आँखा दानमा चेतना बढेन

कान्तिपुर संवाददाता

काठमाडौं — आँखा प्रत्यारोपणबारे ज्ञान र चेतना नहुँदा आँखा दानमा जनचासो बढ्न सकेको छैन । तिलगंगा आँखा अस्पतालका आँखा बैंक व्यवस्थापक पंखनारायण त्वायना चेतना अभावमा थुप्रैले यो अवसर गुमाएको बताउँछन् ।

अस्पतालको आँखा बैंकमा हालसम्म ६० हजारले आँखा दानका लागि इच्छापत्र जाहेर गरेका छन् । यसबाहेक अस्पतालले हालसम्म राजधानीका विभिन्न अस्पताल, पशुपति आर्यघाट, विद्युतीय शवदाह गृहलगायत ठाउँबाट पनि आँखाको नानी संकलन गर्ने बैंकले जनाएको छ ।

मृतकका परिवारलाई परामर्श गरी सम्झाउन सके मात्रै आँखाको नानी दान हुने व्यवस्थापक त्वायना बताउँछन् । ‘आफ्नो मृत्युपश्चात् नेत्र दान गर्दा दृष्टिविहीनले संसार देख्न पाउने भएकाले आँखा दानलाई महादानका रूपमा चेतना स्तर बढाउन सके अभियान धेरै अघि बढ्छ, धार्मिक मूल्य मान्यताका कारण प्रत्यारोपणबारे बुझाउन अप्ठयारो छ,’ उनले भने । बर्सेनि लाखौं आँखा माटो र आगोमा खेर गइरहेको तर अस्पतालमा भने नानी फेर्न सेवाग्राहीले कुर्नुपर्ने बाध्यता भएको उनले जनाए । ‘इच्छाएका व्यक्तिको परिवारले इच्छुकको मृत्युको खबर दिँदैनन्, हामीले सम्पर्क गरेर सोध्ने कुरा पनि आउँदैन,’ उनले भने । 

आव ०७३/७४ मा ७ सय ११ जनाले आँखा दान गरेको बैंकको तथ्यांक छ । ४ वर्षअघिदेखि दानका लागि राजधानीका केही अस्पतालले पनि चेतना फैलाउने काम गर्दै आइरहेका छन् । 

 

प्रकाशित : भाद्र २८, २०७४ ०९:२३
प्रतिक्रिया
पठाउनुहोस्

बिनास्वीकृति डिस्प्ले बोर्ड

कान्तिपुर संवाददाता

ललितपुर — जिल्लाको जावलाखेलमा बिनास्वीकृति राखिएको डिजिटल डिस्प्ले ललितपुर महानगरपालिकाले हटाउन सकेको छैन । ठेकेदार कम्पनी लभली मिडिया सर्भिसले प्रक्रिया नपुर्‍याई जावलाखेल भलिबल प्रशिक्षण केन्द्रको भवनमाथि डिस्प्ले बोर्ड राखेको हो ।


नगरपालिकाका कार्यकारी अधिकृतले बोर्ड हटाउन नगर प्रहरीलाई पत्र पठाएपछि मंगलबार पुगेको नगरप्रहरी टोली हटाउने साधनको अभावका कारण फर्किएको छ । ‘हामीसँग ठेकेदारले बोर्ड आफैं हटाउँछु भनेका छन्,’ ललितपुर नगर प्रहरी बलका नायब उपरीक्षक कदमलाल महर्जनले भने, ‘अटेर गरेमा हामी हटाउँछौं ।’
भलिबल प्रशिक्षण केन्द्रको भवनमा बोर्ड राख्न दिन जावलाखेल केन्द्र र मिडिया सर्भिसबीच सम्झौता भएको थियो । सम्झौताको मिति र रकम भने समितिले खुलाउन चाहेन । केन्द्रका अध्यक्ष माधव खड्काले सम्पूर्ण कानुनी प्रक्रिया पुर्‍याएर मात्र बोर्ड राख्ने पाउने गरी मिडिया सर्भिससँग सम्झौता भएको बताए । ‘हामीले त ठेकेदार कम्पनीले प्रक्रिया पुर्‍याएर मात्र बोर्ड राखेको भन्ठानेका थियौं,’ उनले भने, ‘हामी तत्काल हटाउन लगाउँछौं ।’ उनले ठेकेदारले सम्झौताविपरीत काम गरेमा समितिलाई कुनै पनि हालतमा मान्य नहुने बताए ।
कानुनअनुसार यसरी डिजिटल डिस्प्ले बोर्ड राख्नुपहिला सम्बन्धित महानगरपालिकासँग अनुमति लिनुपर्छ । ललितपुर महानगरपालिकाको विज्ञापन करअनुसार २०७३/७४ का लागि प्रस्तावित दररेटमा नेपाली फिल्म, डकुमेन्ट्री सुटिङको प्रतिदिनको ५ हजार, विज्ञापन/गीत/टीभी कार्यक्रम/सिनेमा सुटिङ (विदेशी भाषामा) सार्क मुलुकका लागि प्रतिदिन २५ हजार र सार्कबाहेकका मुलुकका लागि एक लाख रुपैयाँ तिर्नुपर्ने प्रावधान छ । स्टल राखी विज्ञापन गरेमा प्रतिदिन प्रतिस्टलको ३ सय, गाडी राखी विज्ञापन गरेमा प्रतिगाडी प्रतिसाता २ हजार, इलेक्ट्रोनिक/डिजिटल बोर्डको प्रतिवर्गफिट वार्षिक ५ सय, तुल, ब्यानर राखी विज्ञापन गरेमा (मूल सडकको २ सय मिटरभित्रको भित्री सडकमा) मा प्रतिब्यानर प्रतिसाता ५ सय तिर्नुपर्ने कानुनी प्रावधान छ । तर लभली मिडिया सर्भिसले मनोमानी ढंगले करिब ३०/३२ फिटको ठूलो डिस्प्ले बोर्ड राखेको छ ।
बोर्ड राखिएको स्थान जावलाखेल रातो मत्स्येन्द्रनाथको भोटो जात्रा देखाउने ऐतिहासिक ठाउँ हो । पहिला सोही ठेकेदार कम्पनी मिडिया सर्भिसले हाल डिस्प्ले बोर्ड राखिएकै स्थानमा होडिङ बोर्ड राखेका थिए । पुरातात्त्विक महत्त्वको स्थान कुरूप भएको भन्दै त्यतिबेला स्थानीवासीले विरोध जनाएका थिए । लभली मिडिया सर्भिसका सञ्चालक किशोर राउतले स्वीकृति लिन बुधबारबाट प्रक्रिया थाल्ने बताए । ‘बोर्ड राख्न आज मात्र सक्किएको हो,’ उनले भने, ‘बोर्ड राख्ने बारेमा सुरुमा ललितपुर महानगरापालिकामा बुझ्दा बनाइसकेपछि मात्र स्वीकृति लिए पनि हुन्छ भन्नुभयो । त्यसैले प्रक्रिया नथालेको हो ।’

प्रकाशित : भाद्र २८, २०७४ ०९:२३
पूरा पढ्नुहोस्
प्रतिक्रिया
पठाउनुहोस्