मास्केरानोको संन्यास

अर्जेन्टिनाका लागि ३४ वर्षे मास्केरानाको यो १ सय ४७ औं खेल थियो । उनी अर्जेन्टिनाबाट सर्वाधिक खेल खेल्ने खेलाडी हुन् ।

मास्केरानोले यस विश्वकपमा अर्जेन्टिनाका सबै ४ खेलमा सहभागिता जनाए । रुस यात्रा उनको लगातार चौथो विश्वकप सहभागिता हो । उनले डेपोर्ट टिभीसँग भने, ‘व्यक्तिगत रूपमा मेरा लागि राष्ट्रिय टोलीको यात्रा आजबाट सकिएको छ । अबबाट म एक अर्जेन्टिनी समर्थकमात्र रहनेछु ।’ अर्जेन्टिनाको रिभर प्लेटबाट क्लब फुटबल सुरु गरेका दोहोरो ओलम्पिक च्याम्पियन मास्केरानोले २००३ मा राष्ट्रिय टोलीबाट पहिलोपल्ट खेलेका थिए ।

उनले इंग्लिस प्रिमियर लिगको टोली वेस्टह्यामबाट २००६ मा खेलेपछि लिभरपुल गएका थिए । त्यहीबाट अर्को वर्ष च्याम्पियन्स लिगको फाइनल खेलेका थिए । लिभरपुल फाइनलमा एसी मिलानसँग पराजित भएको थियो । २०१० को जनवरीमा बार्सिलोना लागेका मास्केरानोले त्यसपछि दुईपल्ट च्याम्पियन्स लिग र पाँचपल्ट स्पेनिस ला लिगाको उपाधि जिते । उनले हाल चाइनिज क्लब हेबेई चाइना फोर्टुनबाट खेलिरहेका छन् ।