केरा

कान्तिपुर संवाददाता

काठमाडौँ — केरा अर्थात् जुनसुकै मौसममा प्राय: हरेक ठाउँमा पाइने फल । केरा सबैको पहुँचमा मात्रै हुन्न, खाँदा अत्यधिक फाइदा पनि हुन्छ ।

यसमा पोटासियम, क्याल्सियम, आइरन, म्याग्निज, फोलेट, नियासिन, भिटामिन बी ६, रिबोफ्लोविनजस्ता थुप्रै आवश्यक भिटामिन र खनिज हुन्छन् । यो फल हाम्रो सम्पूर्ण स्वास्थ्यका लागि फाइदाजनक छ, शरीर सञ्चालन सुचारु राख्न अति सहयोगी हुन्छ ।

केरामा पोटासियम प्रशस्त मात्रामा हुन्छ, जसले मुटु स्वास्थ्यलाई सकारात्मक राख्न विशेष भूमिका खेल्छ । शरीरमा पोटासियमको कमी भए धड्कन अनियमित हुन सक्छ । पोटासियमले रक्तचापलाई मात्र नियन्त्रणमा राख्दैन, मृगौलालाई पनि आरामले काम गर्न दिन्छ । मृगौलामा हुने क्यान्सर रोक्न प्रभावकारी हुन सक्छ ।

Yamaha

केरा नियमित रूपमा खाँदा रक्तचाप नियन्त्रण हुन्छ । मुटु र धमनीमा रोग लाग्ने जोखिम कम हुन्छ । यसमा भएको म्याग्नेसियम मुटुलाई सामान्य रूपमा सञ्चालन गर्न अत्यावश्यक मानिन्छ ।

केरामा पाइने भिटामिन ए शरीरको बोसोमा चाँडै घोलिने गर्छ । भिटामिन ए आँखाको स्वास्थ्यका लागि नभई आवश्यक हुन्छ । भिटामिन एको पर्याप्त मात्रा आँखालाई तन्दुरुस्त राख्न नभई हुन्न ।

केरामा भएको आइरनको उच्च मात्राले रगतको कमीलाई हटाउँछ । भिटामिन बी ६ ले रगतमा चिनीको स्तरलाई चाहिने मात्रामा राख्छ ।

केराले हाम्रो पेटको बीएच स्तरलाई सन्तुलित राख्न सघाउँछ । यसमा भएको स्टार्च आन्द्राका लागि फाइदाजनक हुन्छ । यसले पाचनतन्त्रलाई बलियो बनाउन सघाउँछ ।

केही अध्ययनमा उल्लेख भएअनुसार, पाकेको केरामा पाइने पेक्टिनले पेटको क्यान्सरबाट जोगाउँछ । यसले कब्जियतको समस्याबाट समेत राहत दिन्छ । यसमा भएको फाइबरले पाचनक्रियालाई ठीक राख्छ ।

केरा सधैं खाने गरे उदासी रोग (डिप्रेसन) का बिरामीले आराम पाउँदै जान्छन् । केरामा यस्तो प्रोटिन पाइन्छ, जसले खाने मानिसलाई तत्काल आराम अनुभव गराउन सक्छ । केरामा पाइने ट्राइप्टोफान एमिनो एसिडले सेरेटोनिन हार्मोन उत्पन्न गर्छ । यसका कारण मुड राम्रो भएर तनाव हट्छ । यसैले गर्दा डिप्रेसनको बिरामीले केरा खाइरहनु राम्रो मानिन्छ ।

प्रकाशित : भाद्र २३, २०७५ ०८:१०
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

सिरिया द्वन्द्व: ‘इडलिबमा आक्रमण रोकिन्न’

रोयटर्स

जेनेभा — इरानी राष्ट्रपति हसन रौहानीले सिरियाको विद्रोही नियन्त्रित क्षेत्र इडलिबमा ‘आतंककारीमाथि भइरहेको आक्रमण’ नरोकिने जनाएका छन् ।

रूस, इरान र टर्कीका राष्ट्रपति क्रमश: भ्लादिमिर पुटिन, हसन रौहानी र रेसेप तैयप इर्दोगान सिरियाको इडलिब आक्रमणबारे छलफल गर्ने क्रममा शुक्रबार तेहरानमा । तस्बिर : रोयटर्स

इरान, रूस र टर्कीका राष्ट्रपतिबीच शुक्रबार तेहरानमा भएको छलफलका क्रममा रौहानीले उक्त चेतावनी दिएका हुन् ।

रौहानीले भने, ‘सिरियामा शान्ति तथा स्थायित्वका लागि आतंककारी समूहविरुद्ध लड्नु अपरिहार्य छ ।’ त्रिपक्षीय बैठकका क्रममा रूसी राष्ट्रपति भ्लादिमिर पुटिनले ‘सिरिया सरकारसँग आफ्नो देशको भू–भाग नियन्त्रणमा लिने पूर्ण अधिकार रहेको’ बताए ।

सिरियाली युद्धमा बाहय खेलाडी देशका राष्ट्रपतिबीचको छलफलले इडलिबको भाग्य निर्धारण हुने बीबीसीले जनाएको छ । यद्यपि, रूसी राष्ट्रपति भ्लादिमिर पुटिन, टर्कीका राष्ट्रपति रेसेप तैयप इर्दोगान र रौहानीबीचको छलफलको विस्तृत विवरण भने सार्वजनिक गरिएको छैन ।

इडलिब सिरियाको एक मात्र विद्रोही नियन्त्रित क्षेत्र हो । अन्तर्राष्ट्रिय सञ्चारमाध्यमले शुक्रबार पनि रूसी युद्धक विमानले उक्त क्षेत्रमा आक्रमण गरेको जनाएका छन् । सिरियाली द्वन्द्वमा इरान, रूस तथा टर्की प्रत्यक्ष रूपमा संलग्न छन् ।

टर्कीले सिरियाली द्वन्द्वका कारण आफ्नो देशको दक्षिण सीमामा थप शरणार्थी समस्या उत्पन्न हुने दाबी गर्दै आएको छ । बसर अल असद सरकारलाई महत्त्वपूर्ण सैन्य सहयोग गर्दै आएका रूस तथा इरानले सिरियाली जिहादी समूह निर्मुल हुनुपर्ने बताउने गरेका छन् ।

यसअघि अमेरिकी राष्ट्रपति डोनाल्ड ट्रम्पले सिरियाको विद्रोही नियन्त्रित इडलिब प्रान्तमा ‘गैरजिम्मेवार ढंगले कारबाही नगर्न’ सिरिया सरकार र उसका साझेदार रूस तथा इरानलाई चेतावनी दिएका थिए ।

संयुक्त राष्ट्रसंघले पनि सिरियाली फौजले गर्न सक्ने हमलाले हजारौं नागरिक प्रभावित हुन सक्ने जनाएको छ । सोमबार अमेरिकी विदेश मन्त्रालयले पनि सिरियाली सरकार र उसका साझेदारले रासायनिक हमला गरे वासिङटनले कडा जवाफ दिने चेतावनी दिएको थियो । राष्ट्रसंघका लागि अमेरिकी राजदूत निक्की हलीले असद, रूस र इरानले इडलिबमा के गर्छन् भन्नेमा अन्तर्राष्ट्रिय समुदायको चासो रहेको दाबी गरिन् ।

अमेरिकाद्वारा चेतावनी
अमेरिकाले सिरियाली विद्रोहीको नियन्त्रणमा रहेको इडलिबमा रासायनिक आक्रमण तयारी भइरहेको दाबी गर्दै सिरिया, इरान तथा रूसलाई चेतावनी दिएको छ ।

सिरियाका लागि नवनियुक्त अमेरिकी राजदूत जिम जेफ्रीले ‘आफूसँग रासायनिक हमलाको तयारीका प्रमाण रहेको’ दाबी गरेका छन् । इडलिब सिरियाका जिहादी समूहको अन्तिम पकड क्षेत्र हो ।

आफ्नो नियुक्तिपछिको पहिलो अन्तरवार्ताका क्रममा जेफ्रीले भने, ‘कुनै पनि आक्रमण हाम्रा लागि सहय हुने छैन । रासायनिक हतियारको प्रयोगका लागि तयारी भइरहेको हामीसँग धेरै प्रमाण छन् ।’ यद्यपि, उनले आफूसँग के–कस्ता प्रमाण छन् भन्नेबारे केही उल्लेख गरेनन् ।

सिरियाली राष्ट्रपति बसर अल असद नेतृत्वको सरकारले उक्त क्षेत्रमाथि नियन्त्रण कायम गर्न अन्तिम प्रयासका लागि शक्ति केन्द्रित गरिरहेको छ । यसअघि पनि सिरिया र रूसमाथि द्वन्द्वग्रस्त क्षेत्रमा रासायनिक हतियार प्रयोग गरेको आरोप लाग्दै आएको छ । यद्यपि, दुवैले उक्त आरोप इन्कार गर्दै आएका छन् ।

प्रकाशित : भाद्र २३, २०७५ ०८:०९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT