जसले जिते अवार्ड

कान्तिपुर संवाददाता

काठमाडौँ — जापानको टोयोटा म्युनिसिपल म्युजियम अफ आर्टमा अघिल्लो साता सम्पन्न १८ औं अन्तर्राष्ट्रिय कला प्रतियोगिता एवं प्रदर्शनीमा सात नेपालीसँग १५ देशका ९२ कलाकार सहभागी थिए ।

कलाकारहरुको समूह ग्लोबल आर्टिस्ट मुभमेन्टद्वारा आयोजित यसमा आ–आफ्ना देशका स्थापित कलाकारहरुको उपस्थिति रहेको थियो । प्रतियोगितामा तीन अवार्ड जितेका नेपालीबारे विमल खतिवडा लेख्छन्:


सरिता डंगोल
रूख शृंखलाका चित्रले सरिता चर्चित छिन् । त्यसमा उनले एकल प्रदर्शनी पनि गरिसकेकी छन् । अहिले उनी खुर्सानी सिरिजमा काम गरिरहेकी छन् । तर उनी नाग सिरिजको पेन्टिङ लिएर सहभागी भएकी थिइन् । उनले नागपञ्चमी र नाग पूजाको महत्त्वलाई चित्रमा उतारेकी थिइन् । यस चित्र तयार पार्न एक महिना लागेको उनले बताइन् ।

Yamaha


धेरै प्रतिस्पर्धीमाझ टोयोटा अवार्ड जितेकी उनी भन्छिन्, ‘पहिला यस्ता प्रतियोगिता र प्रदर्शनीमा जापानमै बस्ने नेपाली सहभागी हुन्थे । हामी पेन्टिङ लिएर जापान पुग्यौं । र, पहिलो सहभागितामै अवार्ड जित्यौं । यस्तो उपलब्धि आशा गरिएको थिएन ।’


दर्शकको भोटिङपछि निर्णायकहरूले अवार्ड विजेताको घोषणा गरेका थिए । क्लासिक ग्यालरी पनि सञ्चालन गरिरहेकी ४२ वर्षीया उनले स्वदेश फर्केपछि भनिन्, ‘एकदमै राम्रा पेन्टिङ पनि थिए । एक साता लामो प्रदर्शनीमा दर्शकको मन जित्न पनि सफल भइयो ।’ थुप्रै देशमा भएको प्रदर्शनीमा सहभागी भइसकेकी छन् ।

कृष्णगोपाल श्रेष्ठ

प्रतियोगिता/प्रदर्शनीमा सहभागी हुन कला नेपालमै तयार गरेर लानुपर्ने थियो, जापानमै रहेर वुमेन फर वुमेन कार्यक्रम सञ्चालन गरिरहेकी आस्था तुलाधरबाहेक ६ नेपालीले त्यसै गरे । साँखुका कृष्णगोपालले समसामयिक चित्र जापानमा प्रस्तुत गरेका थिए, जुन पूरा गर्न दुई साता लागेको थियो ।


उनको सिर्जनामा नेपालको सम्पदा र संस्कृतिको वर्तमान अवस्थालाई एक युवतीको भावमा प्रस्तुत गरिएको छ । ‘सम्पदा जीर्ण र नष्ट भइरहेको अवस्थामा स्थानीय नेवारी महिलालाई पनि त्यसमा समेटेर चित्र तयार पारेको थिएँ,’ आइची चेयरमेन अवार्ड जितेका कृष्णगोपालले भने । उनको चित्रमा मौन प्रार्थना गरिरहेका पञ्चबुद्ध पनि राखिएको छ । ‘काम गर्दा निकै मिहिनेत गरेको थिएँ । त्यसैले दर्शकको मन जित्ने आशा गरेको थिएँ । र, त्यस्तै भयो पनि,’ ३६ वर्षीय कृष्णगोपालले भने, ‘जापानमा गएर कला प्रदर्शन गरेर नेपाली कला चिनाउनु नै हाम्रा लागि महत्त्वपूर्ण हो ।’


प्रदर्शनीमा राखिएका कलाबारे उनले भने, ‘गाढा रङ प्रयोग गरिएको भए पनि नेपाली कलामा सुख बुझ्न सकिन्थ्यो भने अरू जापानी कलामा चमक थियो तर सुख महसुस गर्न सकिने अवस्था थिएन । ती कलाले आ–आफ्ना देशको जनजीवन झल्काउँछन् ।’ नवीन्द्र राजभण्डारी, हिमाल गौतमसँगै उनले तयार पारेको राष्ट्रिय निसान छाप उत्कृष्ट भएर अहिले प्रयोग भइरहेको छ । राष्ट्रियस्तरका थुप्रै पुरस्कार जितेका उनको विशेषता नै सांस्कृतिक सम्पदा, मानवीय संवेदना र जनजीवनलाई क्यान्भासमा कोर्नु हो ।

सञ्जित महर्जन

अन्तर्राष्ट्रिय प्रतियोगिता भएकाले सञ्जितले अवार्ड नै जित्ने अपेक्षा गरेका थिएनन् । ‘अन्तर्राष्ट्रिय कला प्रदर्शनीमा पहिलोपल्ट सहभागी हुँदै थिए । त्यो नै मेरा लागि ठूलो कुरा थियो । त्यसैले ठूलो अपेक्षा राखिएको थिएन,’ ३३ वर्षीय उनले भने, ‘तर अवार्ड पाइयो । धेरै खुसी लागेको छ ।’


निक्कान अवार्ड जितेका उनी कुमारीको पोट्रेट लिएर जापान पुगेका थिए । उक्त चित्रले नेपाली संस्कृति झल्काउँछ । ‘अवार्ड जित्दा सपनाजस्तै लाग्यो,’ उनले भने, ‘यसले अझ राम्रो काम गर्न उत्साहित पार्छ ।’ कला प्रदर्शनले नेपाल र जापानबीच सांस्कृतिक आदानप्रदानको अवसर पनि दिएको उनले बताए ।


‘अन्तर्राष्ट्रिय प्रदर्शनीमा सहभागी हुँदा नयाँ सोच–विचार पनि आउँछ । विश्वका अरू स्थानमा कसरी काम हुन्छ, उनीहरूले के सोच्छन् भन्ने पनि थाहा हुने र प्रविधिबारे जानकारी पनि पाइने रहेछ,’ उनले अनुभव सुनाए । पाटनवासी सञ्जितले घण्टाको चित्रको सिरिज ‘अस्था’ को एकल प्रदर्शनी पनि गरिसकेका छन् ।

प्रकाशित : जेष्ठ १८, २०७५ ११:०९
ADVERTISEMENT
प्रतिक्रिया
पठाउनुहोस्
ADVERTISEMENT

आईपीएल धमाका

कान्तिपुर संवाददाता

काठमाडौँ — चेन्नाई सुपर किङ्सले उपाधि जितेसँगै यसपल्टको इन्डियन प्रिमियर लिग (आईपीएल) पनि आइतबार सकियो । विश्व क्रिकेटकै सबैभन्दा ठूलो र धनी प्रतियोगिता हो, यो । हुन सक्छ, अबका केही वर्षमा यो विश्व खेलकुदकै ठूलो अनि उत्तिकै धनी प्रतियोगिता पनि ।

विश्व क्रिकेटमा आईपीएलले धेरै परिवर्तन ल्याइसकेको छ र अबका केही वर्षमा यसले विश्व क्रिकेटमा अझ ठूलो परिवर्तन ल्याउने पनि निश्चित छ । यसै वर्षको प्रतियोगितामा मात्र केन्द्रित रहँदा प्रतियोगिता कस्तो रह्यो त ? आईपीएल २०१८ लाई यी पाँच विशेषता रहे र यसैको सेरोफेरोमा पूरा प्रतियोगिता आधारित रह्यो । यो विशेषतामा सम्भावनाको अनुमान पनि गाँसिएको छ ।


महँगा खेलाडीले मात्र सफलता ल्याउँदैनन्
इंग्ल्यान्डका बेन स्टोक्सलाई किन्दा राजस्थान रोयल्सको खुसी देखिनसक्नु थियो । तर यो खुसी लामो चलेन । यी स्टार अलराउन्डरका लागि राजस्थानले १९ लाख ६० हजार डलर तिरेको थियो, यसका बदलामा उनले खालि १ सय ९६ रन बनाए अनि लिए १२ विकेट मात्र ।
निकै खर्चालु रहेको राजस्थानले जयदेव उनादकटलाई १८ लाख डलर तिरेको थियो । यी फास्ट बलरले पनि ११ विकेट मात्र लिए, त्यो पनि ९.३७ को रेटमा । किङ्स इलेभन पञ्जावले भने वेस्ट इन्डिजका क्रिस गेललाई खालि ३ लाख १४ हजार डलर तिरेको थियो, तर यी विग–हिटरले ११ खेलमा बनाए, ४ सय ५५ रन । त्यसमा तीन अर्धशतक र एक शतक सामेल थियो ।


अब्बल विदेशी कप्तान
यसपल्टको आईपीएलमा जति टिम सहभागी थिए, त्यसमध्ये विदेशी कप्तानले नेतृत्व गरेको टिम एउटै रह्यो । यो जोडी रह्यो, सनराइजर्स हैदरावाद अनि किवी खेलाडी केन विलियम्सन ।
अस्ट्ेरलियाली कप्तानद्वय स्टिभ स्मिथ र डेविड वार्नरमाथि प्रतिबन्ध लागेपछि उनीहरूले खेल्न पाएनन् । वार्नरको अनुपस्थितिमा विलियम्सनले अन्तिम समयमा नेतृत्वको अवसर पाए । तर उनी यसमा अब्बल सावित भए । एक त खेलाडीका रूपमा उनको प्रदर्शन उच्च रह्यो, १७ खेलमा ७ सय ३५ रन । उनले अफगानी खेलाडी रसिद खानलाई खुबै राम्रोसँग सदुपयोग गरे । विलियम्सनकै कारण त हो, हैदरावाद फाइनल पुगेको ।


कमालका खान
साँच्चै रसिद खान यसपल्टको आईपीएलका सबैभन्दा सफल खेलाडी सावित भए, उनी सुपर–हिरो भएर निस्के । यी १९ वर्षीय लेग स्पिनरले आफ्नो सटिक गुगलीको मद्दतले विराट कोहली र महेन्द्रसिंह धोनी जस्ता ब्याट्सम्यानलाई पनि दबाबमा राखे । उनले १७ खेल खेले अनि लिए, २१ विकेट ।
रसिदको यो प्रदर्शन पनि हैदरावाद फाइनल पुग्नु पछाडिको एउटा प्रमुख कारण रह्यो । त्यसैले त सचिन तेन्दुलकरले पनि भने, यी १९ वर्षीय रसिद क्रिकेटका सर्ट–फरम्याटका सबैभन्दा राम्रा स्पिनर हुन् । उनी मात्र होइन, अर्का अफगान स्पिनर मुजिब उर रहमानका साथै हाम्रो आफ्नै सन्दीप लामिछानेको प्रदर्शनले पनि सबैको मन छोयो ।


नयाँ स्वादको आईपीएल
रुपर्ट मुडरोचको स्टार इन्डियाले यसपल्टको आईपीएलको प्रत्यक्ष प्रसारण गरेको थियो । यसका लागि उसले भारतीय क्रिकेट बोर्डलाई २.५५ बिलियन डलर तिरेको थियो । यसक्रममा स्टार इन्डियाले ६ भाषामा कमेन्ट्री गरेको थियो ।
यसपालि कमेन्टेटर मात्र थिए, १ सय २० जना । त्यसो त एक दशकसम्म टेलिभिजन प्रसारणको अधिकार पाएको सोनीले स्टार
स्पोटर््सलाई झेल्ली गरेको आरोप पनि नलगाएको होइन, तर स्टार स्पोटर््सले यसपल्टको आईपीएल नयाँ स्वादमा पस्किने काम गरेको थियो । यसपल्टको आईपीएल स्टार स्पोटर््सले त्यसरी प्रसारण गरेको थियो, जुन यसअघि अरू कसैले गरेका थिएनन् ।

अबको आईपीएल विदेशमा ?
यसपल्टको आईपीएलको समाप्तिसँगै यसले एउटा प्रश्न पनि छाडेर गएको छ, के अबको संस्करण भारतीय भूमिमा होइन, विदेशमा हुने हो त ? यसपल्टको आईपीएलमा जति पनि खेल भयो, सबैमा सेल–आउट दर्शक आए । तर पनि हुन सक्छ, अर्को संस्करण विदेशमा हुनेछ र यसको कारण हो, अर्को वर्ष भारतमा चुनाव हुँदै छ ।


सन् २०१९ भारतमा महाचुनावको समय हो, त्यसैले हुन सक्छ, आईपीएल २०१९ पनि दुबईमा हुनेछ । यो हुनै नसक्ने तथ्य पनि होइन, आखिरमा यही आईपीएल सन् २००९ मा दक्षिण अफ्रिका तथा सन् २०१४ मा एक तिहाइ खेल यूएईमै भएको थियो । चुनावको समयमै आईपीएल पर्‍यो भने सुरक्षा व्यवस्थाकै कारण आईपीएल सर्नेछ, यसमा शंका नगरे हुन्छ ।

प्रकाशित : जेष्ठ १८, २०७५ ११:०९
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT