ह्यान्डसम भिलेन

गोकर्ण गौतम

काठमाडौँ — हिरो हुन सुकिलो–मुकिलो, बलिष्ठ ज्यान अनि चकलेटी मुहार नै चाहिने । भिलेनचाहिँ चुल्ठे–मुन्द्रे र अजंगको शरीर । भनुँ न, देख्दै डरलाग्दो हुनुपर्ने । दयाहाङ राई, सौगात मल्ल, विपिन कार्कीको आगमनसँगै हिरोको परम्परागत परिभाषा बदलियो । खासगरी, लुट रिलिजपछि । अचेल दयाहाङ कोटीका हिरोकै हालिमुहाली छ । यो सबैले देखेको कुरा भइहाल्यो । त्यसो भए भिलेनको सवालमा ?

भिलेनको हुलियामा पनि बदलाब नआएको होइन तर हिरोको अनुपातमा अलि कम । अनि, जति परिवर्तन भएको छ, त्यति याद गरिएको छैन । अचेल पर्दामा देखिने भिलेन डरलाग्दा हुँदैनन्, सुन्दर र सफाचट हुन्छन् । भनौं न, हिरो जस्तै । नपत्याए अनुपविक्रम शाही र प्रशान्त ताम्राकारलाई हेरे पुग्छ । पछिल्लो समय नकारात्मक भूमिकाबाट उनीहरू जति सायदै कोही चिनिएको छ । दुवै मोडलिङ पृष्ठभूमिका हुन् । दुवैसँग ‘हिरो’ का लागि चाहने गुण छ । तैपनि आमदर्शकमाझ नकरात्मक भूमिकाबाट आए । अग्लो कद र आकर्षक शरीरका धनी अनुप भन्छन्, ‘वास्तवमै डनहरू टाईसुटै हुन्छन् । रिलमा पनि त्यस्तै चित्रण हुनुपरिहाल्यो नि ।’


अनुपलाई लाग्छ, हिरो वा गुन्डा भनेर चरित्रलाई छुट्याउन आवश्यक हुन्न । एउटा कलाकारका लागि चरित्र प्रभावकारी र बलियो हुनुपर्‍यो, प्रवृत्ति सकारात्मक वा नकारात्मक के छ, त्यो अलग कुरा हो । उनी भन्छन्, ‘त्यसैले मैले कहिल्यै हिरो बन्छु भनेर सोचिनँ । सिर्फ कलाकार बन्छु भन्ने मात्र थियो ।’ अक्सर नयाँ कलाकार भिलेनबाट करिअर सुरु गर्न हिचकिचाउँछन्, आफ्नो छविमा असर पर्छ भन्ने भयले । अनुपलाई यो भ्रमले गाँजेन ।

Yamaha


अनुपको यात्रा ‘एन्टागोनिस्ट’ बाटै सुरु भयो, त्यो पनि राजेश हमाल हिरो भएको फिल्म हँसियाबाट । फिल्म व्यावसायिक रूपमा सफल भएन तर अनुपको व्यस्तता बढ्यो ।
राजेशपछि उनी अर्का सुपरस्टार निखिल उप्रेतीको फिल्म किङमा भिलेन बने । यतिबेला अनुप ‘निगमबाबा’ को उपनामले परिचित छन्, फिल्म कृमा उनले निर्वाह गरेको भिलेनको नाम हो त्यो । जसले हिरोइनलाई बलात्कार गर्छ । अवैध धन्दामा संलग्न छ । अनुप सुनाउँछन्, ‘यस्तो घृणित पात्रलाई विश्वसनीय बनाउन साँच्चै मुस्किल पर्नेरहेछ । त्यसमाथि यस्तै पात्रबाट दर्शकको मन जित्न अझ मुस्किल ।’ तर उनी त्यो चुनौतीलाई अवसरमा बदल्न धेरै हदसम्म सक्षम रहे । त्यसैले त अनमोल केसी स्टारर यो फिल्ममा अनुप छाया परेनन् ।


अहिलेका अर्का चल्तीका हिरो प्रदीप खड्का अभिनीत लिलीबिलीमा पनि अनुप भिलेनका रूपमा देखिए । पर्दामा सशक्त उपस्थितिका कारण हुनुपर्छ, अनुप भिलेन भएपछि कतिपय हिरोहरू असुरक्षित महसुस गर्छन् । उनको अनुभव के छ त ? ‘कति एक्टर अनुप छ भनेर पनि डराउँछन् तर डराउनु पर्दैन । क्लाइमेक्समा हिरोकै जित हुन्छ,’ उनले सुनाए ।


हिरोमाथि हाबी हुन सक्ने यस्तै सामथ्र्य छ, प्रशान्तसँग पनि । जस्तो : ऐश्वर्याका हिरो रमेश उप्रेती हुन्, उनको चरित्रको नाम के थियो, सायदै कसैलाई याद होला तर प्रशान्तले निर्वाह गरेको चरित्र राघवको अझ चर्चा हुने गर्छ, जबकि राघव त भिलेन थियो । उनको वजनदार आवाज ‘प्लस पोइन्ट’ बनिदियो । ‘यो संसार जित्नेहरूको हो,’ ‘बिजनेसले टाउको दुखाउँछ, तर प्रेमले मुटु दुखाउँछ,’ ‘चाहे जेसुकै गर्नुपरोस्, मलाई त्यो ऐश्वर्या चाहिएको छ,’ लगायतका संवाद औधी हिट भए ।


‘नेगेटिभ रोलबाट त्यस्तो प्रशंसा पाइएला भनेर सोचेकै थिइनँ,’ मुस्कुराउँदै प्रशान्तले भने, ‘पात्रलाई आत्मसात् गर्नुपर्छ । हिरो वा भिलेन जे भए पनि दर्शकले रुचाउँछन् भन्ने आभास भयो ।’ ऐश्वर्या अगाडि पनि उनले मुखौटा र सम्बोधनमा नकारात्मक भूमिकाबाट प्रशंसा कमाएका थिए । ऐश्वर्यापछि त प्रस्तावको ओइरो लागेको उनी बताउँछन् । रणवीरको चरित्रले ऐश्वर्याको राघव बिर्साउने अपेक्षा छ उनको ।


यस्तो नकारात्मक भूमिकाको तयारी कसरी गर्छन् त ? प्रशान्त भन्छन्, ‘जन्मजात कोही नराम्रो हँुदैन । परिस्थितिले गलत कार्यतिर धकेलिदिन्छ । यही सत्यलाई आत्मसात् गरेर नेगेभिट रोललाई जीवन्तता दिने प्रयास गर्छु ।’ उनका अनुसार सुटिङका दौरान पात्रको ‘ह्याङ ओभर’ हुने भए पनि सुटिङ सकिनासाथ पात्रबाट पर भाग्न सक्नुपर्छ । रमाइलो कुराचाहिँ, जय शम्भुमा हिरोचाहिँ अनुप हुन् । उनी ठट्टा गर्छन्, ‘भिलेन बलियो भएपछि मात्र हिरोको भ्यालु बढ्छ । जय शम्भुमा प्रशान्त दाइकै कारण मेरो भ्यालु बढ्दै छ ।’

gokarna.gtm@gmail.com

Esewa Pasal

प्रकाशित : जेष्ठ ११, २०७५ ११:०७
प्रतिक्रिया
पठाउनुहोस्
ADVERTISEMENT

‘कला काठमाडौं’

मोडिफाइड सामान अनलाइनमा मन पराउने टिनएजर्स हुन्छन् भने प्रदर्शनीमा कामकाजी महिला यस्ता उत्पादनलाई लिएर चासो राख्छन् ।
कान्तिपुर संवाददाता

काठमाडौँ — कुनै सामान नभए पनि हुन्छ तर भए धेरै राम्रो हुन्छ । यस्तै सामान उत्पादन गर्छ– कला काठमाडौं । घर र कार्यालयको टेबल होस् वा भित्ता । अफिस, घर वा रेस्टुरेन्टमा देखिने मोडिफाइड सामानले धेरैको ध्यान तानिन्छ । यस्ता सामान फरक हुन्छन् र आकर्षक पनि । यसले टेबल, भित्ता वा कोठाको रौनक बदल्न सक्छ वा फरक अनुभूति दिलाउन सक्छ । यस्तै सामान उत्पादन गर्ने कम्पनी कला काठमाडौं सीमित सहरीयामाझ चर्चित बन्दैछ ।

सन् २०१५ देखि नै पूजा रिमालले कम्प्युटर न्युमेरिकल कन्ट्रोल (सीएनसी) राउटरको प्रयोगले विभिन्न सामानको डिजाइन थालेकी थिइन् । सीएनसीले कम्प्युटरको निर्देशनअनुसारको डिजाइनमा काठसहित विभिन्न वस्तुहरू काट्न सक्छ । सीएनसी क्राफ्टको नाम दिएर सामान डिजाइनको काम थालिँरहँदा उनीसँग जुट्न आइपुगिन् आस्था राजभण्डारी । फर्निचर व्यवसाय गर्ने परिवारकी छोरी राजभण्डारी र सीएनसी राउटरजस्ता डिजाइनिङ मेसिनमा रुचि राख्ने रिमालको सहकार्यमा जन्मिएको हो– कला काठमाडौं ।


कला काठमाडौं कम्प्रेस्ड उड (काठको धूलो थिचेर बनाइएको काठ) को प्रयोग गरी विभिन्न डिजाइन बनाउनमा चर्चित छ । यसबाहेक उनीहरू कर्पोरेट हाउस, रेस्टुरेन्ट, कार्यालयका लागि इन्टेरियर डिजाइन पनि गरिरहेकै हुन्छन् । विभिन्न स्वरूप र आकारमा ढालिएका घडी, बत्ती, भान्साका सामान, टेबल र कोठा सजाउने विभिन्न डिजाइनका रंगीन सामग्री उत्पादनले कला काठमाडौंलाई परिचित बनाइरहेको छ ।


भारतबाट इन्डस्ट्रियल डिजाइनमा ब्याचलर सकाएर नेपाल फर्किएका राजभण्डारी यो क्षेत्रमा अरू कोही नदेखेर यसैलाई व्यवसाय बनाएको बताउँछिन् । कला काठमाडौंले बनाउने डिजाइनको नेतृत्व गरिरहेकी छन् उनी । रिमाल भने उत्पादन सम्हाल्छिन् ।


कला काठमाडौंले विभिन्न अनलाइन बजारबाट आफ्ना सामानहरू बिक्री गर्दै आएको छ । यसबाहेक सोसल मिडिया ब्रान्डिङबाट पनि मार्केटिङ भइरहेको छ । इन्स्टाग्राम पेजबाट धेरै युवायुवती आफ्नो सामानबारे जानकार भएको राजभण्डारी बताउँछिन् । अनलाइनमा उनीहरूको सामान मन पराउने टिनएजर्स हुन्छन् भने प्रदर्शनीमा कामकाजी महिला उनीहरूको उत्पादनलाई लिएर चासो राख्छन् ।


काठमाडौंमा हस्तकला प्रदर्शनीमा उनीहरूको सामान विशेष बन्छ । अरूले आयोजना गर्ने प्रदर्शनीबाहेक काठमाडौंका विभिन्न स्थानमा स–साना प्रदर्शनी उनीहरू आफैंले गर्दै आएका छन् ।


डिजाइन भन्नेबित्तिकै फेसन डिजाइनिङ बुझ्ने यहाँको बानीले हैरान छिन् राजभण्डारी । भन्छिन्, ‘मानिसलाई यस्ता उत्पादनबारे बुझाउन बाँकी छ ।’ धेरैलाई बुझाउन बाँकी भए पनि थोरैले भने आफैं बुझिसके । त्यसैले कला काठमाडौंमा दैनिक ३० देखि ४० सामानका अर्डर आइरहेकै हुन्छन् । यसको स्रोत अनलाइन मार्केट प्लेस र सोसल मिडिया हुन् । यसबाहेक कला काठमाडौंले भर्खरै मात्र सानेपामा आफ्नो सामान सजाउने र बिक्री गर्ने सोरुम खोल्ने तयारी गरेको छ । यसले फोटो हेरेर सामान अर्डर गर्नुपर्ने ग्राहकको बाध्यता केही कम गर्नेछ ।
खासमा सीएनसी राउटर र लेजर कटरको सहायताले परम्परागत रूपमा धेरै मिहिनेत गर्नुपर्ने डिजाइनलाई पनि चाँडै फत्ते गर्न सकिन्छ । एकपटक गरेको डिजाइनमा जति सामान उत्पादन गरे पनि समान रहन्छ । कला काठमाडौंका धेरै डिजाइन काठमाडौंमा देखिने परम्परागत डिजाइनका नजिक लाग्छन् ।


‘हामीले परम्परागत डिजाइनलाई आधुनिकीकरण गरिरहेका छौं,’ राजभण्डारी भन्छिन्, ‘पहिला त्यही डिजाइनका लागि हप्तौं लाग्थ्यो भने हामी एकैछिनमा गर्छौं, त्यो पनि धेरै सामानमा ।’


सीएनसी राउटर चलाउने, लेजर मेसिन चलाउने र डिजाइनका लागि कला काठमाडौंसँग आफ्नै टिम छ । तर, काठका सामान बनाउन र रंगरोगन गर्न भने आउटसोर्सिङ गर्दै आएको राजभण्डारी बताउँछिन् । अब स्थानीय आर्टिस्टको डिजाइन लिएर सामान बनाउने पनि योजना रहेको उनले सुनाइन् ।


स्कुल र कर्पोरेट हाउसले गिफ्टका लागि एकै पटक धेरै सामान अर्डर गर्ने चलन पनि बढ्दो छ । कसैले व्यक्तिगत रूपमा आफूलाई चाहिएको अर्डर पनि दिन सक्छन् तर फरक डिजाइनमा एउटै मात्र सामान उत्पादन गर्दा लागत भने महँगो पर्न सक्छ ।


कला काठमाडौंले मोडिफाइड सामान मात्रै उत्पादन गरिरहेको छैन बरु यहाँका उपभोक्तामा जाग्दै गरेको फरक स्वादको पनि उजागर गरेको छ । कला काठमाडौंको व्यस्त कारखानाले यसैलाई पुष्टि गर्छ ।

प्रकाशित : जेष्ठ ११, २०७५ ११:०७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT