सर्वाधिक शक्तिशाली सीईओ

कान्तिपुर संवाददाता

काठमाडौँ — अमेरिकी म्यागजिन फोब्र्सले सार्वजनिक गरेको सन् २०१८ को विश्वका सबैभन्दा शक्तिशाली व्यक्तिहरूका सूचीमा रहेका ७५ जनामध्ये ३५ जना विभिन्न व्यापारिक समूहमा आबद्ध रहेका प्रमुख कार्यकारी अधिकृत (सीईओ) वा प्रमुखहरू छन् ।

यी प्रमुखमध्ये पनि अधिकांश अमेरिकी छन् भने केही एसियाली, एक युरोपेली र एक अफ्रिकी नागरिक छन् । सबैको व्यापारको हिस्सा जोड्दा ५० खर्ब अमेरिकी डलर हुने १० शक्तिशाली प्रमुख कार्यकारीहरू :


१। जेफ बेजोस, एम्याजोन
अहिले विश्वको सबैभन्दा धनी व्यक्तिमा दरिएका एम्याजोनका जेफ बेजोसको नाम प्रमुखहरूको गणनामा अग्रस्थानमा छ । उनको व्यापार १ खर्ब ३३ अर्ब डलर रहेको छ । इन्टरनेटमा लगभग विश्वका सबै कुनामा सामान बेच्ने एम्याजोनले सुपरमार्केटको चेन होल फुडलाई गत अगस्टमा किनेको थियो । यस्तै एम्याजोनले विभिन्न स्थानमा किताब पसल पनि खोल्न थालेको छ । यस कम्पनीको बजार मूल्य ७ खर्ब ८० अर्ब डलर रहेको छ ।

Yamaha

२। ल्यारी पेज, अल्फाबेट
गुगलको माउ कम्पनी अल्फाबेटका सीईओ ल्यारी पेज अर्का शक्तिशाली सीईओ हुन् । विश्वकै ठूलो सर्च इन्जिन गुगलको नेतृत्वकर्ता कम्पनी अल्फाबेट सम्हाल्नुबाहेक उनले आफैं उड्ने ट्याक्सी ‘किट्टी हक’ मा पनि लगानी गरेका छन् । उक्त कम्पनीले केही समयअघि मात्रै न्युजिल्यान्डमा आफ्नो उड्ने ट्याक्सीको परीक्षण गरेको थियो ।

३। मार्क जुकरबर्ग, फेसबुक
फेसबुकका प्रमुख मार्क जुकरबर्ग गत वर्ष विश्वकै शक्तिशाली व्यक्तिको सूचीमा शीर्ष १० मै थिए । यो वर्ष भने क्याम्ब्रिज एनलाइटिका विवादका कारण उनको स्थान खस्किएको छ । गत मार्चमा फेसबुकले अनधिकृत रूपमा आफ्ना प्रयोगकर्ताको महत्त्वपूर्ण विवरण राजनीतिक परामर्श प्रदान गर्ने संस्थालाई दिएको आरोप लागेको थियो । विवादपछि सुरुमा उनको कम्पनीको सेयरको मूल्यमा गिरावट देखिएको थियो । तर उनले अमेरिकी कंग्रेसको संसदीय सुनुवाइका क्रममा दिएको जवाफले लगानीकर्ता खुसी भए र सो दिन मात्रै फेसबुकको सेयर मूल्यमा ४.५ प्रतिशत वृद्धि देखिएको थियो । हार्बर्ड विश्वविद्यालयको पढाइ बीचमै छोडेका जुकरबर्गको कम्पनीको मूल्य ६९ अर्ब डलर बढी छ ।

४। वारेन बफेट, बर्कसायर हाथअवे
वारेन बफेट प्रमुखहरूको सूचीमा पर्न सफल दोस्रो वयोवृद्ध व्यक्ति हुन् । ८७ वर्षीय उनले केही समय अघि मात्रै अमेरिकी खाद्य सामग्री उत्पादन गर्ने कम्पनी क्राफ्ट हेनिजको बोर्डबाट अवकाश लिएका थिए तर बर्कसायर हाथअवे नामक होल्डिङ कम्पनीका प्रमुखका रूपमा भने काम गरिरहेका छन् । १९६३ मा बर्कसायर खरिद गरेका बफेटको उक्त कम्पनीसँग विश्वका थुप्रै चर्चित कम्पनीहरूको ठूलो मात्रामा सेयर रहेको छ । गत मे महिनामा मात्रै एप्पलको ७ करोड ५० लाख कित्ता सेयर किनेर उनले एप्पलमा आफ्नो सेयरलाई लगभग ५ प्रतिशत पुर्‍याएका छन् ।

५। जेमी डिमन, जेपी मोर्गन
न्युयोर्कस्थित वाल स्ट्रिटमा रहेका शक्तिशाली व्यक्तिहरूको गणनामा जेमी डिमन १९ स्थानमा पर्छन् । विश्वको सबैभन्दा ठूलोमध्येको एक बैंक जेपी मोर्गनका सीईओ हुन् डिमन । उक्त बैंकको कुल सम्पत्ति २ खर्ब डलर रहेको छ । हालसालै गरिएको घोषणाअनुसार डिमन अझै ५ वर्ष प्रमुख रहने बताइएको छ ।

६। ज्याक मा, अलिबाबा
शक्तिशाली सीईओको सूचीमा रहेका धेरै कम गैरअमेरिकीमध्ये अलिबाबाका कार्यकारी अध्यक्ष ज्याक मा एक हुन् । उनी विश्वको सबैभन्दा ठूलोमा गनिने ई–कमर्स साइट अलिबाबाका मालिक र कार्यकारी दुवै हुन् । एम्याजोन जस्तै अलिबाबाको पनि व्यापार दिनानुदिन बढ्दै गइरहेको छ । एम्याजोन र अलिबाबाबीच व्यापार विस्तार गर्ने होडबाजी पनि देखिएको छ । उनले फिल्ममा अभिनय पनि गरेका छन् ।

७। डग म्याकमिलन, वालमार्ट
अमेरिकालगायत विश्वका विभिन्न देशमा आफ्नो सेवा विस्तार गरेको खुद्रा सामान बेच्ने सुपरमार्केट वालमार्टका डग म्याकमिलन पनि शक्तिशाली सीईओको सूचीमा परेका छन् । उनको कम्पनीले विश्वभर गरेर २३ लाखलाई प्रत्यक्ष रोजगारी दिएको छ । यसले पनि अब आफ्नो व्यापार विस्तार भौतिक बजारमा नभई भर्चुअल बजारमार्फत गर्ने नीति बनाएको छ ।'

८। टिम कुक, एप्पल
एप्पल टिम कुकको नेतृत्वमा विश्वकै एक महत्त्वपूर्ण कम्पनीका रूपमा चिनिएको छ । यसको बजार मूल्य पनि विस्तारै उकालो लाग्दै १ खर्ब डलर पुग्न लागेको छ । आर्यफोन १० को बिक्री तीव्र रूपमा नभए पनि नोभेम्बर २०१७ ल्याइएको यस फोनलाई आकर्षक र नौलो उत्पादन मानिएको छ । एप्पल म्युजिकको प्रयोगकर्ता पनि ४ करोड पुगिसकेको छ ।

९। एलोन मस्क, स्पेस एक्स
विश्वकै सबैभन्दा शक्तिशाली रकेट निर्माण गरेर चर्चामा आएको स्पेस एक्सका प्रमुख हुन् एलोन मस्क । यस कम्पनीले गत फेब्रुअरीमा मात्रै शक्तिशाली रकेटको सफल प्रक्षेपण गरेको थियो । शक्तिशाली व्यक्तिको सूचीमा २१ औं स्थानमा रहेका उनी टेल्सा नामक शक्तिशाली र आधुनिक विद्युतीय गाडी उत्पादन गर्ने कम्पनीका पनि प्रमुख हुन् ।

१०। मा हुवातेङ, टेसेन्ट
दस शक्तिशाली सीईओको गणनामा अन्तिममा रहेका छन् एसियाका सबैभन्दा धनी व्यक्ति मा हुवातेङ । पोनी मा उपनामबाट चर्चित हुवातेङ इन्टरनेट–व्यापार कम्पनी टेन्सेन्टका प्रमुख हुन् । सामाजिक सञ्जालको बढ्दो प्रयोगका कारण त्यहाँ विस्तार भइरहेको व्यापार र अनलाइन गेम उनको व्यापारको प्रमुख हिस्सा हो ।
–फोब्र्स म्यागजिन

प्रकाशित : जेष्ठ ११, २०७५ ११:०७
ADVERTISEMENT
प्रतिक्रिया
पठाउनुहोस्
ADVERTISEMENT

अरबदेखि मुस्ताङसम्म

कान्तिपुर संवाददाता

काठमाडौँ — नेपाल मेडिकल कलेजमा एमबीबीएसका विद्यार्थी सन्तोष बस्याल दोस्रो वर्षको परीक्षा सकाएर यसपालि घुम्न निस्किएका थिए । उनी गत फागुनमा यूएई उडेका थिए, जहाँ उनले विदेश गएजस्तो अनुभव नै गरेनन् किनभने जता गए पनि नेपाली नै भेटेका थिए ।

श्रीखर्कबाट तिलिचो जाने बाटो

आबुधाबी, रस अल खेमा, शारजाह र दुबईमा एक साता घुमेर स्वदेश फर्केलगत्तै उनी मनाङ ट्रेकिङमा निस्किए । चारदिने ट्रेकिङमा श्रीखर्कदेखि तिलिचो बेसक्याम्पतर्फ जाँदा पहिरो गएको स्थानमा उनलाई साह्रै डर लागेको थियो । ‘बाटो तल मस्र्याङ्दी नदी बगिरहेको थियो भने बाटो माथिबाट ढुंगा खसिरहेको थियो,’ उनले भने, ‘एक गल्ती भयो कि ज्यान नै गयो जस्तो लाग्ने रहेछ ।’ त्यही बाटोमा एक साथी लडे पनि उनलाई अर्को समूहले बचाएको बस्यालले बताए ।

उनी समुद्री सतहबाट ४,९०० मिटर उचाइमा रहेको तिलिचो हिमताल नजिक पुगेका थिए । तर त्यसको दुई दिनअघि एक पर्यटकको खसेर मृत्यु भएकाले हिउँले पुरिएको तालतर्फ अघि बढ्न नपाएको उनले बताए । त्यस बेला ठूलै हिमपात भइरहेको थियो । अनि बेसक्याम्प फर्किए । र, पोखरा ।


पोखराबाटै बस्याल फेरि ट्रेकिङमा हान्निए, मुस्ताङतिर । त्यसमा ६ दिन बिताएर काठमाडौं फर्केका उनी अहिले कलेजको नियमित कक्षा लिइरहेका छन् । स्याङ्जाका उनले अघिल्लो वर्ष नै च्छो रोल्पा र लाङटाङ ट्रेक पनि भ्याइसकेका थिए । उनले दुबई, मुस्ताङ र मनाङमा खिचेका केही तस्बिर।


अरब मरुभूमि


तिलिचो बेसक्याम्प


गंगापूर्ण ताल


मनाङ


कागबेनी, मुस्ताङ

प्रकाशित : जेष्ठ ४, २०७५ १०:३६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT