इंग्ल्यान्डको लय निरन्तर रहेन

विश्वकप विश्लेषण
नवीन न्यौपाने

काठमाडौँ — इंग्ल्यान्डले खेलमा नियमित शैलीलाई निरन्तरता दिँदै तीव्र गतिमा आक्रमण गरेर सुरुआत गरेको थियो । सेट पिसमा लगातार सफलता हात पारिरहेको इंग्ल्यान्डले यस खेलमा पनि खाता खोल्न सेट पिसकै सहायता लियो । पाँचौं मिनेटमा काइरन ट्रिपियरले गरेको फ्रिकिक उत्कृष्ट थियो र अग्रता दिलाउन सफल रह्यो ।

डिफेन्सले बल पाउनेबित्तिकै आक्रमणतर्फ अगाडि बढेको इंग्ल्यान्डले पहिलो हाफमा क्रोएसियाली डिफेन्सलाई केही समस्या दिएको थियो । ह्यारी केन, रहिम स्टर्लिङ र जेसी लिङ्गार्डले बल पाउनासाथ तीव्र गतिमा अगाडि बढेको इंग्ल्यान्डलाई पहिलो हाफमा पाएका अन्य अवसर सदुपयोग गर्न नसक्नु महँगो साबित भयो ।

दोस्रो हाफमा भने पहिलो हाफको लयलाई निरन्तर दिन नसक्नु इंग्ल्यान्डको कमजोर पक्ष रहयो । अग्रता लिएपछि त्यसैलाई बचाएर खेल्ने रणनीति बनाएर आक्रामक रूपमा अगाडि नबढ्नु महँगो साबित भयो । स्टर्लिङलाई निकालेर उनको स्थानमा मार्कस रासफर्ड आएपछि इंग्ल्यान्डको आक्रमण झनै कमजोर बनेको पाएँ । समग्रमा पहिलो हाफमा खेलेको आक्रामक खेल दोस्रोमा पनि निरन्तरता दिएको भए खेल जित्ने मात्र नभएर गोल अन्तर पनि बढाउने सम्भावना रहन्थ्यो । सेट पिसबाहेकको स्थितिमा इंग्ल्यान्डले बिरलै खतरा स्थिति सिर्जना गरायो ।

Yamaha

युवा खेलाडीले भरिपूर्ण इंग्ल्यान्डले प्रतियोगिता सुरु हुँदा सेमिफाइनल पुग्ने अपेक्षा गरिएको थिएन । तर प्रत्येक खेलमा अनुकूल नतिजा निकालेको टोलीले प्रदर्शनमा पनि निखार ल्याउँदै गयो । बुधबार विगतका खेल भन्दा केहि बढी दबाब लिएका कारण पनि इंग्ल्यान्ड सफल हुन सकेन । गोलरक्षक जोर्डन पिकफर्डले राम्रो प्रदर्शन गरे पनि डिफेन्सको गल्तीमा दुवै गोल सम्भव भएको थियो ।

इंग्लिस टोलीमा प्लेमेकरको कमी पनि देखियो ।

क्रोएसियाले पहिलो हाफको सुरुआतमै गोल खाए पनि बल पोसेसनमा ध्यान दिएर संयमित भएर आक्रमण बुनिरहयो । स्वीच प्ले र क्रसिङमार्फत इंग्लिस हाफमा दबाब बनाए पनि गोलपोस्टमा आक्रमण गर्न भने सकेको थिएन । दोस्रो हाफमा केही गति बढाएको क्रोएसियाले पकड जमाउन सफल रहयो । ६८ औं मिनेटमा पेरिसिचले क्रसबाट आएको बललाई गोलमा परिणत गर्दै खेल बराबरीमा ल्याए । उनकै गोलपछि लगातार आक्रमणमा देखिएको क्रोएसियाले लगत्तै अर्को मौका पाए पनि पोस्टमा लगेर फर्कनु दुर्भाग्य रहयो ।

नियमित समयमा पाएको मौका सदुपयोग गर्न असफल रहे पनि अतिरिक्त समयको दोस्रो हाफमा भने क्रोएसियाले अपेक्षित अग्रता लियो । इंग्ल्यान्डले बललाई राम्रो क्लियर गर्न नसक्दा डिफेन्स सजग नभएको फाइदा उठाउँदै पेरिसिचको पासमा मान्जुकिचले अग्रता दिलाए । प्रशिक्षक डालिचले खेल अवधिभर बिरलै खतरा बनाएका मान्जुकिचलाई अन्तिम समयसम्म मैदानमा राख्नु उक्त गोलले साबित गरेको थियो । उक्त गोलपछि इंग्ल्यान्डले केही प्रयास गरे पनि सफल भने हुन सकेन ।

पछिल्ला केही खेलमा लगातार अतिरिक्त समयसम्म खेलेको भए पनि क्रोएसिया थकित देखिएको थिएन । फिटनेसमा टोलीले धेरै ध्यान पुर्‍याएको कारण नै यो सम्भव भएको हो । मोड्रिच र राकिटिचजस्ता खेलाडीले आफ्नो अनुभव उपयोग गर्दै मिडफिल्डमा एकछत्र राज गर्न सफल भए ।

प्रकाशित : असार २९, २०७५ ०७:३७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

फ्रान्सको सन्तुलित प्रदर्शन

विश्वकप विश्लेषण
नवीन न्यौपाने

काठमाडौँ — फ्रान्स र बेल्जियम दुवै टोली आक्रामक रणनीति लिएर सेमिफाइनलमा उत्रिएका थिए । फ्रान्सले सुरुआतको केही समय हेर्दा बल पोसेसन राखेर खेल्ने लक्षण देखाएको थियो तर पाँच मिनेटपछि भने रक्षात्मक खेल्न खोजेको देखियो ।

सामुइल उम्टिटीको गोलपछि खुसी साट्दै फ्रान्सेली खेलाडी ।

फ्रान्सले केलियन एमबाप्पे र एन्टोइन ग्रिजमनको आक्रामक गति प्रयोग गरेर छिटो आक्रमण गर्ने प्रयास गरेको थियो । फ्रान्सले संख्यात्मक रूपमा धेरै आक्रमण नगरे पनि टोलीको प्रयासले बेल्जियमलाई कठिन समय दिएको थियो ।

दोस्रो हाफमा भने फ्रान्सले सुरुआतदेखि नै आक्रमणमा जोड दिएको थियो । त्यसकै नतिजा सेट पिसबाट ५१ औं मिनेटमा फ्रान्स अग्रता लिन सफल भयो । ग्रिजमनको कर्नरमा सामुइल उम्टिटीले सुन्दर हेडर गर्दै अपेक्षित अग्रता दिलाए । विश्वकपमा यसपल्ट सेट पिसमा धेरै गोल भएका छन् । फ्रान्सको कम्प्याक्ट डिफेन्स राख्दै तीव्र गतिमा आक्रमण गर्ने रणनीति सफल भयो ।

यता बेल्जियमले सुरुआतबाट बल पोसेसन राखेर आक्रमण बुन्ने प्रयास गरेको थियो । प्रशिक्षक रोबर्टो मार्टिनेजले यस खेलमा नियमित ४–२–३–१ छाडेर ३–५–२ फर्मेसनमा खेल्नु महँगो साबित भयो । मिडफिल्डको मध्यभागमा खेल्ने मारोउने फेलानीलाई विंग्समा लगेर मौसा डेम्बेलेलाई मध्यभागमा खेलाउने रणनीति सफल भएन । यसअघिका खेलमा आक्रामक रूपमा राम्रो खेलिरहेका ड्रिज मर्टेन्सलाई बेन्चमा राख्नु गलत थियो । उनले दोस्रो हाफमा मैदान प्रवेश गरेपछि केही राम्रो आक्रमण बुनेका थिए ।

बेल्जियमले लगातार आक्रमण बुने पनि फ्रान्सका गोलरक्षक ह्युगो लोरिस बाधक बनिरहे । उनले विशेषत: खेल गोलरहित बराबरीमा छँदा गरेको बचाउ उत्कृष्ट थियो । बेल्जियमका गोलरक्षक थिबाउट कोर्टियसले पनि राम्रो बचाउ गरे तर गोल भएको बलमा उनले केही गर्न सकेनन् । फ्रान्सले बनाएको कम्प्याक्ट डिफेन्स चिर्न लामो प्रहार, क्रस वा स्वीच गर्नुपर्ने हुन्छ । बेल्जियमले सबै प्रक्रिया अपनाए पनि गोल निकाल्न भने सकेन ।

सेट पिसमा सफलता हात लागिरहेको बेलामा बेल्जियमले एकै रणनीतिलाई असफल भए पनि निरन्तर लाग्नु गलत भयो । यसै पनि डेम्बेलेबाट अपेक्षित प्रदर्शन हुन नसक्दा दबाबमा परेको बेल्जियमलाई फ्रान्सले काउन्टरमा तर्साएको थियो । फ्रान्सले सबै पक्षमा सन्तुलित प्रदर्शन गर्न सफल हुँदा बेल्जियमको अग्रपंक्ति फिका देखियो । त्यही नै खेलको नतिजा निर्धारण गर्न पर्याप्त रह्यो ।

प्रकाशित : असार २८, २०७५ ०८:०४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT