‘अझै जिउँदै’

खासमा १२ वर्षको लामो अन्तरपछि कोलिन्स उत्तर अमेरिकाको टुरमा निस्कँदै छन् । अक्टोबर, नोभेम्बरतिर यो टुर चल्नेछ । र, यो टुरको नाम पनि उनले जुराइसकेका छन् र यो हो, ‘नट डेड येट, लाइभ’ । यसको सरासर अर्थ हाम्रोमा ‘म अझै जिउँदै छु’ त हो । यो टुरमा उनलाई साथ दिने पुराना साथीहरू नै हुन्, गितारमा ड्यारल, किबोर्डमा ब्रायड कोल, बासमा लेलान्ड । सँगै ड्रममा कोलिन्सका आफ्नै १६ वर्षीय छोरा निकोलस । त्यसमध्ये ड्यारल त उनको जेनेसिस ब्यान्ड जमानाका साथी हुन् ।

सबैभन्दा पहिले कोलिन्स स्वघोषित संन्यासमा किन जानुपरेको थियो त ? गत जुनतिर उनले लिभरपुलमा कन्सर्ट राखेका थिए, त्यसपछि पालो लन्डनमा थियो । यो कन्सर्ट पनि सात वर्षको अन्तरमा हुन लागेको थियो । लगत्तै उनको युरोप भ्रमणमा निस्कने कार्यक्रम पनि थियो । तर लन्डनमै कन्सर्ट हुन सकेन । यसअघि नै उनी आफू रहेको होटलमा ढले । उनलाई टाउकोमा नरामै्र चोट पनि लाग्यो । खासमा उनलाई आफ्नो खुट्टामा राम्रोसँग उभिरहन समस्या हुन्छ । त्यसैले उनी शरीर अनियन्त्रित हुँदै लड्ने गर्छन् ।

अब उनको उत्तर अमेरिकी टुर कस्तो हुने हो, त्यो हेर्न लायक हुनेछ । तीन वर्ष अगाडि पनि कोलिन्सले अहिले जस्तै ठूलै टुरको घोषणा गरेका थिए र त्यति बेला उनले त्यसको नाम दिएका थिए, ‘नो लन्गर रिटायर्ड’ । अर्थात् ‘मैले संन्यास लिएको छैन ।’ यसको अर्थ उनी संगीत क्षेत्रमा आफू सक्रिय रहेको तथ्य स्थापित गर्न बारम्बार प्रयास त गरिरहन्छन् । तर असफल पनि भइरहन्छन् । त्यसैको कारण त हो, ‘नो लन्गर रिटायर्ड’ पछि अब ‘नट डेड येट, लाइभ’ ।

त्यति बेला उनले रोलिङ स्टोनमा एउटा अन्तर्वार्ता दिएका थिए । त्यति बेला उनलाई सोधिएको थियो, सफलताको राम्रो र नराम्रो पक्ष के हो त ? उनको उत्तर थियो, ‘सफलताको अर्थ हो, आफूले गरेको काम अरूले मन पराउनु र प्रशंसा गर्नु ।’ साँच्चै उनका गीत मन पराउने कमै होलान् । यी पप रक गायकलाई धेरैले मन पराउने गर्छन्, त्यसैले जति बेला उनी धेरै सक्रिय रहे, उनका एल्बम निकै चले । उनका नाम चलेका गीतको सूची लामै छ ।

सामाजिक सन्देश दिन खोजिएको उनको गीत ‘एनेडर डे इन प्याराडाइज’ अझै पनि धेरैले सुनेर गुनगुनाउने गर्छन् । फेरि रोलिङ स्टोनकै अन्तर्वार्तामा फर्कंदा उनी सफलताको खराब पक्षबारे भन्थे, ‘यो संगीत क्षेत्रमा म छु भनेर बारम्बार सिद्ध गर्नुपर्ने हुन्छ । त्यसका लागि निकै मिहिनेत गर्नुपर्छ । यसले तनाव पनि उत्तिकै हुन्छ ।’ कोलिन्सको नजिक रहेका धेरैको अनुभव छ, कोलिन्स लगातार दबाबमा रहने गर्छन्, आफू सक्रिय छ भनेर देखाउन । त्यसैले टुरका नाम त्यसैखाले हुन्छन् ।

पछिल्लो समय कोलिन्स धेरै प्रकारको मानसिक दबाबबाट पनि गुज्रे । उनी आफ्नै श्रीमतीसँग छुट्टिए । यसरी श्रीमतीसँग डिभोर्सबाट गुज्रेको यो पहिलोपल्ट थिएन, तेस्रोपल्ट थियो । ‘ड्रिङ्स’ को बानीले पनि उनलाई धेरै बिगारेको थियो । उनी आफैं भन्छन्, आफ्नो निजी जीवन कष्टकर हुनु पछाडि ‘ड्रिङ्स’ प्रमुख कारण हो । त्यसो त कोलिन्स जत्तिको गायकलाई बारम्बार आफ्नो उपस्थिति जनाइरहनु पर्दैन । खालि उनका प्रशंसकलाई प्रतीक्षा रहनेछ, उनको टुरको ।
–हिमेश