राष्ट्रिय प्रत्यारोपण केन्द्रमा तेस्रो पटक कलेजो प्रत्यारोपण

करिब एक वर्ष सात महिनायता केन्द्रले तीन पटक कलेजोको प्रत्यारोपण गरी सकेको हो ।

उक्त प्रत्यारोपण भारतको दिल्ली स्थित म्याक्स अस्पतालका प्रा डा सुभाष गुप्ताको नेतृत्वमा रहेको ९ सदस्सीय टोली र केन्द्रका निर्देशक एव‌ं वरिष्ठ मृगौला तथा कलेजो प्रत्यारोपण विशेषज्ञ डा।पुकार चन्द्र श्रेष्ठको नेतृत्वमा रहेको १५ सदस्सीय टोलीले मिलेर गरेको हो ।

आइतबार विहान सुरु भएको उक्त शल्यक्रिया १४ घन्टा सम्म चलेको थियो । प्रत्यारोपणमा काठमाडौं कपनका बद्री खडकालाई उनका श्रीमती रुसा खडकाले कलेजो दानमा दिएकी थिइन् । खडकालाइ क्रिप्टोजेनिक सिरोसिस भएकोले प्रत्यारोपण गरिएको हो ।

'हामी थप कलेजो प्रत्यारोपणको लागि प्रयासरत छौँ , केन्द्रका निर्देशक डा.श्रेष्ठले भने,'मृगौला प्रत्यारोपणमा हाल केन्द्र स्थापित भए झै कलेजो प्रत्यारोपणलाई समेत अगाडि बढाइने छ ।’

पहिलो कलेजो प्रत्यारोपणमा दक्षिण कोरियाली विशेषज्ञ र दोस्रो प्रत्यारोपणमा भारतको म्याक्स अस्पताल कै विज्ञले केन्द्रलाई सघाएको थियो ।