शक्तिशाली फ्रान्सको भाग्य

फ्रान्स पहिलो सेमिफाइनलमा बेल्जियमलाई १–० ले हराएर १२ वर्षपछि विश्वकपको फाइनल पुगेको छ ।
राजु घिसिङ

सेन्ट पिटर्सबर्ग — डिडियर डेसच्याम्पको कप्तानीमा फ्रान्स सन् १९९८ को विश्वकप फाइनल पुगेको थियो । त्यस बेलाको उसको उपाधि होड डिफेन्डिङ च्याम्पियन ब्राजिलविरुद्ध थियो । फ्रान्स घरेलु टिम भए पनि ब्राजिललाई उपाधिको मख्य दाबेदार मानिएको थियो ।

तर, जिनेदिन जिदानप्रेरित फ्रान्स ३–० को जित निकालेर पहिलोपल्ट विश्वविजेता बनेको थियो ।

उनै कप्तान डेसच्याम्पको टिमले फेरि विश्वकपको फाइनल खेल्ने पक्का गर्‍यो । रुसमा भइरहेको २१ औं विश्वकपको पहिलो सेमिफाइनलमा बेल्जियमलाई १–० ले हराएर फ्रान्स दोस्रोपल्ट विश्वविजेता बन्ने अभियानमा अगाडि बढेको हो । यसबीच फ्रान्सले सन् २००६ मा पनि विश्वकप फाइनल खेलेको थियो । त्यतिबेला उसलाई इटालीले ट्रफी चुम्नबाट रोकेको थियो ।

Yamaha

डिफेन्डर सामुइल उम्टिटीको हेडर गोलसँगै फ्रान्स सेन्ट पिटर्सबर्ग रंगशालामा मंगलबार बेल्जियमलाई १–० ले हराएर तेस्रोपल्ट विश्वकप फाइनल पुर्‍यो । फ्रान्ससँग यसपालि निकै उत्कृष्ट खेलाडीहरूको साथ छ । प्रशिक्षकका रूपमा डेसच्याम्पले सम्हालेको टिमले रुसमा सुस्त सुरुआत गरेर पनि सही समयमा लय समातेको छ ।

फ्रान्सले अन्तिम १६ मा लियोनल मेसीको अर्जेन्टिनालाई ४–३ ले हराएको थियो । उक्त खेललाई यो प्रतियोगिताकै सबैभन्दा सनसनीपूर्ण खेलका रूपमा लिइएको छ । त्यसमा देखिएको डिफेन्सको कमजोरीलाई फ्रान्सले क्वाटरफाइनलमा लुइस स्वारेजको टिम उरुग्वेलाई २–० ले परािजत गर्दा सच्याएको थियो । स्टार खेलाडीले भरिएको बेल्जियमलाई सेमिफाइनलमा पन्छाएपछि फ्रान्स उपाधिका लागि परिपक्व टिममा उभिएको छ ।

तर, डेसच्याम्पको टिमको विश्वकप जित्ने भाग्य १९९८ मा ब्राजिलको जस्तै नहोला पनि भन्न सकिन्न । किनभने त्यतिबेला ब्राजित एकपछि अर्को उत्कृष्ट खेल पस्कँदै फाइनलमा पुगेर पनि डेसच्याम्प नेतृत्वको टिमसँग निरीह भएको थियो । त्यति टाढा पनि जानुपर्दैन । दुई वर्षअघिको युरोपियन च्याम्पियनसिपमा लोभलाग्दो खेल प्रदर्शन गरेको डेसच्याम्पकै टिम फ्रान्स फाइनलमा पुगेको थियो । जसोतसो फाइनल पुगेको पोर्चुगलका सुपरस्टार क्रिस्टियानो रोनाल्डोले चोट बेहोर्दै चाँडै मैदान छाड्नुपर्‍यो । फाइनलमा पनि फ्रान्सको खेल राम्रै थियो । तर, अतिरिक्त समयमा एडरको गोलमा पोर्चुगल च्याम्पियन भइदियो ।

जितपछि फ्रान्सेली टोली  । तस्बिर : एपी

त्यसैले हरेक खेलमा कमजोरी सच्याउँदै राम्रो खेल पस्किरहेको फ्रान्स नै यसपालि विश्वकप च्याम्पियन हुन्छ भन्ने कुनै ग्यारेन्टी छैन । उसको फाइनलको प्रतिस्पर्धी इंग्ल्यान्ड वा क्रोएसिया हुनेछ । यी दुवै टिम ठूलालाई पन्छाउँदै अघि बढेका होइनन् । र, उनीहरूलाई फ्रान्सभन्दा बलियो मान्ने आधार पनि छैन । वास्तवमै भन्ने हो भने क्रोएसिया वा इंग्ल्यान्डको फाइनल यात्रा ‘अन्डर डग’ को रूपमा रहनेछ ।

पिटर्सबर्गमा भएको सेमिफाइनलमा एन्टोइन ग्रिजमनले हानेको कर्नरमा बार्सिलोनाका डिफेन्डर उम्टिटीले हेडद्वारा ५१ औं मिनेटमा गोल गरेका थिए । अन्तत: त्यही गोल सुपर स्टारहरूको टिमको प्रतिस्पर्धामा निर्णायक बन्यो । चार वर्षयता डेसच्याम्पले फ्रान्सेली टिम सम्हालिरहेका छन् । र, उनीसँग जुन स्तरका खेलाडी छन्, जस्तो टिम छ त्यसका आधारमा फाइनलमा पुग्नु एकदमै ठूलो सफलता भने होइन । रुसमा उसको सफलतालाई खाली उपाधिसँग मात्र जोडेर हेरिनेछ । किनभने यो टिममा उही खेलाडीको वर्चस्व छ, जसले युरो २०१६ को फाइनल पनि खेलेको थियो ।

रोबर्टो मार्टिनेजको टिम बेल्जियमले क्वाटरफाइनलमा ब्राजिललाई २–१ ले पराजित गर्दा उत्कृष्ट प्रदर्शन गरेको थियो । त्यस आधारमा उसले फ्रान्सलाई कडा टक्कर दिने अनुमान गरिएको थियो । लेस ब्लुजको तुलनामा बेल्जियन दर्शकको बाहुल्य रहेको पिटर्सबर्ग रंगशालामा त्यस्तो भएन ।

ब्राजिली डिफेन्सलाई ध्वस्त बनाएका केभिन डी ब्रुयन, इडेन हाजार्ड र रोमेलु लुकाकुले उम्टिटी, राफेल भारान, बेन्जामिन पाभार्ड र लुकास हर्नान्डेजको फ्रान्सेली रक्षापंक्ति तोड्न सकेनन् । ब्रुयनको शक्तिशाली आक्रमणलाई २१ औं मिनेटमा गोलकिपर ह्युगो लोरिसले बचाउ गरेका थिए । मारोउने फेलानी, नासेर चाड्ली र मौसा डेम्बेले मैदानमा हराएजस्तै देखिएका थिए ।

ओलिभिएर जिरुड फेरि एकपल्ट गोलको खाता खोल्न असफल भए पनि १९ वर्षीय फरवार्ड केलियन एमबाप्पे र एन्टोइन ग्रिजमनले बेल्जियन डिफेन्सलाई पूरा खेलमा दबाबमा राखेका थिए । टिममा फर्किएका मिडफिल्डर ब्लेसी मतोउडी पनि मैदानमा जमेका थिए । दुई पहेँलो कार्डको कारण निलम्बित रहेका डिफेन्डर थोमस मुनियरको अनुपस्थिति बेल्जियन टिममा खटकएको थियो ।

प्रतियोगितामा सर्वाधिक गोल गरेको बेल्जियमको यो टिमलाई स्वर्णिम पुस्ता मानिन्छ । यसपालि सेमिफाइनलमा रोकिएपछि यो पुस्ताको अन्त्य उपाधिविहीन रूपमै टुंगिने हो कि भन्ने डर बढेको छ । बेल्जियम दोस्रोपल्ट अन्तिम चारमा रोकिएको हो । यसअघि सन् १९८६ मा डिएगो म्याराडानाप्रेरित अर्जेन्टिनाले बेल्जियमलाई सेमिफाइनलमा हराएको थियो । त्यो विश्वकपमा अर्जेन्टिना च्याम्पियन नै भएको थियो । दोस्रोपल्ट विश्वकप विजेता बन्ने फ्रान्सको भाग्य भने यसपालि १५ जुनमा लुजनिकी रंगशालामा हुने फाइनलमा उसैका स्टार खेलाडीहरूको प्रदर्शनमा निर्भर हुनेछ ।

Esewa Pasal

प्रकाशित : असार २८, २०७५ ०८:०८
ADVERTISEMENT
प्रतिक्रिया
पठाउनुहोस्

भारले फेरेको निर्णय

रोयटर्स

सेन्ट पिटर्सबर्ग — फिफा विश्वकप २०१८ मा भिडियो एसिस्टेन्ट रेफ्री (भार) पहिलोपल्ट प्रयोग गरिएको हो । जारी संस्करणको दोस्रो सेमिफाइनल अघिसम्म ५ अवसरमा भारले रेफ्रीको निर्णय परिवर्तन गर्न सघाउ गरेको थियो ।

फ्रान्स २–१ अस्ट्रेलिया
जुन १६, २०१८
समूह ‘सी’
फ्रान्सले विश्वकपमा खेलेको पहिलो खेलमा अस्ट्रेलियाको सामना गर्दा भारको सहायता लिएर पेनाल्टी निर्णय लिइएको थियो । एन्टोइन ग्रिजमन गोल गर्न अगाडि बढेको अवस्थामा जोस रिस्डनले टयाकल गर्दा उनी पेनाल्टी क्षेत्रभित्र लडे । त्यसबेला रेफ्री आन्द्रेस कुन्हाले खेल जारी राख्न भारको सम्पर्कपछि खेल तत्काल रोके । रेफ्री आफैंले मैदानबाहिर रहेको स्क्रिनमा रिप्ले हेरेपछि पेनाल्टीको निर्णय लिए । ग्रिजमनले त्यसै पेनाल्टी गोलमा परिणत गर्दै फ्रान्सलाई अग्रता दिलाएका थिए ।

ब्राजिल २–० कोस्टारिका
जुन २२, २०१८
समूह ‘ई’
निर्धारित समयको खेल १२ मिनेट बाँकी हुँदा गोलरहित बराबरीमा थियो । ब्राजिलको एक आक्रामक मुभका क्रममा जियानकार्लो गोन्जालेजले छोएपछि नेयमर पेनाल्टी क्षेत्रभित्र लडे, जसको नतिजा रेफ्री बोर्न क्विपर्सले पेनाल्टीको निर्णय लिए । तर भारको सल्लाहपछि रेफ्री क्विपर्सले रिप्ले हेरे र आफ्नो निर्णय परिवर्तन गरे । रेफ्रीले पेनाल्टी दिएको निर्णय भारको सहायताले फिर्ता लिएको विश्वकपमा यो नै पहिलो अवसर थियो ।

इरान १–१ पोर्चुगल
जुन २५, २०१८
समूह ‘बी’
पोर्चुगलका कप्तान क्रिस्टियानो रोनाल्डोलाई पेनाल्टी क्षेत्रभित्र फाउल हानेपछि रेफ्रीले जारी विश्वकपको १९ औं पेनाल्टीको अवसर प्रदान गरे । रोनाल्डोले उक्त पेनाल्टी चुकाए तर यससँगै एकै संस्करणमा सर्वाधिक पेनाल्टीको कीर्तिमान भने कायम भयो । उक्त खेलमा दुई अवसरमा भारको प्रयोग गरियो । रोनाल्डोले इरानी खेलाडीलाई कुहिनाले हानेपछि रेफ्रीले पहेँलो कार्ड देखाए । अर्को क्षणमा भने इरानले अन्तिम समयमा ह्यान्डबलका कारण पेनाल्टीको अवसर पायो, जुन बराबरी गोल गर्न पर्याप्त रहयो ।

स्पेन २–२ मोरक्को
जुन २५, २०१८
समूह ‘बी’
इरानले पोर्चुगलविरुद्ध पेनाल्टीमार्फत् बराबरी गोलको खुसी मनाउँदै गर्दा स्पेनका लागि इयागो आस्पासले मोरक्कोविरुद्ध बराबरी गोल फर्काएका थिए । तर सहायक रेफ्रीले अफसाइड देखाएपछि उक्त गोल मान्य भएन । ठीक त्यसैबेला रेफ्री रावसान इर्मातोभलाई भारले रिप्ले हेर्ने सुझाव दियो । रेफ्रीले रिप्ले हेरेपछि अफसाइडको निर्णय बदले र गोल मान्य भयो । यस गोलसँगै स्पेन समूह विजेता हुँदै अर्को चरण प्रवेश गर्‍यो ।

स्वीडेन १–० स्वीट्जरल्यान्ड
जुलाई ३, २०१८
राउन्ड अफ १६
स्वीडेन १–० ले अगाडि थियो । स्वीट्जरल्यान्डले खेलको अन्त्यतिर दबाब बनाइरह्यो । स्वीडेनका मार्टिन अल्सनले तीव्र गतिमा काउन्टर अटयाक गर्दा डिफेन्डर माइकल लाङले टयाकल गरे र रेफ्रीले स्वीडेनलाई पेनाल्टी दिँदै लाङलाई रातो कार्ड देखाए । तर भारको सुझावपछि फाउल पेनाल्टी क्षेत्रबाहिर भएको निर्णय आयो । रेफ्रीले फ्रिकिकमात्र दिए ।

प्रकाशित : असार २८, २०७५ ०८:०७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT