क्रोएसिया रोक्ने डेनिस योजना

रोयटर्स

निज्नी नोभ्गोरोड — क्रोएसियाले आइतबार अन्तिम १६ मा डेनमार्कको सामना गर्दा उसको पृष्ठभूमिमा शतप्रतिशत जितको प्रदर्शन रहनेछ । तर यही लयमा रहेको टिमलाई रोक्ने प्रयासमा डेनमार्क हुनेछ आश्चर्यजनक नतिजासँगै ।

अभ्यासमा डेनिस खेलाडी ।

यो खेल त्यही मैदानमा हुँदै छ, जहाँ क्रोएसियाले लिग चरणमा अर्जेन्टिनालाई ३–० ले हराएको थियो ।

यस खेलको विजेताले क्वाटरफाइनलमा पूर्व विजेता स्पेन वा रुसको सामना गर्नेछ । क्रोएसिया अनुभवी प्ले–मेकर लुका मोड्रिचको नेतृत्वमा छ । उसले समूह ‘डी’ को लिग चरणमा नाइजेरिया र आइसल्यान्डलाई समेत हराएको थियो । यसपल्ट क्रोएसियाको योजना सन् १९९८ को विश्वकपमा भन्दा राम्रो प्रदर्शन गर्ने हुनेछ, जतिबेला टिम सेमिफाइनलसम्म पुगेको थियो ।

‘त्यतिबेला म ९ वर्षको थिएँ, जतिबेला क्रोएसियाले गोल गथ्र्यो, आमा ठू–ठूलो स्वरले कराउनुहुन्थ्यो खुसीले,’ डिफेन्डर डेजान लोभरेनले भनेका छन् । सन् १९९८ मा क्रोएसिया तेस्रो स्थानमा आएको थियो । त्यसका लागि उसले नेदरल्यान्ड्सलाई २–१ ले हराएको थियो । ‘यसपल्ट हामीले अझ राम्रो गर्न सक्छौं, त्यतिबेला भन्दा राम्रो,’ लोभरेनले भनेका छन् ।

तर उनी मान्छन्, यसका लागि टिम भाग्यमानी पनि हुनुपर्छ । किनभने प्रतिद्वन्द्वीहरू कठिन हुँदै छन् । मोड्रिचले रुसी भूमिमा अहिलेसम्म उत्कृष्ट प्रदर्शन गरेका छन् र त्यसमा अर्जेन्टिनाविरुद्ध लामो दूरीबाट गरेको गोल पनि पर्छ । उनीसँगै साथी मिडफिल्डर इभान राकिटिचले पनि राम्रो गरिरहेका छन् । अहिले क्रोएसियाली टिममा नयाँ खेलाडीको पनि उदय भइरहेको छ । जस्तै, एन्टे रेबिच, माटेओ कोभासिच र मार्लेलो ब्रोजोभिच । यी सबैले युरोपका प्रमुख लिगमा खेल्छन् । यता लगातार १७ खेलमा अपराजित डेनमार्क पनि राम्रो प्रदर्शनका लागि आशावादी छ । अहिलेसम्ममको प्रदर्शनमा टोली खुसी पनि छ । समूह ‘सी’ मा डेनमार्क दोस्रो स्थानमा थियो र यसक्रममा २ गोलमात्र गर्न सकेको छ ।

डेनमार्क पनि सन् १९९८ को विश्वकप उपलब्धि समान प्रदर्शन गर्ने योजनामा छ । जतिबेला उनीहरूले क्वाटरफाइनलसम्म यात्रा तय गरेको थियो । त्यस क्रममा डेनमार्कले ब्राजिललाई हराएको थियो र यसलाई त्यहाँको फुटबल इतिहासकै एक समृद्धि उपलब्धि मानिन्छ । डेनमार्कका प्रशिक्षक एजे हारेडेले पनि आफ्नो टिमले आक्रामक फुटबल खेल्ने बताएका छन् ।

फ्रान्सविरुद्धको खेलमा डेनमार्कले सुस्त खेल्दै गोल गर्न इच्छा नदेखाए पनि टिमकै समर्थनले पनि त्यसको आलोचना गरेका थिए । तर यसमा मिडफिल्डर थोमस डेलानीको फरक मत छ । उनले भनेका छन्, ‘फुटबलमा कहिलेकाहीं यस्तो हुन्छ । तर हामी सधैं यस्तो फुटबल खेल्ने टिम होइन । क्रोएसियाविरुद्धको खेल रोचक हुनेमा शंका नगरे हुन्छ ।’

Yamaha

Esewa Pasal

प्रकाशित : असार १७, २०७५ ०८:१२
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

३ करोड २२ लाख सहयोग

प्रताप विष्ट

गोगने (मकवानपुर) — बाख्राको खोर बनाइसकेकी छन् । बाख्रा नभएकाले उनको खोर खाली थियो । बाख्रापालनका लागि मकवानपुर रेडक्रसले कैलाश गाउँपालिका ५ की ७५ वर्षीया चीनमाया गुरुङलाई २५ हजार रुपैयाँ बिहीबार घरदैलामा उपलब्ध गराएको छ । उक्त रकमले ५ वटा उन्नत जातको बाख्रा किनेर ल्याएर पाल्ने उनको सुर छ ।

मकवानपुर रेडक्रसले कैलाश गाउँपालिकाको गोगनेमा भूकम्पपीडितका लागि निर्माण गरेको आवासीय भवन । तस्बिर : प्रताप

बाख्राको खोर वनाउन पनि मकवानपुर रेडक्रसले नै २ महिना अघि १५ हजार रुपैयाँ सहयोग गरेको थियो । गुरुङलाई मात्र होइन उक्त गाउँको शरण परियारलाई मकवानपुर रेडक्रसले खोर बनाउन १५ हजार र बाख्रा खरिद गरेर पाल्न २५ हजार गरी ४० हजार रुपैयाँ उपलब्ध गराएको थियो ।

गुरुङ र परियारलाई मात्र होइन स्पेनिस रेडक्रसको सहयोगमा मकवानपुर रेडक्रसले कैलाश गाउँपालिकाअन्तर्गतको साविकको गोगने गाविसका अति विपन्न १ सय १५ घरधुरीलाई आयआर्जन वृद्धि गराउने उद्देश्यले जीविकोपार्जन कार्यक्रमअन्तर्गत प्रतिपरिवार ४० हजार रुपैयाँ उपलब्ध गराएको छ । स्पेनिस रेडक्रसको सहयोगमा मकवानपुरको रेडक्रसले जीविकोपार्जन कार्यक्रमअन्तर्गत कैलाश गाउँपालिकाको साविकको डाँडाखर्क गाविसका १ सय ४१, कैलाश गाउँपालिकाका २ सय १४, राक्सिराङ गाउँपालिकाअन्तर्गत खैराङका १ सय ५६ र थाहा नपाका १ सय ७९ अति विपन्न परिवारलाई आयआर्जन वृद्धि गराउने उद्देश्यले प्रतिपरिवार ४० हजार रुपैयाँ उपलब्ध गराएको रेडक्रस मकवानपुरका महामन्त्री लालबहादु्र थापाले बताए ।

रेडक्रसका स्वयम्सेवक घर/घरमा पुगेर आर्थिक अवस्थाको तथ्यांक संकलन गरी लाभग्राहीलाई सहयोग गरिएको उनले जनाए । रेडक्रसबाट जीविकोपार्जन कार्यक्रमअन्तर्गत सहयोग प्राप्त गरेकाहरूले तरकारी खेती, नगदेबाली, बाख्रापालन र कुखुरापालनमध्ये एउटा व्यवसाय गर्नेछन् ।

रेडक्रस मकवानपुरले जीविकोपार्जन कार्यक्रमअन्तर्गत गोगने, डाँडाखर्क, खैराङ, नामटार र थाहा नगरपालिकासमेतका ८ सय ५ घरधुरीका प्रतिवारलाई ४० हजार रुपैयाँका दरले ३ करोड २२ लाख रुपैयाँ रकम उपलब्ध गराइसकेको भूकम्प प्रतिकार्य कार्यक्रम मकवानपुर संयोजक महेश न्यौपानेले बताए । उक्त रकम बैंकका कर्मचारी गाउँगाउँमा पुगेर रकम उपलब्ध गराएका छन । जीविकोपार्जनअन्तर्गत ४० हजार रकम प्राप्त गर्ने अधिकांश भूकम्पपीडित रहेका छन् ।

भवन पुर्ननिर्माण
मकवानपुर रेडक्रसले मकवानपुरको कैलाश गाउँपालिकाअन्तर्गतको साविकको गोगने गाविसका भूकम्पीपीडितहरूलाई अनुदान उपलब्ध गराएर ३ सय ६६ वटा आवासीय भवन निर्माण गरिसकेको छ । अमेरिकन रेडक्रसको सहयोगमा मकवानपुर रेडक्रसले गोगनेका भूकम्पपीडितहरूको भवन निर्माण गर्न सरकारीले दिने अनुदान रकम उपलब्ध गराएको थियो ।

सरकारी तथ्यांकअनुसार साविकको गोगने गाविसमा ६ सय ४६ लाभग्राही रहेका थिए । तीमध्ये रेडक्रस मकवानपुरले ६०३ लाभग्राहीसंँग अनुदान सम्झौता गरी त्यति नै संख्याको लाभग्राहीलाई ५० हजार रुपैयाँ पहिलो किस्ता उपलब्ध गराएको थियो । दोस्रो किस्ता ५ सय ३७ लाभग्राहीलाई एक लाख ५० हजार रुपैयाँ उपलब्ध गराएको छ । तेस्रो किस्ता ३ सय ५३ लाभग्राहीलाई एक लाख रुपैयाँ उपलब्ध गराएको कार्यक्रम संयोजक न्यौपानेले बताए ।

‘४३ जना लाभग्राही अनुदान सम्झौता गर्न आएका छैनन् भने ६६ लाभग्राही पहिलो किस्ताको रकम लिएर अहिलेसम्म दोस्रो किस्ताका लागि सम्झौता गर्न आएका छैनन्,’ रेडक्रस मकवानपुरका महामन्त्री थापाले भने, ‘पहिलो किस्ता लगेर दोस्रो किस्ताका लागि सम्झौता गर्न नआउनेहरूको सूची तयार बनाउँदै छौं ।’ रेडक्रसले राष्ट्रिय पुनर्निर्माण प्राधिकरणको डिजाइनमा भूकम्पप्रतिरोधी आवासीय भवन निर्माण गर्न लाभग्राहीहरूलाई सहयोग गरेको हो ।

प्रकाशित : असार १७, २०७५ ०८:०८
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT