इंग्ल्यान्डको यो सुरुआत हो : केन

एएफपी

सेन्ट पिटर्सबर्ग — इंग्ल्यान्ड कप्तान ह्यारी केनले युवा इंग्लिस टोली विश्वकप सेमिफाइनलमा पुगे पनि आउने दिनमा त्यसलाई आधार मानेर सुधार गर्नुपर्ने बताएका छन् । शनिबार तेस्रो स्थानको खेलमा बेल्जियमसँग पराजित भएपछि केनले यस्तो अभिव्यक्ति दिएका हुन् ।

गारेथ साउथगेटको टोलीले २८ वर्षमा पहिलोपल्ट अन्तिम ४ मा स्थान बनाए पनि समग्रमा विश्वकपका सातमध्ये ३ खेलमा हार बेहोर्‍यो । तीमध्ये दुई पराजय बेल्जियमविरुद्ध थियो । ‘हामीले उत्कृष्ट टोलीविरुद्धको अन्तरलाई यस प्रतियोगितामा कम गरेका छौं । तर आज र यसअघिका केही खेलले हामीले सुधार गर्ने ठाउँ अझै बाँकी रहेको प्रस्ट देखाएको छ,’ उनले भने, ‘मैले सुरुदेखि हामी सिक्दैछौं भन्दै आएको थिएँ । हामी नियमित सुधार गर्दै प्रदर्शनमा निखार ल्याउन चाहन्छौं ।’

‘हामी अब अर्को सेमिफाइनल खेल्न २० वर्ष प्रतीक्षा गर्ने पक्षमा छैनौं । अब यो स्तरमा बसेर प्रदर्शन सुधार गर्ने हाम्रो सोच छ । यसका लागि केही समय लाग्ने भए पनि हामी तयार छौं,’ केनले थपे । इंग्ल्यान्डको अन्तिम तीन खेलमा गोल गर्न असफल रहे पनि केन सर्वाधिक गोलकर्ता सूचीमा शीर्षस्थानमा छन् ।

Yamaha

कोलम्बिया, पानामा र टयुनिसियाविरुद्ध ६ गोल गर्दै उनले गोल्डेन बुट पक्का गरेका छन् । ‘पछिल्ला केही खेलमा गोल गर्न नसक्दा दुखी छु,’ टोटेनहम हट्स्परका फरवार्ड केनले भने, ‘कहिले सबै प्रयास सफल हुन्छन् त कहिले आउँदैन । तर गोल्डेन बुट जित्नु भनेको गर्व गर्न लायक सफलता हो ।’

प्रकाशित : असार ३२, २०७५ ०७:३८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

हाजार्ड फरक खोज्दै

रोयटर्स

सेन्ट पिटर्सबर्ग — चेल्सीका फरवार्ड इडेन हाजार्डले स्टामफोर्ड ब्रिजमा ६ वर्ष उत्कृष्टसँग बिताएपछि ‘अहिले फरक गर्ने समय’ आएको बताएका छन् । बेल्जियमले शनिबार इंग्ल्यान्डमाथि २–० को जितसहित विश्वकपमा तेस्रो स्थान हात पार्दा गोल गरेका २७ वर्षे हाजार्ड रियल म्याड्रिड जाने चर्चा चुलिएको छ ।

‘मेरो प्रिय गन्तव्य कता हो तपाईहरूलाई थाहा नै छ,’ हाजार्डले शनिबार इंग्ल्यान्डसँगको खेलपछि भनेका थिए, ‘मेरो हातमा हुने भए म बस्ने वा जाने निर्णय गर्थें । तर चेल्सीले अन्तिम निर्णय गर्नेछ मलाई जान दिने विषयमा पनि ।’

चेल्सीले शुक्रबारमात्र व्यवस्थापक एन्टोनियो कोन्टेलाई बर्खास्त गरेको थियो । त्यसको २४ घण्टापछि अर्का इटालियन माउरिसियो सारीलाई लन्डन क्लबको जिम्मेवारी दिइएको छ । नेपोलीबाट आएका सारीले त्यसको केही समयपछि नै ब्राजिलमा जन्मिएका इटालियन मिडफिल्डर जर्जिन्होलाई नेपोलीबाट ल्याइसकेको छ ।

रुस विश्वकपमा कुल ३ गोल गरेका हाजार्डको चेल्सीसँगको सम्झौता अझै २ वर्ष बाँकी छ । उनी फ्रेन्च क्लब लिलेबाट २०१२ को जुनमा ३ करोड २० लाख पाउन्डमा आएयता चेल्सीलाई दुई प्रिमियर लिग, एफए कप, लिग कप र युरोपा लिग दिलाइसकेका छन् । गत वर्षको जुनमा हाजार्डले रिएल म्याड्रिडबाट प्रस्ताव आएमा आफूले मनन गर्ने तर चेल्सीमा अझै धेरै वर्षसम्म रहने पनि जनाएका थिए ।

‘हामी सवैको सपना हुन्छ । त्यो स्पेन पनि हुन सक्छ वा चेल्सीमै रहने पनि हुनसक्छ,’ उनले भनेका थिए । मेमा चेल्सीका सहायक व्यवस्थापक स्टिभ क्लार्कले ट्रान्सफरमा अरु खेलाडी किन्न पनि हाजार्ड बेच्नुपर्ने हुनसक्ने जनाएका थिए । हाजार्डले बेल्जियमबाट ९२ खेल खेल्दै २५ गोल गरेका छन् ।

प्रकाशित : असार ३२, २०७५ ०७:३६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT