दुई अभागीको कथा

साम्राज्ञी भन्छिन्– ‘आर्यन दा’सँग काम नगर भनेर धेरैले भनेका थिए तर मलाई उहाँसँग एकपटक काम गर्ने मन थियो । यसो भन्नु राम्रो नहोला तर मेरा लागि त उहाँ नेपाली शाहरूख खानजस्तै हो ।’
ट्ेरलरअघि दर्शकले मन पराउलान् कि के गर्लान् भन्ने चिन्ता थियो । तर त्यसपछि भने जोडी सुहाएन भनेर कसैले भनेको थाहा छैन ।
हेलो शुक्रबार

काठमाडौँ — होस्टेलमा बसेर सात कक्षा पढ्दै गरेकी साम्राज्ञी राज्यलक्ष्मी शाहलाई एक दिन आमाले नेपाली फिल्म हेर्न जाऊ भनिन् । आमाले अंग्रेजी, कोरियन फिल्मकी फ्यान साम्राज्ञीले नाक खुम्च्याएको चाल पाएपछि फिल्म राम्रो भएको भन्दै बल गरेरै लगिन् । फिल्म थियो आर्यन सिग्देलको डेब्यु मेरो एउटा साथी छ । साम्राज्ञीले उक्त फिल्मको सक्कली कोरियन फिल्म यति धेरै हेरेकी थिइन् कि त्यसको सबै कुरा थाहा थियो । तैपनि उनलाई नेपाली पनि मन परेछ ।

आर्यन र नम्रता श्रेष्ठको जोडीलाई साम्राज्ञीले खुब मन पराइन् । प्राय: पुस्तक पढ्दा वा फिल्म हेर्दा साम्राज्ञी त्यसको मन परेको पात्रलाई आफ्नै शैलीमा नक्कल गर्न खोज्थिन् । एक्लै डायलग बर्बराउँथिइन् । ‘कुनै चरित्र मन पर्‍यो भने म आफूलाई त्यसैमा ढालेर एक्लै डायलग हान्दै बस्थें,’ उनले भनिन् । तर त्यस बेला पनि साम्राज्ञीलाई नायिका बन्ने कुनै रहर जागेको थिएन ।


मेरो एउटा साथी छ रिलिज भएको नौ वर्षपछि कहानीमा नयाँ ट्वीस्ट आएको छ । साम्राज्ञी यतिबेला आर्यनको अपोजिटमा देखिएर फिल्म कायरामा आउँदैछिन्, जसमा साम्राज्ञी कायराकै भूमिकामा छिन् भने आर्यन जयको भूमिकामा छन् । आर्यनले कायरा ग्रिक शब्द भएको उल्लेख गर्दै त्यसको अर्थ इमानदार र मायालु युवती रहेको बताए । त्यसो त साम्राज्ञी डेब्यु फिल्म ड्रिम्सदेखि नै घमण्डी चरित्रका रूपमा फिल्ममा दोहोरिँदै आइन् । ‘त्यसैले त यसपटक उनको भूमिका दर्शकलाई केही फरक लाग्न सक्ने ठानेका छौं,’ आफ्नै कथामा फिल्म पनि बनाइरहेका आर्यन विश्वस्त देखिए ।

Yamaha


सबै चीजमा भाग्यमानी तर प्रेमका मामिलामा अभागी जय सम्बन्धबाट भागेर फिलिपिन्स पुगेका हुन्छन् । कायरा पनि एउटा सम्बन्धलाई त्यागेर अर्कोको खोजीमा फिलिपिन्स नै पुगेकी हुन्छे । फिल्मको स्क्रिप्ट लेख्दादेखि नै कायराको भूमिकाका लागि दिमागमा साम्राज्ञी झल्झली आएको बताउँछन् आर्यन । आखिर साम्राज्ञी पनि अभिनय गर्न राजी भइन् । तर त्यो बेला आर्यनसँगको जोडी नसुहाउने जिकिर गर्दै साम्राज्ञीलाई उनकै नजिकका साथीभाइले सजग पार्न खोजेका थिए ।


‘आर्यन दा’सँग काम नगर भनेर धेरैले भनेका थिए तर मलाई उहाँसँग एकपटक काम गर्ने मन थियो । यसो भन्नु राम्रो नहोला तर मेरा लागि त उहाँ नेपाली शाहरुख खानजस्तै हो । एकदम रोमान्टिक, नबोलिकनै अभिनय प्रस्तुत गर्ने उहाँको जस्तो खुबी सायदै कसैमा होला,’ प्राय: फिल्ममा आफ्ना सहकर्मीलाई नै सिकाउनुपर्ने अनुभव गरेकी साम्राज्ञीले यसपटक भने आर्यनबाटै सिक्न पाएको बताइन् ।


आर्यनसँग काम गर्न एकदम सहज भएको बताउँदै साम्राज्ञीले थपिन्, ‘मलाई अभिनयमै पनि रुन एकदमै गाह्रो लाग्छ । आर्यन दा नजिक भएर दृश्य बुझाएर छेउमा बसिदिएपछि म फिलमा आएर रोइहाल्थें ।’


आर्यन अभिनयमा लागेको १८–१९ वर्ष भइसक्यो । उनी काम गर्न चाहने र खोज्नेलाई सिकाउन मज्जा लाग्ने बताउँछन् । त्यसैले पनि होला निर्देशकले बुझाउन नसकेको दृश्य आर्यनले एकैपटकमा बुझाइदिएको साम्राज्ञी बताउँछिन् । फिलिपिन्सको मनिलामा सुटिङका ४५ दिन कसरी सकिए साम्राज्ञीलाई पत्तै भएन ।


साउन १८ देखि प्रदर्शनमा आउन लागेको लक्ष्मण रिजाल निर्देशित कायरा आर्यन र आफ्नो जोडीका लागि मात्रै नभई फिल्मकै लागि पनि हेर्नुपर्ने बताउँछिन् साम्राज्ञी । ‘यो फिल्म हेरेर निस्कँदा दर्शक रुने र हाँस्ने एकसाथ हुनेछन्,’ साम्राज्ञीकै कुरामा सही थाप्दै आर्यनले पनि भने, ‘फिल्मले दर्शकलाई छुट्टै दुनियाँमा लगेर रमाइलो दिलाउनुपर्छ । त्यसरी रमाउनलाई लायक फिल्म बनाएको छु ।’


यतिबेला फिल्मको गीत र ट्रेलरबाट शतप्रतिशत सुखद प्रतिक्रिया मिलेको भन्दै आर्यन मख्ख छन् । ‘मैले यो फिल्म खेल्न सम्झौता गर्नेबित्तिकै साथीभाइले रोमान्स गर्दा नसुहाउला, दाजुबहिनी जस्तो देखिएला भनेर चिन्ता गर्थे । ट्ेरलरअघि दर्शकले मन पराउलान् कि के गर्लान् भन्ने चिन्ता थियो । तर त्यसपछि भने जोडी सुहाएन भनेर कसैले भनेको थाहा छैन,’ साम्राज्ञीले भनिन् ।

hellosukrabar@gmail.com

Esewa Pasal

प्रकाशित : श्रावण ११, २०७५ १०:४३
ADVERTISEMENT
प्रतिक्रिया
पठाउनुहोस्
ADVERTISEMENT

फायरफक्सको ‘कमब्याक’

हामी हाम्रो गोपनीयता अनलाइनलाई दिन्छौं र त्यसको बदलामा पाउँछौं धेरैभन्दा धेरै झर्को लाग्दा विज्ञापन । यी सबै कारणले पनि केही भिन्न प्रकारको ब्राउजर चलाउने बेला आएको छ ।
हेलो शुक्रबार

काठमाडौँ — मोजिल्लाले आफ्नो वेब ब्राउजर फायरफक्समा केही सुधार गरेको छ जसले प्रयोगकर्तालाई अनलाइनमा सुरक्षित बनाउन मद्दत गर्छ । यसका केही फिचर :

अनलाइनमार्फत केही किन्यो भने त्यस्तै सामानको विज्ञापनले हामीलाई कहीँ गए पनि छाड्दैन । वेब ब्राउजरमा केही वेबसाइट खोलेर चलाए ल्यापटपको ब्याट्री छिट्टै सकिन्छ । वेब पेजमा हेर्दै गर्दा आफैं प्ले हुने भिडियोहरूले पनि त वाक्क बनाउँछ नि ?


अनलाइन उदेकलाग्दो भइसकेको छ । वेब रिस उठ्दो मात्रै होइन, असुरक्षित पनि भएको छ । सबैभन्दा महत्त्वपूर्ण कुरो त यो व्यापारको थलो भएको छ । हामी हाम्रो गोपनीयता अनलाइनलाई दिन्छौं र त्यसको बदलामा पाउँछौं धेरैभन्दा धेरै झर्को लाग्दा विज्ञापन ।


यी सबै कारणले पनि केही भिन्न प्रकारको ब्राउजर चलाउने बेला आएको छ । फायरफक्स याद छ ? गैरनाफामूलक कम्पनी मोजिल्लाले बनाएको यो ब्राउजर सन् २००० ताका निकै प्रख्यात थियो । तर, जब गुगलले २००८ मा क्रोम रिलिज गर्‍यो, यसको पतन सुरु भयो । फायरफक्सभन्दा त्यतिबेला क्रोम निकै छिटो, सुरक्षित र बहुआयामिक थियो । यसको अर्को कारण पनि छ, गुगलले सार्वजनिक गरेको क्रोममा उसले आफ्ना प्रडक्टका लागि विशेष फिचरहरू पनि थप्दै गयो । यही लहैलहैमा प्रयोगकर्ता उसतर्फ आकर्षित भए ।


अहिले मोजिल्लाले फायरफक्सलाई पुनर्निर्माण गरेको छ । मोजिल्लाले गत वर्ष ‘क्वान्टम’ नाम दिएर फायरफक्सको नयाँ भर्सन सार्वजनिक गरेको थियो । फायरफक्सको नयाँ भर्सन देख्दै छरितो छ र काम गर्दा छिटो पनि छ । यसले सीपीयूको मेमोरी कम खपत गर्छ जसले गर्दा धेरै वटा ट्याब खोलेर ब्राउज गर्दा पनि कम्प्युटर ह्याङ हुँदैन ।


यस्तै फायरफक्समा अब प्राइभेसी टुल उपलब्ध छ जसले विभिन्न वेबसाइटले गर्ने ट्रयाकिङलाई निष्क्रिय पारिदिन्छ । जसले गर्दा तपाईंले ब्राउजरमा जे चलायो त्यस्तै खालका विज्ञापन देखिरहनु पर्दैन । साथै, तपाईंको वेब हिस्ट्रीका आधारमा अरू कसैले तपाईंले अनलाइनमा देख्ने सामग्री निर्धारण गर्दैन ।


नयाँ प्राइभेसी फिचर
अहिले सबैभन्दा चलेको क्रोम र नयाँ फायरफक्स दुवैमा हजारौं प्रकारका एक्सटेन्सन हालेर चलाउन सकिन्छ । जसले हामीले गर्ने वेब ब्राउजिङलाई सहज बनाउँछ । यद्यपि फायरफक्समा भन्दा क्रोममा धेरै एक्टेन्सनहरू हाल्न मिल्छ । त्यसो हुँदा पनि क्रोममा गर्न सकिने र फायरफक्समा गर्न नसकिने भन्ने त्यस्तो केही काम नै छैन । दुवैमा पासवर्ड व्यवस्थापन गर्नका लागि प्रयोग हुने ‘वानपासवर्ड’ चलाउन मिल्छ । दुवैमा कुनै वेबसाइट खोल्दा भिडियो आफैं प्ले हुन रोक्ने एक्सटेन्सन हाल्न मिल्छ । यस्तै धेरै अनलाइन सुरक्षाविद्ले एड ब्लक गर्न सिफारिस गरेको ‘यूब्लक ओरिजिन’ दुवैमा चल्छ ।


फायरफक्समा ‘फेसबुक कन्टेनर’ भन्ने एक्सटेन्सन छ । यो भने नयाँ हो । यसले फेसबुकले ट्रयाक गर्ने हाम्रो सबै ब्राउजिङ क्रियाकलापलाई बन्द गरिदिन्छ । उक्त एक्सटेन्सनले फेसबुकका लागि मात्रै छुट्टै ‘स्थान’ निर्धारित गरिदिन्छ जसका कारण त्यहाँबाट बाहिर के भइरहेको छ, फेसबुकले पत्तो पाउन कठिन हुन्छ । फायरफक्सको प्राइभेसी सेटिङमा गएर ट्रयाकिङ सुरक्षालाई अन गरे विभिन्न वेबसाइटले संकलन गर्ने हाम्रो अनलाइन क्रियाकलाप असम्भव तुल्याइदिन्छ ।


अनलाइन डेस्कटप ब्राउजरहरूको बजारमा अहिले पनि क्रोम नै सबैभन्दा अगाडि छ । क्रोमको बजार हिस्सा ६७ प्रतिशत छ भने दोस्रो स्थानमा रहेको फायरफक्सको जम्मा १२ प्रतिशत छ । यस्तै माइक्रोस्फट एजको बजार हिस्सा मात्र ७ प्रतिशत छ भने एप्पल सफारीको ५.५ प्रतिशत छ । उपभोक्ताका हिसाबले भन्दा मोजिल्लाको आगामी दिन राम्रो हुनेछ ।
अन्य सामान्य ब्राउजरभन्दा फरक मोजिल्लाले फायरफक्स फोकस नामको अर्को मोबाइल ब्राउजर उपलब्ध गराउँछ जसले ब्राउजरमार्फत हुने जानकारी संकलनलाई रोक्छ । फायरफक्स फोकस बन्द गर्नेबित्तिकै यसको ब्राउजिङ हिस्ट्री स्वत: डिलिट हुन्छ ।


ब्राउजर गैरनाफामूलक कम्पनी भएकाले यसका विज्ञापनकर्ताहरूसँग केही लिनु–दिनु हुन्न । यसले आफ्ना प्रडक्टमार्फत सर्च भएको हिसाबमा गुगल र बिङ जस्ता सर्च साइटबाट थोरै रकम भने पाउँछ ।
–एजेन्सी

hellosukrabar@gmail.com

प्रकाशित : श्रावण ४, २०७५ ११:०१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT