[विश्वकप विश्लेषण] रुसी रणनीति सफल

नवीन न्यौपाने

काठमाडौँ — विश्वकप २०१८ मा अाइतबार राति अन्तिम १६ का दुई खेल भए, दुवैको नतिजा टाइब्रेकरमा निस्क्यो । पेनाल्टी सुटआउट आयोजक रुस र क्रोएसियाका लागि भाग्यमानी सावित भयो र दुवैले क्वाटरफाइनलको यात्रा तय गरे । रुसले पहिलो खेलमा पूर्व विश्वकप विजेता स्पेनलाई हराएको हो र यससँगै एउटा शक्तिशाली टिम प्रतियोगिताबाट बाहिरियो । 

रुसले तयार पारेको समग्र रणनीति अन्ततस् सफल भएको देखियो। रुसले अधिकांस समय रक्षात्मक हुँदै खेलेको थियो। पहिलो हाफमा केही आक्रामक देखिएको रुसले बाँकी समय खासै आक्रमणमा रूचि पनि देखाएन। स्पेनको समस्या के रह्यो भने टिमले बलमाथि अत्याधिक नियन्त्रण त राख्यो।

Yamaha

तर यसलाई आक्रमणमा परिणत गर्न सकेन। पूरा खेल अवधिमा स्पेनले सटिक मान्न सकिन चार आक्रमण मात्र बुनेको थियो। टिमले रुसको पेनाल्टी एरियामा बल लान नै सकेन। यो अर्थमा रुसको रक्षापंक्ति सफल देखियो। स्पेनले सुरुदेखि आन्द्रेस इनिस्टालाई खेलाएन र पछि सब्टिच्युट खेलाडीका रूपमा मात्र मैदानमा छिराएको थियो।

प्रशिक्षकको नजरबाट यो गलत निर्णय थियो। उनी आएपछि स्पेनी आक्रमणमा केही सटिकपन आएको थियो। स्पेनले गरेको गोल आत्मघाती थियो र यसमा रुसी डिफेन्डरले बल भन्दा पनि खेलाडीमाथि बढी ध्यान दिएको देखियो। अर्कोतर्फ रुसले गरेको गोल पेनाल्टीमा थियो र यसमा जेरार्ड पिके जस्ता खेलाडीले अनावश्यक ह्यान्ड बल गरे।

टाइब्रेकरमा रुसले जति प्रहार गरेको थियो, सबै निकै उत्कृष्ट थिए। यी सबै प्रहार प्रशिक्षकले चाहे जस्तै रहे। पेनाल्टीमा पावर सट आवश्यक हुन्छ र रुसी खेलाडीले यही काम गरेको देखियो, जबकी स्पेनले गरेका प्रहार जोगिनुमा ती गोलरक्षकको पहुँचमा भएर नै हो। त्यसैले दुई स्पेनी प्रहार गोल हुन सकेनन।

बलमाथि नियन्त्रणको आधारमा जहाँ पहिलो खेल एकपक्षीय थियो, ठीक त्यहीं दोस्रो खेल भने बराबरीको रह्यो। क्रोएसिया र डेनमार्क दुवै आक्रामणमा ध्यान राखेर खेल्यो। खेलको दुवै गोल सुरुमै निस्केको थियो। फुटबलमा के भनिन्छ, भने सुरुआती दस मिनेट निकै जटिल हुन्छ, किनभने यसबीच टिम ‘सेट’ भइसकेको हुन्न।

यो खेलमा पनि यस्तै भयो। अतिरिक्त समयको अन्त्यतिर क्रोएसियासँग निर्णायक अग्रता लिने अवसर थियो, तर लुका मोडरिच पेनाल्टीमा गोल गर्न चुके। तर क्रोएसिया बलियो टिम हो र यसले लिग चरणमा पनि राम्रो खेलेको हो। क्रोएसियाली गोलरक्षकले पेनाल्टीमा राम्रा बचाउ गरे।
(न्यौपाने राष्ट्रिय टिमका पूर्व खेलाडी हुन्। उनी हाल त्रिभुवन आर्मी क्लबका प्रशिक्षक छन्। उनले केही समय अगाडि मात्र एसियाली फुटबल महासंघको प्रशिक्षक ‘ए’ लाइसेन्स कोर्स उतीर्ण गरेका छन्।)

Esewa Pasal

प्रकाशित : असार १८, २०७५ ०७:४०
ADVERTISEMENT
प्रतिक्रिया
पठाउनुहोस्
ADVERTISEMENT

[विश्लेषण] अब नयाँ पुस्ताको पालो

नवीन न्यौपाने

काठमाडौँ — विश्वकप २०१८ मा हिजो राति दुई ठूला नामले अन्तिम पटक खेले, अर्जेन्टिनाका लियोनल मेसी र पोर्चुगलका क्रिस्टियानो रोनाल्डो । लामो समयदेखि यिनै दुई खेलाडी विश्व फुटबलमा छाइरहेका थिए, संयोगले एकै दिन उनीहरूको टिमको चुनौती रुसमा समाप्त भयो । सम्भवत: दुवै खेलाडीका लागि यो विश्वकप अन्तिम हुन सक्छ । 

सायद अबको विश्वकपमा उनीहरूले खेल्ने छैनन्। यससँगै विश्व फुटबलमा एक युगको समाप्त भएको छ र अब नयाँ पुस्तामा विश्व फुटबल हस्तान्तरण भएको छ। अब ठूला नामका रूपमा नयाँ पुस्ताका खेलाडी अगाडि आउने छन्। हिजो रातिका दुई अन्तिम १६ का खेलमा फ्रान्सले अर्जेन्टिनालाई ४–३ ले हरायो भने पोर्चुगलमाथि उरुग्वे २–१ ले विजयी रह्यो।

मेरो विश्लेषणमा अर्जेन्टिनालाई सुरुदेखि उनीहरूको अनावश्यक ट्याकल खेल्ने कारणले ठूलो घाटा पुर्‍याएको थियो। फ्रान्सले पहिलो गोल पेनाल्टीबाट गरेको थियो र त्यसमा पनि यही कारण रह्यो। फ्रान्सले त्यसमा ट्याकल नै गर्नु थियो भने सुरुमै पेनाल्टी एरिया बाहिर गर्नु पर्ने थियो। फ्रान्सले भने निकै राम्रो खेल खेल्न सफल रह्यो।

केयनिल एमबापेले अब्बल दर्जाको खेल खेले र उनलाई रोक्न अर्जेन्टिना पूर्णतस् असफल रह्यो। उनीसँगै फ्रान्सले आक्रमणमा जुन गति तयार पारेको थियो, त्यसलाई अर्जेन्टिनाले ठीकसँग सामना नै गर्न सकेन। अर्जेन्टिनाका लागि एन्जेल डि मारियाले एक गोल त गरे, तर त्यस अगाडि उनी खेलमा कहाँतिर थियो, त्यो देख्दै देखिएन्। उनी हराएका जस्तै थिए।

अर्जेन्टिनी डिफेन्स वास्तवमै कमजोर देखियो, पूरा प्रतियोगितामा। यता फ्रान्सले जति आक्रमण बुनेको थियो, त्यसमध्ये गोल नभएको स्थितिमा पनि ती स्तरीय देखिए। फ्रान्सको सफलताको एक कारण सफलतापूर्वक मेसीलाई रोक्नु रह्यो। जसरी फ्रान्सले मेसीलाई रोकेको थियो, ठीक त्यसरी नै उरुग्वेले पनि रोनाल्डोलाई निस्तेज पारेको थियो।

यो पनि यी दुई टिमको सफलताको एक प्रमुख कारण रह्यो। उरुग्वे र फ्रान्सबीचको खेल एक प्रकारले ५०–५० जस्तै रह्यो। तर पनि दक्षिण अमेरिकी टिमले दुई गोल गर्‍यो र दुवै गोल एडिनसन कबानीको नाममा रह्यो। कबानीले यसक्रममा आफू कति स्तरीय खेलाडी हो भनेर सिद्ध गर्न सके। उनका दुवै गोल उत्कृष्ट थिए।

त्यसमध्ये पनि पहिलो गोल निकै राम्रो रह्यो। खासमा उरुग्वेली टिमको प्रमुख विशेषता र बलियो पक्ष भनेकै टिमका दुई प्रमुख खेलाडी लुइस स्वारेज र कबानीबीचको ठीक तालमेल हो। यसै कारणले टिमको गोल पनि निस्के। उरुग्वेले यसैक्रममा लगातार चार खेल जितेको छ, लिग चरणका तीन जितसँगै। यसले देखाउँछ, टिम लयमा छ।

पोर्चुगलले पनि उरुग्वेविरुद्ध आक्रमण नगरेको होइन, तर ती प्रभावशाली देखिएनन्। उरुग्वे दुई गोल गरेपछि केही हदसम्म रक्षात्मक पनि देखियो। तर पोर्चुगललाई गोलको अवसर नदिनुमा उरुग्वेली रक्षापंक्तिको पनि प्रशंसा गर्नै पर्छ। पोर्चुगलले लामो पास खेल्न चाहिरहेको थियो र सकेसम्म बल रोनाल्डोतर्फ फ्यालिरहेको थियो, तर उनी आफै भने उरुग्वेको कडा रक्षापंक्तिको जालोमा थिए।

(न्यौपाने राष्ट्रिय टिमका पूर्व खेलाडी हुन्। उनी हाल त्रिभुवन आर्मी क्लबका प्रशिक्षक छन्। उनले केही समय अगाडि मात्र एसियाली फुटबल महासंघको प्रशिक्षक ‘ए’ लाइसेन्स कोर्स उतीर्ण गरेका छन्।)

प्रकाशित : असार १७, २०७५ ०७:२०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT