इंग्ल्यान्डविरुद्ध क्रोएसिया : तीन मुख्य भिडन्त

एएफपी

सेन्ट पिटर्सबर्ग — इंग्ल्यान्डको युवा टोलीले बुधबार क्रोएसियाको अनुभवी टोलीविरुद्ध विश्वकप सेमिफाइनल खेल्दै छ । खेलको विजेता टोली मस्कोस्थित लुजनिकी रंगशालामा हुने फाइनल खेलका लागि छनोट हुनेछ ।

इंग्ल्यान्ड २८ वर्षयता पहिलोपल्ट सेमिफाइनल पुगेको हो । त्यसअघि एकपल्ट मात्र फाइनल पुगेको इंग्लिस टोलीले सन् १९६६ मा घरेलु मैदानमा उपाधि नै जितेको थियो । क्रोएसिया भने हालसम्म सेमिफाइनल पार गर्न सकेको छैन । पछिल्लोपल्ट सन् १९९८ मा सेमिफाइनल पुग्नु नै टोलीको सबैभन्दा राम्रो नतिजा थियो । यसपालि उत्कृष्ट खेलाडीसँगै भाग्यमानी साबित भएको क्रोएसिया पहिलो उपाधि जित्न दुई जित टाढा छ ।


यस बहुप्रतीक्षित सेमिफाइनलमा नतिजा निर्धारण गर्नसक्ने तीन महत्त्वपूर्ण भिडन्त यस्तो छ :

लुका मोड्रिचविरुद्ध जोर्डन हेन्डरसन
झन्डै ६ साताअघि रियल म्याड्रिडले च्याम्पियन्स लिग फाइनलमा लिभरपुललाई पराजित गरेको थियो । इंग्ल्यान्डका हेन्डरसनसामु अहिले मोड्रिचमाथि त्यसको बदला लिने र इंग्ल्यान्डबाट खेल्दा ३० खेलको अपराजित यात्रा बढाउने मौका छ । इंग्ल्यान्डको इतिहासमा कुनै खेलाडीले यति लामो समय अपराजित रहेको यो पहिलोपल्ट हो ।


हेन्डरसनको नेतृत्व, अनुशासन र खेलशैलीकै कारण गारेथ साउथगेटको रणनीति सफल भएको छ । रक्षात्मक मिडफिल्डरको भूमिका निर्वाह गरिरहेका उनले जेसी लिङगार्ड र डेले अलीलाई स्वतन्त्र रूपमा खेल्न दिइरहेका छन् । यस खेलमा भने उक्त मिडफिल्डको लयमा देखिएका ३२ वर्षीय मोड्रिचले परीक्षा लिनेछन् ।


मोड्रिचले मैदानको बीचमा रहेर डिफेन्स चिर्ने पास, उत्कृष्ट गोल र विपक्षीको लय तोड्ने प्रदर्शन गरिरहेका छन् । विश्वकपमा पूरै समय खेलेका चार खेलमा उनले तीन म्यान अफ द म्याच उपाधि पनि जितेका छन् । पछिल्ला तीन सिजनमा लगातार तीन च्याम्पियन्स लिग उपाधि जितेका उनलाई क्रोएसियाले विश्वकप उपाधि उठाएको खण्डमा बालोन डी’ओर को दाबेदारका रूपमा हेरिएको छ ।

काइरन ट्रिपियरविरुद्ध इभान पेरिसिच
ट्रिपियर जारी विश्वकपका उदाउँदा स्टारमा देखिएका छन् । इंग्ल्यान्डका पूर्व कप्तान डेविड बेकह्यामकै शैलीमा क्रस गर्ने क्षमताका कारण उनले ‘बरी बेकह्याम’ को उपमा पाएका छन् । जारी प्रतियोगितामा ट्रिपियर सर्वाधिक अवसर सिर्जना गर्ने सूचीमा नेयमर र केभिन डी बु्रयनलाई पछ्याइहेका छन् ।


प्रशिक्षक साउथगेटको ३–५–२ को रणनीतिमा सामान्यतया राइट ब्याक खेल्ने काइल वाल्करलाई सेन्टर ब्याक खेलाएका कारण उनले आक्रमणमा जाने स्वतन्त्रता पाएका छन् । क्रोएसियाविरुद्ध भने पेरिसिचले उनलाई रक्षात्मक रूपमा चुनौती दिनेछन् ।


इन्टर मिलानबाट खेल्दै आएका पेरिसिचले अन्तर्राष्ट्रिय प्रतियोगितामा भएका ११ खेलमा ५ गोल गरेका छन् । क्रोएसियाको आक्रमणमा इंग्ल्यान्डलाई खतरा हुने उनी मुख्य खेलाडी हुन् ।

ह्यारी केनविरुद्ध डेजान लोभरेन

इंग्ल्यान्डका कप्तान एवं केनविरुद्ध लोभरेनको इतिहास राम्रो छैन । अक्टोबरमा प्रिमियर लिगअन्तर्गत टोटेनहमले लिभरपुललाई ४–१ ले पराजित गर्दा केनविरुद्ध खराब प्रदर्शन गरेका लोभरेन आधा घण्टामै परिवर्तित भएका थिए ।


त्यस प्रदर्शनपछि धेरैले लोभरेनले अब एनफिल्डमा फेरि खेल्न नपाउने आँकलन गरेका थिए । तर क्लब स्तरमा उनले सुधारिएको प्रदर्शन गर्दै प्रशिक्षक योर्गेन क्लोपको मन जिते । विश्वकपमा पनि क्रोएसियाली डिफेन्सको राम्रो प्रदर्शनमा उनले महत्त्वपूर्ण भूमिका खेलेका छन् । समूह चरणमा त यो डिफेन्सले लियोनल मेसीलाई चुप राखेको थियो ।


लोभरेनविरुद्ध केनले ५ खेलमा ५ गोल गरेका छन् । जारी विश्वकपमा ६ गोल गरिसकेका केन यस खेलमा थप गोल गर्दै गोल्डेन बुट पक्का गर्ने दाउमा हुनेछन् ।


प्रकाशित : असार २७, २०७५ ०८:१८
प्रतिक्रिया
पठाउनुहोस्

टोरेस जापान लागे

रोयटर्स

म्याड्रिड — स्पेनका पूर्व स्ट्राइकर फर्नान्डो टोरेसले आफू जापानिज माथिल्लो डिभिजनको क्लब सागन टोसुमा आबद्ध भएको घोषणा गरेका छन् । गत महिना एट्लेटिको म्याड्रिडबाट सम्झौता सिध्याएपछि उनी खुला रहेका थिए ।

‘मलाई सबै महादेशबाट प्रस्ताव आएको थियो, मेरो नयाँ टोली जापानको सागान टोसु हुनेछ,’ म्याड्रिडमा आफैंले सञ्चालन गरेको जिममा आयोजित कार्यक्रममा ३४ वर्षे टोरेसले मंगलबार भने, ‘मलाई फ्रान्स, जर्मनी र स्पेनबाट पनि प्रस्ताव आएको थियो । तर म फेरि अर्को युरोपियन टिम चाहन्न थिएँ । म नयाँ चुनौती त्यो पनि फरक स्थानबाट चाहन्थें ।’


स्रोतहरूका अनुसार टोरेसलाई अस्ट्रेलियाका सिड्नी एफसी र मेजर लिग सकरको सिकागो फायरबाट पनि प्रस्ताव आएको थियो । टोरेजले टोसुसँग १८ महिने सम्झौता गरेका छन् र त्यो सम्झौता बढाएर २०२० सम्म राख्न पाउने विकल्प पनि छ । टोसुले पनि आफ्नो वेबसाइटबाट यसको आधिकारिक घोषणा गर्दै टोरेजलाई ९ नम्बर जर्सी दिने जनाएको छ । टोरेसले आफ्नो खेलजीवनको अधिकांश समय यही जर्सी लगाए ।


टोरेसले एट्लेटिकोबाट दुई स्पेल खेले । त्यसअघि उनी इंग्ल्यान्डको लिभरपुल, चेल्सी हुँदै इटालीको एसी मिलान पुगेका थिए । उनले स्पेनबाट विश्वकप र दुईपल्ट युरोपियन च्याम्पियनसिप पनि जितेका छन् । टोसुबाट उनले जुलाई २२ मा डेब्यू गर्ने सम्भावना छ ।

प्रकाशित : असार २७, २०७५ ०८:११
पूरा पढ्नुहोस्
प्रतिक्रिया
पठाउनुहोस्