रोमाञ्चक खेलको अवसर

कान्तिपुर संवाददाता

काठमाडौँ — दसैं भनेपछि सबै केही न केहीमा व्यस्त हुन्छन्, नियमित कामकाज छाडेर । तर कुनै खेलको कट्टर समर्थक हो भने दसैं भनेर यसबेला सुख पाइने छैन किनभने यसै समयमा निकै सनसनीपूर्ण केही खेल हुँदैछन्, विश्व खेलकुदमा । विशेषत: फुटबलमा । अनि क्रिकेटमा पनि । यसपालिको दसैंताका हुने केही महत्वपूर्ण खेल :

फ्रान्सविरुद्ध जर्मनी
पेरिस
१६ अक्टोबर
अचेल युरोपतिर यूईएफए नेसन्स लिगको माहोल चलेको छ । ढिलो–चाँडो यसले अन्तर्राष्ट्रिय मैत्रीपूर्ण खेललाई विस्थापित गर्नेछ । विश्वकप २०१८ सकेलगतै यो प्रतियोगिता सुरु भएको हो र लामो समय लगाएर युरोपका देशले खालि समयमा यो प्रतियोगिता खेल्नेछन् । र, फूलपातीकै दिन परेको छ, फ्रान्सविरुद्ध जर्मनीको खेल । फ्रान्स त रह्यो, विश्वकप विजेता टिम । अनि जर्मनी चार वर्ष अगाडिको विजेता । तर सबैको आँखा जर्मन टिममै हुनेछ र सबैले उत्तर खोज्ने प्रयास गर्नेछन्, के जर्मन फुटबल खस्केकै हो अथवा अझै उस्तै छ ?

Yamaha

बार्सिलोनाविरुद्ध सेभिया
बार्सिलोना
२१ अक्टोबर
सुरुमै सही, तर पनि स्पेनी ला लिगको शीर्ष स्थानमा अहिले को छ, अनुमान गर्न सकिन्छ ? अंक तालिकाको नम्बर १ मा बार्सिलोना पनि छैन, रियल म्याड्रिड पनि छैन । छ त, सेभिया । केही दिन अगाडि मात्र हो, लिगमा सेभियाले रियलमाथि सनसनीपूर्ण जित निकालेको थियो । खासमा रियलले अहिले राम्रो खेल्न सकिरहेको छैन, क्रिस्टियानो रोनाल्डो गएयता ।
बार्सिलोनाको टिम त उस्तै छ, तर उसले पनि लय पाउन सकेका छैन । यसै पृष्ठभूमिमा एकादशीको दिन बार्सिलोनाले आतिथ्य गर्नेछ, यही सेभियाको ।

चेल्सीविरुद्ध म्यानचेस्टर युनाइटेड
लन्डन
२० अक्टोबर
पोर्चुगाली प्रशिक्षक जोसे माउरिन्होले जति पनि ख्याति कमाए, ती सबै चेल्सीमा छँदै कमाए, चेल्सी छाडेर अरूतिर उनले बदनामी नै बढी कमाए । अहिले उनी म्यानचेस्टर युनाइटेडमा छन् र भनिन्छ, कुनै पनि बेला उनी बर्खास्तीमा पनि सक्छन् । फेरि पनि मोउरिन्होको दम्भ हेरिनसक्नु छ । अहिले इंग्लिस प्रिमियर लिगमा तीन टिम समान १८ अंकसहित शीर्ष स्थानमा छन्, म्यानचेस्टर सिटी, चेल्सी र लिभरपुल । म्यानचेस्टर भने आठौं स्थानमा छ । संयोगले एकादशीको दिन म्यानचेस्टर चेल्सीकै भ्रमणमा जाँदैछ ।


पाकिस्तानविरुद्ध अष्ट्रेलिया
अबुधाबी
१६–२० अक्टोबर
‘बल टेम्परिङ’ विवादपछि आफ्ना दुई
प्रमुख खेलाडीका रूपमा स्टिभ स्मिथ र डेविड वार्नर गुमाएको अष्ट्रेलिया अब पहिले जस्तो टिम रहेन । विशेषत: टेस्ट क्रिकेटमा उसको साख गिरेको छ । अहिले अष्ट्रेलिया र पाकिस्तानबीच टेस्ट सिरिज चलिरहेको छ र यो यूएईमा भइरहेको छ । त्यसको अर्थ यो पाकिस्तानको घरेलु सिरिज हो । फूलपातीको दिन यी दुई टिमबीचको दोस्रो टेस्ट अबुधाबीमा सुरु हुनेछ । पाकिस्तानको सकेसम्म दाउ हुनेछ, अष्ट्रेलियाको साख गिराउने ।



श्रीलंकाविरुद्ध इंग्ल्यान्ड
दाम्बुला, केन्डी, कोलम्बो
१३, १७, २० र २३ अक्टोबर
वान डे क्रिकेटका पारखीका लागि आजभोलि पूरा ध्यान वान डे विश्वकपमा छ । इंग्ल्यान्डमा अबको विश्वकप हुनेछ र वान डे क्रिकेटमा यही टिम लयमा देखिने प्रयासमा छ । इंग्ल्यान्डमै क्रिकेट खेलकै जन्म भए पनि यो टिमले अहिलेसम्म वान डे विश्वकप जित्न सकेको छैन । सायद यसपल्ट आफ्नै घरेलु मैदानमा यो उपलब्धि प्राप्त हुनेछ कि ? यसको सुरुआती परीक्षा श्रीलंकाविरुद्ध चलिरहेको छ । महाअष्टमीको दिन क्यान्डीमा दुई टिम तेस्रो वान डेमा भिड्ने छन् र यो खेल हुनेछ, डे नाइटका रूपमा ।

प्रकाशित : आश्विन २६, २०७५ ११:३६
ADVERTISEMENT
प्रतिक्रिया
पठाउनुहोस्

शो परिकल्पना

कान्तिपुर संवाददाता

काठमाडौँ — भिन्नाभिन्नै पहिरनमा ठाँटिएका कलेजका विद्यार्थी र मोडल आइतबार सोल्टी क्राउन प्लाजा होटलको हलमा पालैपालो र्‍याम्पमा उत्रिए । ‘अभूतपूर्व परिकल्पना’ नाम दिइएको फेसन शोमा नमुना कलेज अफ फेसन टेक्नोलोजीका विद्यार्थीको बाहुल्य थियो । ड्रेस डिजाइनिङ र क्याटवाकमार्फत उनीहरूले स्नातक तेस्रो वर्ष सकिएको संकेत दिएका थिए ।

लिम्बू, धिमाल, शेर्पा, थकाली, नेवार, सुनुवार, थारू र राजवंशी समुदायको पहिरनमा मोडल दर्शकदीर्घामा देखा परेसँगै फेसन शो सुरु भएको थियो । त्यसपछि चेन्ज इन सिजन, फेमिनाइन लुक, पप आर्ट र सेड्स अफ कलर थिममा विद्यार्थीलाई र्‍याम्पमा उतारिएको थियो । स्नातक पूरा गर्न लागेका ८४ विद्यार्थी आ–आफ्नै थिममा सहभागी भएका थिए । नयाँ विद्यार्थीहरू भने मोडलका रूपमा प्रस्तुत भएका थिए । एक्काइस वटा समूहले विद्यार्थीका क्रिएटिभ डिजाइनलाई प्रदर्शन गरेका थिए ।


१४ औं ग्रयाजुएसन फेसन शो विद्यार्थीहरूका लागि १ सय पूर्णाङ्कको हो । यसमा आन्तरिकबाट ५० र फेसन शोबाट ५० अंक दिइन्छ । फेसन शोमा प्रारम्भिक चरणमा २५ अंक र रन–वेको प्रदर्शनीलाई आधार बनाएर २५ अंक छुट्याइएको हुन्छ । र्‍याम्पमा मोडल मात्र उत्रिएनन्, सँगै डिजाइनर पनि देखा परेका थिए । फेसन शोको कोरियोग्राफी रोजिन शाक्यले गरेका थिए । अचेल मानिसहरू अनलाइन, भिडियो गेममा बढी प्रभावित भइरहेका छन् । त्यस्तै खालका जीवन शैलीमा चाहिने थिममा ड्रेस डिजाइन गरिएको थियो, जसलाई ६ सिक्वेन्समा देखाइएको थियो ।


– विमल

तस्बिरहरू : इलिट जोशी

प्रकाशित : आश्विन २६, २०७५ ११:३६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT