कलाकार जन्माउने शृंखला

हेलो शुक्रबार

काठमाडौँ — देशको लामो फिल्म शृंखलाका रूपमा मात्र होइन, ‘नाई नभन्नू ल’ कलाकार जन्माउने शृंखलाका रूपमा पनि परिचित छ । पाँचौं भागसम्म आइपुग्दा यसले हरेक साल कोही न कोही कलाकार जन्माउँदै आएको छ ।

फिल्म लेखनमा सक्रिय रहँदारहँदै फिल्म ‘नसिब आफ्नो’ बाट निर्देशनमा डेब्यु गरेका विकासराज आचार्य फिल्म ‘नाई नभन्नू ल’ बाट दर्शकमाझ चिनिए । त्यसयता उनले ‘रिदम’ र ‘म तिम्रो भइसकें’ पनि निर्देशन गरे तर बाँकी फिल्मभन्दा आचार्य ‘नाई नभन्नू ल’ को निर्देशकका रूपमा बढी चिनिन्छन् । संयोग नै मान्नुपर्छ, नेपाली फिल्ममा पछिल्लो समयमा रुचाइएका बालकलाकार, नायक–नायिका, गायक विकासकै हिट सिक्वेल ‘नाई नभन्नू ल’ कै उत्पादन हुन् । आचार्य कलाकारलाई डेब्यु दिनेमा अग्रपंक्तिमा पर्छन् ।


आफ्ना हरेक फिल्मबाट कसै न कसैलाई मौका दिँदै आएका आचार्यले ‘नाई नभन्नू ल’ बाट नायिका ऋचा सिंह ठकुरीलाई ब्रेक दिएका थिए । गीतका कारण पनि चर्चामा रहेको उक्त फिल्मबाट ऋचाले लोभलाग्दो चर्चा पाएकी थिइन् । तर ‘म तिम्रो भइसकें’ पछि ऋचा आचार्य क्याम्पमा दोहोरिनन् । आचार्य क्याम्पबाट बाहिरिएपछि ऋचाले त्यो चर्चा पनि कायम राख्न सकिनन् । बिहे गरेर सेटल भएकी ऋचाले हालै ‘सुपर गोर्खे’ निर्माण गरेकी छन् ।

Yamaha


धेरै कलाकारलाई डेब्यु गराउनेमा ‘नाई नभन्नू ल २’ अग्रपंक्तिमा आउँछन् । यो फिल्मबाट अहिले चल्तीकी नायिका वर्षा सिवाकोटीले डेब्यु गरेकी थिइन् भने यही फिल्मबाट बालकलाकारका रूपमा सुज्ञानी भट्टराईले दर्शकको मन जितेकी थिइन् । यही फिल्मबाट प्रेम परियारले पाश्र्व गायनमा डेब्यु गरेका थिए । ‘रिदम’ बाट डेब्यु गरे पनि अनुभव रेग्मी यही फिल्मबाट बालकलाकारका रूपमा चिनिएका थिए ।


‘नाई नभन्नू ल’ को हरेक सिक्वेलमा अटाएका अनुभवले यो फिल्मबाट सफलता पाए पनि विकासको फिल्म बाहिर भने उनले ‘ए मेरो हजुर २’ बाट मात्र सफलताको स्वाद चाख्न पाए । तर सँगै आएकी सुज्ञानीले भने फिल्मी करिअरलाई निरन्तरता दिन सकिनन् । यही फिल्मबाट पाश्र्व गायनमा डेब्यु गरेका प्रेम परियारले फिल्ममा गाएको ‘मर्ने कसैलाई रहर हुँदैन’ र ‘यी आँखामा तिमी छौं’ बाट चिनिए । तर त्यसपछि भोकल कर्ड अचानक परिवर्तन भएपछि परियार हाल अध्ययनमा मात्र केन्द्रित छन् । फिल्मको तेस्रो सिक्वेलबाट बालकलाकार सफला भट्टराईले डेब्यु गरे पनि यो फिल्मपछि उनी अन्य फिल्ममा देखिएकी छैनन् ।


आचार्यको ‘नाई नभन्नू ल ४’ बाट डेब्यु गरेका वर्षा राउत, पल शाह र आँचल शर्मा फिल्मी अभिनयमा चाहिँ भाग्यमानी कलाकारका रूपमा चिनिए । म्युजिक भिडियोको मोडलिङमा हटकेक मानिएका पलले यो फिल्मबाट चर्चा पनि राम्रै पाए । यही फिल्ममार्फत नायिका आँचल शर्मासँग चिनजान गरेका पल र आँचलको जोडी अहिले चर्चामा आइरहन्छ । यो फिल्मपछि पलले ‘म यस्तो गीत गाउँछु’ मा अभिनय गरे जुन फिल्म बक्स अफिसमा हिट साबित भयो । यो फिल्म पछि आँचलसँग जोडी बनेर अभिनय गरेको फिल्म ‘जोनी जेन्टलमेन’ व्यावसायिक रूपमा असफल बन्यो । यो फिल्मपछि उनीहरू अभिनीत पछिल्लो फिल्म ‘शत्रु गते’ भने सुपरहिट भएको थियो । त्यसयता यो जोडी सँगै पर्दामा आएको छैन र दुवैले
सँगै नयाँ फिल्म गर्न लागेको पनि खबर छैन ।


‘नाई नभन्नू ल’ मै राम्रो अभिनय गरेकी वर्षा राउत धेरैको रोजाइकी नायिका हुन् । गाउँले होस् वा सहरिया दुवैखाले भूमिकामा वर्षा सुहाउँदी छिन् । उनले अभिनय गरेका ‘छक्का पञ्जा’, ‘छक्का पञ्जा २’, ‘जात्रा’ ले व्यावसायिक सफलता पाएपछि वर्षाले आफूलाई पहिलो दर्जाकी नायिकाका रूपमा अग्रपंक्तिमा उभ्याएकी छन् । ठूला–ठूला ब्यानरका फिल्ममा वर्षाले स्थान पाउँदै आएकी छन् ।


नयाँ कलाकार जन्माउने क्रमलाई निरन्तरता दिँदै आचार्यले पाँचौं शृंखलामा पनि तीन नयाँ अनुहारलाई भाग्य चम्काउने अवसर दिएका छन् । यही फिल्मबाट अभिषेक नेपालले डेब्यु गर्दैछन् भने यही फिल्ममा अनुभवको जोडीका रूपमा भित्रिएकी सेड्रिना शर्माले स्टारडमको बाटो समातिसकेकी छन् । फिल्म सार्वजनिक नहुँदै सेड्रिनालाई मन पराउने जमात् ठूलो छ । बीबीएका विद्यार्थी अभिषेकले फिल्ममा स्वस्तिमा खड्काको जोडी भएर अभिनय गर्दैछन् । कान्तिपुर फिल्म एकेडेमीमा पढिरहँदा निर्देशक विकास आचार्यको नजरमा परेका अभिषेकले अभिनयसँगै फिल्मका लागि आवश्यक अन्य कुराको पनि प्रशिक्षण लिएका छन् ।


त्यस्तै, पाँचौं शृंखलाबाट गायिकाका रूपमा समीक्षा अधिकारीले मौका पाएकी छन् । पोखरा छेउको एक स्कुलमा नाई नभन्नू ल कै गीत गाइरहेको अवस्थामा छायांकार पुरुषोत्तम प्रधान र मुख्य सहायक निर्देशक सुदीप कुँवरले देखेपछि दुवैले समीक्षालाई गीत गाउन लगाएर फेसबुकमा राखिदिएका थिए । फेसबुकमै समीक्षाको आवाज सुनेपछि संगीतकार वसन्त सापकोटा र विकास आचार्यले समीक्षाले पाँचौं शृंखलामा गीत गाउने अवसर दिएका थिए । उनले गाएको ‘बालापनको उमेर’ छोटो समयमै १८ लाख बढीले हेरिसकेका छन् ।

hellosukrabar@gmail.com

प्रकाशित : भाद्र ८, २०७५ ०९:४७
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

बम्बई टु मुम्बई

फिल्म र वेब सिरिजको दुनियाँमा थोरै रमाउनेका लागि नेटफ्लिक्स दैनिक जीवनको अभिन्न पक्ष बनिरहेको छ । यो भिडियो स्ट्रिमिङ साइट फिल्मको विश्वव्यापी भण्डार नै हो ।
हिन्दी भाषीमाझ मात्र होइन, संसारका झन्डै १ सय ९० देशमा धमाका मच्चाइरहेको छ, नेटफ्लिक्सको पहिलो इन्डियन ओरिजिनल वेब सिरिज सेक्रेड गेम्सले ।
हेलो शुक्रबार

काठमाडौँ — समाजमा आवेग छ, हिंसा छ, अन्याय छ, कुण्ठा छ, प्रेम छ, यौन छ । यिनै कुरालाई सिनेमामा जस्ताको त्यस्तै देखाउन खोज्छन्, बलिउड निर्देशक अनुराग कश्यप । तर संसारको सबभन्दा ठूलो लोकतान्त्रिक मुलुक भारतमा यो यथार्थ चित्रण पाच्य हुन्न । सेन्सरका नाममा अनुरागका फिल्ममाथि लगाम लगाइन्छ । त्यसैले अनुराग र सेन्सर बोर्डबीच लफडा परिरहन्छ ।

उनले जति फिल्म बनाएका छन्, सेन्सरले सबैलाई विवादित बनाइएको छ । उनी यस्तो ‘प्लेटफर्म’ को खोजीमा थिए, जहाँ आफूले सोचेको कथा निर्धक्क देखाउन पाइयोस् । अर्थात्, सेन्सर हुँदै नहोस् । अनुरागका लागि त्यस्तै वरदान बनेको छ, नेटफ्लिक्स ।


फिल्म र वेब सिरिजको दुनियाँमा थोरै रमाउनेका लागि नेटफ्लिक्स दैनिक जीवनको अभिन्न पक्ष बनिरहेको छ । यो भिडियो स्ट्रिमिङ साइट फिल्मको विश्वव्यापी भण्डार नै हो । त्यसैले हलको व्यापारलाई चौपट भइरहेको छ । अरूले बनाएको फिल्म किनेर आफ्नो साइटमा राख्दै आएको नेटफ्लिक्स केही समययता आफैं फिल्म र वेब सिरिज निर्माणमा लागेको छ । उसले पहिलो इन्डियन ओरिजिनल सिरिज बनाएको छ, सेक्रेड गेम्स ।


सेक्रेड गेम्सका दुई निर्देशकमध्ये एक हुन्, अनुराग । अर्का निर्देशक बलिउडमा फरक धारका फिल्म बनाइरहेका अनुरागकै साथी विक्रमादित्य मोट्वानी हुन् । जुलाई ६ बाट रिलिज भएको आठ एपिसोडको सेक्रेड गेम्स अहिले हिन्दी भाषी मात्र होइन, संसारका झन्डै १ सय ९० देशका दर्शकमाझ प्रिय बनिरहेको छ । अर्थात् नेटफ्लिक्सको इन्डियन डेब्यु दमदार भएको छ ।


सेन्सर नभएको अनुराग र विक्रमादित्यको सेक्रेड गेम्स कति यथार्थपरक होला ? काटमार र गालीगलौज त भइहाल्यो, न्युड दृश्य पनि उत्तिकै छन् तर यति कलात्मक र कथाको बहावअनुसार राखिएको छ कि ‘भल्गर’ लाग्दै–लाग्दैन । निर्देशकद्वयको सफलता हो यो । अनुरागले भनेका छन्, ‘सेन्सर बिनाका कन्टेन्ट निर्माण गर्नु हाम्रा लागि सपनाजस्तै थियो । सेक्रेड गेम्सबाट त्यही सपना पूरा भएको छ ।’ निर्देशक मात्र होइन, कलाकार पनि उस्तै धुरन्धर छन् । सैफअली खान, नवजुद्दिन सिद्धिकी, राधिका आप्टे, गीताञ्जली थापादेखि गिरीश कुलकर्नीसम्म ।


सन् २००६ मा इन्डो–अमेरिकन लेखक विक्रम चन्द्रले सेक्रेड गेम्स नामक उपन्यास लेखेका थिए । निकै प्रशंसा बटुलेको यस उपन्यासले भोडाफोन क्रसरोड बुक अवार्ड पनि जित्यो । सन् ८० र ९० को दशकमा बम्बईमा मौलाएको गुन्डागर्दी र धार्मिक द्वेषलाई बुनिएको छ यसमा । अझ गहिरिएर नियाल्ने हो भने बम्बई कसरी मुम्बई बन्यो भन्ने फेहरिस्त हो, सेक्रेड गेम्स ।


प्रहरी अधिकृत सरताज सिंह (सैफअली) लाई एउटा रहस्यमयी फोन कलमा ‘२५ दिनमा मुम्बई ध्वस्त हुने’ धम्की आउँछ । यो धम्की दिने अरू कोही नभएर, कुनै समय बम्बईमा आतंक मच्चाएका नामुद ग्याङस्टार गणेश गाइतोन्डे (नवाजुद्दिन) हुन्छन् । इमानदार भएर पनि विभिन्न कारणले सरताज सिंहको जागिर धरापमा पर्छ । तैपनि उनी गाइतोन्डेको अनुसन्धानमा लाग्छन्, सहर बचाउन । बिस्तारै यावत् स्वरूपमा रहस्यको पर्दाफास हुन थाल्छ । अनेक उपकथा र सहायक पात्र जोडिन्छन् । सन्स्पेन्स बढ्दै जान्छ । धर्म, राजनीति, सेक्स, फिल्मी दुनियाँ, दुई नम्बरी धन्दा, दमन अर्थात् हिजो बम्बईमा जे–जे थिए, सबथोक देख्न पाइन्छ, सेक्रेड गेम्समा ।


नवाजुद्दिन सिद्धिकी त सदाबहार बुलन्द भइहाले । गणेश गाइतोन्डेले अभिनेताका रूपमा उनको आयु अझ बढाएको छ । गाइतोन्डेको चरित्र चित्रण साँच्चै अद्भुत लाग्छ । पछिल्ला फिल्मबाट नमीठो अनुभव भोगेका सैफअलीलाई सेक्रेड गेम्सले धेरै हदसम्म राहत दिन्छ । चरित्रको मनोविज्ञानलाई समात्न सफल छन् उनी । खुफिया एजेन्सी ‘र’ की एजेन्ट बनेकी राधिकाले उस्तै राम्रो काम गरेकी छन् । यही सिरिजबाट ‘हटकेक’ बनेकी छन्, कब्रा साइत । ट्रान्सजेन्डर मोडलका रूपमा कब्राको अभिनयलाई भारतीय मिडियाले ‘साहसिक र ‘जादुयी’ भनेका छन् । तसर्थ कलाकारबाट सशक्त काम लिने मामलामा अब्बल छौं भनेर फेरि एकपटक प्रमाणित गरेका छन्, अनुराग र विक्रमादित्यले ।


खासमा सेक्रेड गेम्सलाई फिल्ममा ‘एडप्ट’ गर्न यसअघि नै एक हलिउड कम्पनीले स्वीकृति लिएको थियो । तर अढाई घण्टाको फिचर फिल्ममा पूरा किताब समेट्न सम्भव भएन । फिल्म निर्माण त्यहीं तुहियो । त्यसो भए, नेटफ्लिक्सको ६ घण्टा लामो आठ भागको सिरिजमा सबै कथा अटाइएको छ त ? छैन । उपन्यासको जम्मा एक चौथाइ कथा मात्र हो यो । सोही कारण नेटफ्लिक्सले दोस्रो सिजन बनाउँदै छ भन्ने चर्चा चलिरहेको छ । दर्शकको माग पनि त्यस्तै छ । औपचारिक घोषणा भएको छैन । तर, नेटफ्लिक्सले सेक्रेड गेम्सको दोस्रो सिजन मात्र होइन, सवा अर्ब जनसंख्या भएको भारतका अन्य विषयमा पनि निर्माण गर्छ भन्नेमा चाहिँ शंका छैन ।

hellosukrabar@gmail.com

प्रकाशित : भाद्र १, २०७५ १०:२७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT