अक्षयको नयाँ फर्मूला

एक्सन र कमेडी भूमिकामा सीमित अक्षय कुमार सार्थक सिनेमामा देखिन थालेका छन् । यसको पछिल्लो उदाहरण हो ‘गोल्ड’ ।
पहिले एक्सन, कमेडी र रोमान्टिक रोल मात्र गरें । अहिलेचाहिँ हरेक फिल्ममा फरक काम गर्न रूचाउँछु, जुन समाजसँग जोडिएको होस् ।
हेलो शुक्रबार

काठमाडौँ — एउटा जमाना थियो, अक्षयकुमार सिर्फ एक्सन र कमेडी फिल्म खेल्थे, त्यो पनि मसलाले भरिपूर्ण । ‘तीस मार खान’, ‘सिंह इज ब्लिङ’, ‘राउडी राठोर’, ‘जोकर’, ‘बोस’, ‘गब्बर इज ब्याक’ कत्ति हो, कत्ति । वर्षमा चार–पाँच फिल्म आउँथे, सबै उस्तै लाग्ने । त्यसैले उनीमाथि व्यंग्य गर्न थालिएको थियो, अक्षयकुमार अभिनेता कम, मेसिन ज्यादा हुन् । भलै कसले के भन्छ, वास्तै थिएन उनलाई । होलसेलमा फिल्म खेलिरहेका थिए ।

तर दुई वर्षयताका अक्षयका फिल्म हेर्नुस् ? आकाश–पातालको अन्तर छ । कोरा मनोरञ्जन होइन, गहन सन्देश बोकेका फिल्म खेलिरहेका छन् उनी । यथार्थपरक सामाजिक मुद्दाबाट पर नभागेका अर्थात् अर्थपूर्ण फिल्म उनको रोजाइमा पर्न थालेको छ । त्यसैले त हिजो ‘मेसिन’ भनेर उडाउने मिडिया अहिले उनकै वाहवाही गरिरहेका छन् । ‘एयरलिफ्ट’ बाट सुरु भएको यो सुखद यात्रा ‘गोल्ड’ सम्म आइपुगेको छ । जसले अक्षय मात्र होइन, मूलधारका हिन्दी फिल्मकै साख उकासेको छ ।
‘गोल्ड’ कै कुरा गरौं । बेलायती उपनिवेशबाट स्वतन्त्र भएपछि सन् १९४८ को ग्रीष्मकालीन ओलम्पिकमा भारतले पहिलोपटक हक्कीमा स्वर्णपदक जितेको कथा हो यो । अक्षयचाहिँ राष्ट्रिय हक्की टिमको व्यवस्थापक बनेका छन् । देशलाई स्वर्णपदक जिताउन एकोहोरो लागिपर्ने उनको चरित्र परम्परागत ‘हिरोइज्म’ को धङधङीबाट मुक्त छ । भारतमा निश्चित आवधिक, त्यसमा पनि खेलमाथि बनेका फिल्म फ्लप हुन्छन् भन्ने मान्यता छ । विगतमा अक्सर त्यस्तै भएको छ । तर ‘गोल्ड’ ले त्यो भ्रम तोड्यो । पैसा कमायो, प्रशंसा पनि । निर्देशक रीमा काग्तीपछि यो सफलताको जस कसैले पाउँछ भने अक्षयले नै हो । ‘गोल्ड’ मात्र होइन, प्राय: फिल्ममा उनी देशप्रेमले ओतप्रोत भूमिकामा देखिन थालेका छन् ।


अक्षयको छवि निर्माणमा सशक्त भूमिका खेलेको अर्को फिल्म हो, ‘प्याडम्यान’ । स्यानिटरी प्याड प्रयोग नगर्दा महिलाहरू अनेक रोगबाट प्रताडित छन् । तमिलनाडुका अरुणाञ्चलममा मुरुगन्थमले घरेलु विधिबाट प्याड बनाए र सस्तोमा बेचे, जसबाट लाखौं महिला स्वस्थ भए । ‘प्याडम्यान’ मा अक्षय यही पुण्यकर्ममार्फत संसारभर ख्याति कमाएका अरुणाञ्चलम बने ।

Yamaha


त्यस्तै, चर्पी नभएकै कारण विवाहमा आइपरेको संकटलाई बडो व्यावहारिक ढंगले उठाइएको छ, अक्षय अभिनीत ‘ट्वाइलेट : एक प्रेम कथा’ मा । उनले ‘जोली एलएलबी २’ मा भारतको न्यायिक प्रणालीमाथि व्यंग्य कसे । ‘रुस्तम’ उनको सम्झनालायक अर्को सिनेमा हो । यी फिल्मले व्यापार पनि लोभलाग्दो गरे । बलिउडमा अनुशासित अभिनेताको पहिचान बनाएका अक्षय भन्छन्, ‘पहिले एक्सन, कमेडी र रोमान्टिक रोल मात्र गरें । अहिलेचाहिँ हरेक फिल्ममा फरक काम गर्न रुचाउँछु, जुन समाजसँग जोडिएको होस् ।’


भनिन्छ, असली हिरोको भूमिका ‘रिल’ मा मात्र सीमित हुन्न, ‘रियल’ मा पनि हुनुपर्छ । अक्षय यसलाई शिरोधार्य गरिरहेका छन् । कहिले आत्महत्या गरेका महाराष्ट्रका किसानको परिवार त कहिले सीमा सुरक्षामा खटिएका सैनिक जवान र तिनका परिवारलाई आर्थिक सहयोग गर्छन् । उनले बलिउडका स्टन्टम्यानको बिमा र स्वास्थ्य उपचारका लागि ‘कोष’ सुचारु गरेका छन् । मुम्बईमा ‘सेल्फ डिफेन्स’ का लागि १५ हजार युवतीलाई मार्सल आर्ट्स सिकाइसकेका उनी वन्यजन्तु बचाउ अभियानमा उत्तिकै लागिपरेका छन् । ५० वर्ष टेकिसकेका यी अभिनेताले भनेका छन्, ‘मलाई जुन काम गर्दा आनन्द आउँछ, त्यही गरिरहेको छु । भागदौड छैन ।’


मनमौजी मार्गमा हिँडिरहेका अक्षयका दुई फिल्म प्रदर्शन हुन बाँकी छन्, ‘केशरी’ र ‘रोबर्ट २.०’ । युद्धको कथामा बनेको फिल्म ‘केशरी’ मा उनी सैन्य लडाकु बनेका छन् भने साइन्स फिक्सन ‘रोबर्ट २.०’ मा भिलेन ।

hellosukrabar@gmail.com

Esewa Pasal

प्रकाशित : भाद्र १५, २०७५ १०:३३
ADVERTISEMENT
प्रतिक्रिया
पठाउनुहोस्

पंक प्रिन्सेसको पुनरागमन

क्यानडियन गायिका एभ्रिल लभिनले झन्डै पाँच वर्षपछि नयाँ एल्बम ल्याउन लागेकी छन् । तर, यसपटक उनी पुरानो ‘गर्लफ्रेन्ड...’ गीतजस्तो विद्रोही, ग्रन्ज–पप शैलीमा देखिनेवाली छैनन् ।
हेलो शुक्रबार

काठमाडौँ — एभ्रिल लभिन । सुरुमा त यो नामै ‘कम्प्लिकेटेड’ मानियो । कसैले लेभिगन भने, कोही लेभिग्ने, कोही लेभाग्नी भन्थे । शुद्ध उच्चारणको कुरा थियो, विस्तारै सबैले सिके पनि । तर, एभ्रिलको जीवन ‘कम्लिकेटेड’ बन्न छोडेन । उनी सधैं हल्लामा छाइन् । धेरै पटक झूटो मृत्युको समाचार फैलियो ।

उनले गाउन छोड्यो कि मृत्यु भएको बताइन्थ्यो । हुँदा–हुँदा नयाँ भिडियो बाहिरिँदासमेत त्यो असली एभ्रिल नभएर उनकै उस्तै अनुहारले गाएको भनियो । सक्कलीलाई नै नक्कली एभ्रिल भन्दै हल्ला फिँजाइयो । उनको ‘मृत्यु’ का कारण अनेक मानिए । एचआईभी एड्सदेखि अन्य जटिल रोगले निधन भएको बताइयो । तर, उनी सधैं सकुशल थिइन् ।


झूटलाई सयौं पटक दोहोर्‍याए सत्य बन्छ भनेझैं भयो एभ्रिलको जीवनमा । सन् २०१५ मा उनलाई साँच्चै रोग लाग्यो । किर्नोबाट सर्ने लाइम रोगका कारण उनी दुई वर्षयता पर्दापछाडि रहिन् । ज्वरो आउने, जीउमा रातो धब्बा देखिने, थकान जस्ता समस्या झेलिन् । सरुवा रोग नभए पनि उनी सार्वजनिक स्थलमा आइनन् ।


बेलाबखत ट्वीटरमार्फत आफ्ना प्रशंसकलाई भेट दिने गरेकी थिइन् । यो साता भने ‘सरप्राइज’ दिइन् । नयाँ म्युजिक भिडियो ल्याउन लागेको खबर सार्वजनिक गरेपछि एभ्रिलका पंक–पप प्रशंसक खुसी नहुने कुरा थिएन । झन्डै पाँच वर्षपछि उनको स्वर गुन्जिन लागेको छ । तर, यसपटक उनी पुरानो ‘गर्लफ्रेन्ड...’ गीतजस्तो विद्रोही, ग्रन्ज–पप शैलीमा देखिनेवाली छैनन् ।


यी क्यानडेली पंक प्रिन्सेसले आफूलाई पहिलो पटक भावप्रधान गीतमा उतार्दैछिन् । सेप्टेम्बरमा निकाल्ने भनिएको छैटौं स्टुडियो एल्बम पियानो–प्रमुख हुनेछ । यसमा पियानोको धुनलाई बढी समावेश गर्न लागिएको बताइन्छ । ‘म आफ्ना गीतमा वास्तविकता र इमानदारी प्रस्तुत गर्न खोज्छु,’ उनले अमेरिकाको ई–न्युजसँग भनेकी छन्, ‘पछिल्लो दुई वर्षमा धेरैथोकबाट गुज्रिएँ, पाठ सिकेकी छु । यो एल्बम अवश्य फरक हुनेछ ।’


एभ्रिलको सांगीतिक सुरुवात दमदार थियो । सन् २००२ मा निकालेको पहिलो म्युजिक भिडियो (‘कम्प्लिकेटेड...’) नै विश्वव्यापी चर्चित बन्यो । कसले गाएन होला यो गीत ? कुन युवा प्रभावित भएन होला उनको शैलीबाट ? गाउने तरिका, लवाइ, ठाँट, स्वर, भिडियो सबै ट्रेन्डसेटर बने । यसलाई पछ्याउने कति निस्किए, निस्किए ।


नेपालमा पनि एभ्रिलको प्रभाव प्रत्यक्ष देखिएको थियो । सहरिया युवायुवती लवाइ र लुक्समा उनको नक्कल गर्थे । ब्यागी प्यान्ट, कालो ब्रासलेट, स्ट्रेट कपाल केटीहरूले अपनाए । स्केटिङ र गितार केटाहरूको रोजाइ बन्यो । सुबु थापा जस्ता गायिकाले नेपाली भर्सनको ‘कम्प्लिकेटेड..’ नै निकाल्न भ्याए । उता, सत्र वर्षीया एभ्रिल अवार्डहरू जित्दै थिइन् ।
ग्रामीमा दुइटामा विधामा मनोनीत भएकी थिइन् । एमटीभी म्युजिक भिडियो अवार्ड हात पारिन् । सन् २००९ मा द रोलिङ स्टोन म्यागजिनले ‘कम्प्लिकेटेड...’ लाई दशककै दस ‘टप सिंगल’ मध्ये एक मान्यो । त्यो बेला प्रचलित टिन–डिस्को गीतहरूबाट आजित युवा श्रोतालाई एभ्रिल नयाँ शैलीका रूपमा उदाएकी थिइन् । भिडियोमा देखिने उनको सन्की स्वाङ धेरैले प्रिय माने ।


लभिन दम्पतीकी माइली छोरी एभ्रिल सानैदेखि गाउँथिन् । चर्चमा गाउँदै हुर्किएकी हुन् । धर्ममा जोडिएकाले गीतमा त्यसको प्रतिबिम्ब आउने उनको भनाइ छ । ‘मेरा मूल नीतिहरूमा धार्मिक परिवारको प्रभाव छ,’ ३३ वर्षीया एभ्रिल भन्छिन्, ‘मेरी आमाले शब्द चयनमा ध्यान दिन सिकाउनुभयो । राम्रै सुनिए पनि म कतिपय शब्द प्रयोग गर्दिनँ । अपशब्द राख्न मनले मान्दैन ।’

hellosukrabar@gmail.com

प्रकाशित : भाद्र ८, २०७५ ०९:४७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT