ब्राजिलको पनि पीडा उस्तै

ब्राजिलले पछिल्लो विश्वकप २०१४ मा आफैंले आयोजना गर्दा सेमिफाइनलमा जर्मनीसँग ७–१ को हार बेहोरेको थियो ।
रोयटर्स

रोस्तोभ — रुसी विश्वकपको आफ्नो पहिलो खेलमा प्रभाव पार्न नसक्ने ठूलो राष्ट्रको सूचीमा ब्राजिल पनि थपिएको छ । ब्राजिललाई आइतबार स्वीट्जरल्यानडले १–१ को बराबरीमा रोक्यो ।

स्वीट्जरल्यान्डविरुद्धको खेल १–१ को बराबरी खेल्नुपरेपछि निराश ब्राजिली स्टार नेयमर । तस्बिर : रोयटर्स

दाबेदार मानिएको स्पेन, अर्जेन्टिना र जर्मनीले पनि पहिलो खेलमा विजय हात पार्न सकेका थिएनन् । जर्मनी अझ पहिलो खेलमा मेक्सिकोसँग १–० ले पराजित भएको थियो ।

फिलिप कोउटिन्होको दर्शनीय गोलमा ब्राजिलले पहिलो हाफमा अग्रता लिएको थियो । तर ५ मिनेटपछि नै स्टेभन जुबेरले कर्नरबाट आएको बलमा हेडर गोल गरी खेल बराबरीमा ल्याए । जसले अन्तत: स्वीस टोलीलाई महत्त्वपूर्ण अंक दिलायो । टिटेको प्रशिक्षणमा रहेको ब्राजिलले विश्वकपमा आउनेक्रममा उत्कृष्ट प्रदर्शन गरेको थियो, तर त्योअनुरुपको प्रदर्शन टोलीले स्वीट्जरल्यान्डसँगको खेलमा देखाउन सकेन ।

Yamaha

निकै संगठित देखिएको स्वीस रक्षापंक्तिले ब्राजिललाई दोस्रो हाफमा थोरैमात्र अवसर दिएको थियो । ५० औं मिनेटमा जेर्दान साकिरीको कर्नरमा जुबेरले कासेमिरो र मिरान्डाको हेल्चेक्र्याइँपूर्ण बचाउमा हेड गोल गरेपछि ब्राजिलले उल्टो गोलका लागि दबाबमा खेल्नुपर्‍यो । यद्यपि दोस्रो हाफमा कोउटिन्हो, पाउलिन्हो र रोबर्टो फिर्मिन्होले अवसर नपाएका होइनन् ।

‘हाम्रा धेरै प्रहार लक्ष्य बाहिर रह्यो, हामी केही केन्द्रित भएको भए विपक्षी टोलीका गोलरक्षकलाई अझ मिहिनेत गर्नुपर्ने बनाउँथ्यौं । मेरो अनुमान विजय पाउनु नै थियो त्यसैले नतिजाबाट म खुसी छैन,’ ब्राजिली प्रशिक्षक टेटेले भने, ‘जुन स्थानबाट स्वीट्जरल्यान्डले गोल गर्‍यो, त्यो ठाउँबाट गर्नुपर्ने केही थिएन । तर त्यो फाउल थियो ।’

ब्राजिलविरुद्ध गोल गरेका स्वीस खेलाडी स्टेभन जुबेर  । तस्बिर : रोयटर्स

विश्वका सबैभन्दा महँगा फुटबलर नेयमरको खेल अझ निराशाजनक थियो । तर ब्राजिलकै दोस्रा महँगा खेलाडी कोउटिन्होले त्यसको तुलनामा धेरै प्रभावकारी खेल देखाएका थिए । ‘स्पागेटी’ जस्तै कपालका कारण नेयमर धेरैको नजरमा परे पनि उनी बलमा केही ड्रिब्लिङ गरेपछि हराएजस्ता देखिन्थे । राइट विंगर विलियन र स्ट्राइकर ग्राबियल जेससले खासै मौका नै पाएनन् ।

ब्राजिलले पछिल्लो विश्वकप २०१४ मा आफैंले आयोजना गर्दा सेमिफाइनलमा जर्मनीसँग ७–१ को हार बेहोरेको थियो । जर्मनीसँग खेलेको टोलीका मार्सेलो मात्र मैदान उत्रिएका थिए । विश्वकप आउनुअघि ब्राजिलले खेलेका पछिल्ला २१ खेलमा एकमात्र हार बहोरेको थियो ।

Esewa Pasal

प्रकाशित : असार ५, २०७५ ०८:५२
प्रतिक्रिया
पठाउनुहोस्

‘जापानलाई अवसर छैन’

समूह ‘एच’: पोल्यान्डविरुद्ध सेनेगल, कोलम्बियाविरुद्ध जापान
एएफपी

सारान्स्क — प्रशिक्षकलाई विश्वकपको ७१ दिनअघि बर्खास्त गरेको जापानले शंका गर्नेहरूलाई गलत साबित गर्ने प्रयासमा मंगलबार फिटनेसका लागि संघर्षरत् स्टार मिडफिल्डर जेम्स रोड्रिग्वेजको टिम कोलम्बियाविरुद्ध प्रतिस्पर्धा गर्दै छ ।

अभ्यासमा जापानी टाेली

विश्वकप २०१४ को सर्वाधिक गोलकर्ता रोड्रिग्वेज सारान्स्कस्थित मोरडोभिया एरिनामा हुने समूह ‘एच’ को पहिलो खेलमा खेल्नेमा शंका गरिएको छ । बाँया उनले खुट्टाको मांसपेसीमा समस्या बेहोरिहेका छन् र उनले यस्तै समस्या फेब्रुअरीमा पनि बेहोरेका थिए ।

चार वर्षअघि ब्राजिलमा क्वाटरफाइनल पुगेको कोलम्बियालाई उस्तै प्रदर्शन दोहोर्‍याउने सम्भावनाको लागि बायर्न म्युनिखका आक्रामक मिडफिल्डर रोड्रिग्वेजलाई मुख्य खेलाडी मानिएको छ । २६ वर्षीय उनको ६ गोल र थप चार गोलमा अन्तिम पास दिएको सहयोगमा कोलम्बिया विश्वकपका लागि छनोट भएको थियो । अर्का मिडफिल्डर विल्मर बारियोस पनि फिट हुनका लागि संघर्षरत् छन् ।

दक्षिण अमेरिकी टिम कोलम्बियाले पूर्वप्रशिक्षक फिलिप ट्राउजियरले भनेजस्तै जोसे मोउरिन्होले सम्हालेको भए पनि विश्वकपमा सुरुमै बाहिरिनबाट रोक्नका लागि संघर्ष गर्ने जापानी टिमको सामना गर्नेछ । ट्राउजियरले अन्तर्वार्तामा प्रशिक्षक भाहिद हालिहोजिचलाई अप्रिलमा बर्खास्त गरेपछि जापानको नकआउट चरण पुग्ने सम्भावना नभएको बताएका थिए ।

‘यदि उनीहरूले मोउरिन्हो वा आर्सेन वेंगरसँगै खेले भने पनि जापानलाई अन्तिम १६ मा पुग्न साह्रै गाह्रो हुनेछ,’ जापानलाई विश्वकप २००२ मा दोस्रो चरणमा पुर्‍याएका फ्रान्सेली प्रशिक्षक ट्राउजियरले भने । राष्ट्रिय टिम सम्हालिन नसेकेको अवस्थालाई उनको अनुमानले देखाउँछ ।

हालिहोजिचलाई बर्खास्त गरेपछि जापान फुटबल संघले त्यो स्थानपूर्ति पूर्व प्राविधिक निर्देशक अकिरा निसिनोबाट गरेको थियो । ६३ वर्षीय उनीसँग जे–लिगको पर्याप्त अनुभव छ तर राष्ट्रिय टिमसँग भने उनले जापानको यू–२० र यू–२३ टिमसँग मात्र काम गरेका थिए ।

यो समूहमा रोबर्ट लेवन्डोवस्की नेतृत्वको पोल्यान्डसहित सेनेगल पनि छ । यसमा जापानलाई राम्रो सुरुआत आवश्यक छ । ‘पोल्यान्डसँग पहिलो खेल भएको भए त्यो फरक हुने थियो । तर कोलम्बियासँग पहिलो खेल भयो र दोस्रोमा सेनेगलविरुद्ध । मेरा लागि कागजमै सीमित भए पनि उसलाई अवसर छैन,’ ट्राउजियरले भने । चार वर्षको विश्वकप भेटमा कोलम्बियाले जापानलाई ४–१ ले हराएको थियो र त्यसमा सुधार गर्ने प्रयास उसले गर्नेछ ।

प्रकाशित : असार ५, २०७५ ०८:४८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
ADVERTISEMENT