आलुमा छ औषधीय गुण

कान्तिपुर संवाददाता

काठमाडौं — आलुलाई तरकारीको राजा मानिन्छ । विश्वभरि तरकारीको रूपमा जति आलुको उपयोग हुने गर्छ त्यति सायदै कुनै अर्को तरकारीको हुन्छ । आलुलाई सदावहार तरकारीकै मात्र दर्जा प्राप्त छैन, यसमा विलक्षण औषधीय गुणसमेत छ ।

आलुको प्रकृति शुष्क र न्यानो हुन्छ । यसमा थुप्रै पौष्टिक तत्त्व पाइन्छन्, जो हाम्रो शरीरको लागि आवश्यक हुन्छन् । आलुमा क्याल्सियम, फलाम, भिटामिन बी र फस्फोरस धेरै मात्रामा हुन्छ । यसैले आलुलाई पूर्ण आहारा भनिन्छ ।

स्वास्थ्यका दृष्टिले आलु अति उपयोगी हुन्छ । आलु खाइरहे रक्तवाहिनीहरू धेरै उमेर सम्म लचिलो बनिरहन्छन् । यसैले भनिन्छ— आलु नियमित खाए दीर्घायु पाउन सकिन्छ ।

स्पेनका अनुसन्धानकर्ताहरूको अनुसार, आलु खाने व्यक्तिहरू रोगव्याधिसँग भिड्ने सामथ्र्य बढ्छ । आलुलाई अनाजमा पुरक आहाराको स्थान प्राप्त छ । आलु जुन किसिमको भए पनि त्यसलाई शीतल, मलरोधक,मधुर, गरिष्ठ, मलमूत्र उत्पन्न गराउने, रुक्ष र रक्तपित्त हटाउने मानिन्छ ।

आलु कफ र वायु गर्ने, बलप्रद्, वीर्यवर्धक र अल्प मात्रामा अग्निवर्धक समेत छ । अति परिश्रमका कारण निर्बल भएका रक्तपित्तले पीडित, अधिक मद्यपान गर्ने, तीव्र जठराग्नि भएकाहरूको लागि आलु अत्यन्त पोषक हुन्छ । आलुमा १.६ प्रतिशत प्रोटिन, २२.९ प्रतिशत कार्बोहाइड्रेट, ७४.७ प्रतिशत पानी, ०.०१ प्रतिशत क्याल्सियम, ०.०३ प्रतिशत फस्फोरस पाइन्छ । प्रति सय ग्राम आलुमा भिटामिन ए ४० आईयू र फलाम ०.७ मिलिग्राम पाइन्छ ।

वैज्ञानिकहरूका अनुसार, आलुको बोक्रा ताछ्दा केही पोषक तत्वसमेत वाहिरिन्छ । आलुलाई उमाले पछि बाँकी रहेको पानीमा पनि भिटामिन हुने भएकोले त्यसलाई फयाँक्नुको सट्टा साग–तरकारी वा दालमा मिसाएर खानुपर्छ ।

आलुको नियमित प्रयोगले रोग प्रतिरोधक शक्तिमा वृद्घि हुन्छ । स्तनपान गराउने आमाले आलु खाइरहे दूधको मात्रा बढ्दै जान्छ ।

आलुका थुप्रै औषधीय प्रयोगसमेत छन् । आयुर्वेदिक प्रयोगहरूका अनुसार आखाको तल भएको कालो घेरा हटाउन आलुलाई पिँधेर आँखाको चारैतिर लगाउनुपर्छ ।

आलुमा पाइने पोटेसियम साल्टले अम्लपित्त रोक्न काम गर्छ । यसले अम्लियतालाई रोक्छ ।

मृगौलाको पत्थरी हुँदा आलुको सेवन गर्नाले थुप्रैलाभ पाइन्छ । पत्थरीका रोगीको लागि आलु सेवन लाभकारी मानिन्छ ।

कतिपय समय चोटका कारण रगत जमी नीलो हुने गरेको छ । यस्तोमा काँचो आलु पिँधेर लगाउनाले फाइदा पुग्छ ।

चर्को घाम वा लूले डढेको छालामा काँचो आलुको रस लगाउनाले छालामा निखार आउँछ । कालोपोतो, चाउरी आदिमा आलुको रस लगाउँदा फाइदा पुग्छ ।

प्रकाशित : मंसिर २, २०७४ ०८:२२
प्रतिक्रिया
पठाउनुहोस्

एकादेशमा अनेक कथा

कान्तिपुर संवाददाता

काठमाडौं — एकादेशमा इन्टरनेसनल सर्ट फिल्म फेस्टिभलको पहिलो दिन झन्डै ४० वटा कथा पर्दामा देखाइए । कमलपोखरीस्थित कुमारी हलमा चलिरहेको फेस्टिभलमा शुक्रबार ‘लेट देयर बी लाइट’ विधाअन्तर्गतका चार फिल्मबाट प्रदर्शन थालिएको थियो । तिनमा नेपाल, सर्बिया, नर्बे र इरानमा बनेका फिल्म देखाइए ।

हल एकमा सारा तामाङको निर्देशन रहेको ‘द कलर्स अफ लाइफ’, मतिजा ग्लुस्केभियाको ‘लुप’, सेबास्टियन वार्टिन्कको ‘एम्बुलेन्स’ र अमीर मसौदको ‘स्क्रिमर’ चलिरहँदा दोस्रो हलमा ‘मेड इन बंगलादेश एभ्रिडे स्ट्रगल्स’ शृंखलाका तीन फिल्म देखाइए । अघिल्लो महोत्सवमा भुटानी फिल्मलाई प्राथमिकता दिइएकोमा यसपटक बंगलादेशका फिल्ममाथि बहस चलाउन खोजेको आयोजकको भनाइ छ ।

‘फयुचर अफ सिनेमा स्टल १ र २’, ‘पावर : फ्री पिरिटी र स्ट्ेरन्थ’, ‘चेन्जिङ प्रस्पेक्टिभ’ र ‘मेड इन बंगलादेश एभ्रिडे डेस्टिनेसन’ सेसनमा फिल्महरू प्रदर्शन गरिएका थिए । महिलाका मुद्दा उजागर गर्ने उद्देश्यले ‘पावर’ विधामा महिला विषयक फिल्म समेटिएको आयोजकमध्येका अविनाशविक्रम शाहले बताए । ‘फिल्ममा महिलाबारे प्यानल डिस्कसन नै छ,’ उनले भने, ‘त्यसमा मनीषा कोइराल, रम्यता लिम्बू, सुविना श्रेष्ठ र मेनुका राई बोल्नुहुनेछ ।’

शुक्रबार आफ्नो फिल्म ‘रोएर होइन हाँसेर’ प्रदर्शनपश्चात निर्देशक सुजाता ढुंगाना निकै उत्साहित देखिन्थिन् । फिल्ममा उनले दसवर्षे सशस्त्र द्वन्द्वमा महिलाले भोगेको पीडा देखाउन खोजेकी छन् । ‘द्वन्द्वका थुप्रै कथाहरू सुन्नमा आए,’ उनले भनिन्, ‘तर, त्यो द्वन्द्वमा नेपाली महिलाले के भागे ? बेपत्ता पारिएकाको आफन्तको अवस्था कस्तो छ भन्ने कौतूहलता थियो । यही कुरा देखाउन चाहेकी हुँ ।’

चेन्जिङ प्रस्पेक्टिभ विधाअन्तर्गतको ‘लछमनीया’, ‘अ म्यान रिटन्र्ड’, ‘द साइलेन्स अफ द डग्स’ र ‘इन अ नटसेल’ मा दर्शकको राम्रै उपस्थिति थियो । ‘थिएटर्स अफ रियालिटी’, ‘लेज्ला’, ‘गिभ अप द घोस्ट’ जस्ता फिल्मपछि ‘स्केट नेपाल’, ‘टेस्ट अफ लभ’, ‘वाइल्ड स्किन’ जस्ता फिल्म देखाइए । महोत्सवको पहिलो प्यानल डिस्कसनमा ‘ओपनिङ डोर्स’ शीर्षकमा सोफी बौर्डन र पाउलो बेर्तोलिनले कुरा राखे । 

शनिबारको तालिकामा फिनल्यान्ड, स्पेन, फ्रान्स, इटालीलगायतका सर्ट फिल्महरू देखाइँदै छन् । आफ्नै सन्तानबाट तिरस्कृत एक आमाको कथा ‘मदर’ मा हेर्न पाइनेछ भने म्यान्मारमा बनेको ‘द रोब’ ले युवा भिक्षुको जीवन संघर्ष देखाउनेछ । आफूलाई बलात्कार गर्नेसँग विवाह गर्न विद्रोह गर्ने फ्रान्काको कथा ‘भायला, फ्रान्का’ फिल्ममा समाविष्ट छ । फेस्टिभलमा ४३ देशका ९९ फिल्म प्रदर्शन भइरहेका छन् ।

 

प्रकाशित : मंसिर २, २०७४ ०८:२२
पूरा पढ्नुहोस्
प्रतिक्रिया
पठाउनुहोस्