिकाहरू शिक्षामा पाउनुपर्ने सुविधाबाट वञ्चित नहुन् भनेर आईसीटी बेस एजुकेसन दिने प्रयास गरेका छौं । यो भनेको २४ औं शताब्दीको शिक्षा नीति हो । यसमा डिजिटल प्रणालीमा जोड दिइन्छ । घोकाइमा भन्दा गराइमा विश्वास गर्छौं । ५० मिनेटको कक्षामा चार तरिकाले पढाउने व्यवस्था गरेका छौं । अडियो, मल्टिमिडिया, टेक्स्ट र टेक्सटाइल गरी चार विधिबाट शिक्षा दिँदै आएका छौं । हामीले भविष्यमा इन्टरनेटबाट घरमै बसेर पढाइ गर्ने पद्धतिको विकास गर्ने सोच पनि बनाएका छौं ।
विकास क्षत्री (संस्थापक, वाटर पार्क स्कुल)
अबको शिक्षा कालोपाटीमा सीमित हुनु हुँदैन । डिजिटल प्रविधिमा केटाकेटी आकर्षित छन् । प्रविधिबाट टाढा राखेर अहिलेको शिक्षा पूर्ण हुँदैन । त्यसैले हामीले झन्डै १० वर्ष पुरानो स्कुलको व्यवस्थापन परिवर्तन गरेका छौं । यस वर्षदेखि पूर्ण डिजिटल एजुकेसनलाई केन्द्रमा राख्ने योजना छ । प्रतिस्पर्धात्मक समाजमा छोराछोरी कसरी जुध्न सक्छन् भन्नेबारे अभिभावकले चिन्तन गर्नुहुन्छ । यसलाई फूर्णता दिने जिम्मेवारी स्कुलको हो । अतिरिक्त त्रियाकलापसँगै गुणस्तरीय शिक्षा दिन केन्द्रित छौं । विद्यार्थी शिक्षित हुनु भनेको पहिला शिक्षक शिक्षित हुनु हो ।
विकास बज्राचार्य
(प्रिन्सिपल, युनाइटेड एजुकेसनल एकेडेमी)
खेल्दै सिक्दै गर्ने थलो विद्यालय हो । निजी विद्यालय लोकप्रिय हुँदै जानुको कारण यसमा त्रिपक्षीय संयोजन छ । विद्यार्थी, विद्यालय र अभिभावकबीचको पारस्परिक सम्बन्धले शिक्षामा गुणस्तरीयता बढाउँछ । हामी छोराछोरीलाई स्कुल पठाउँछौं भने केका लागि र किन भनेर अभिभावकले सोच्नुपर्छ । विद्यालयले बालबालिकाको उज्ज्वल भविष्यको जिम्मेवारी लिएको हुन्छ । यति मात्रै होइन, विद्यार्थी स्वयंले पनि नवीन कुरा सिक्ने र शिक्षकलाई समेत सिकाउने वातावरण सिर्जना गर्छ । निजी विद्यालयले यस्ता कुरालाई आधार बनाएर पढाउने हुँदा जनमानसमा लोकफ्रियता बढेको हो । अतिरिक्त त्रियाकलापमा मलजल थप्ने काममा पनि निजी विद्यालयले विशेष प्राथमिकता दिने गर्छन् ।
प्रस्तुति: मधु शाही
